Ads by Google Ads by Google

Fa'atofala'iga - Le Fautasi a Samoa - Talaaga o Fautasi Vaega 2


[ata: foa'i]

E le o fa'avaivai le sasa'a o finagalo, aua ua iloga o le Fautasi Samoa, e na'o Samoa lava o lo'o latou fa'aauauina lea agaifanua, o lo'o faia fo'i tu'uga e pei ona manatu i ai tua'a ia mavae, ia mautu fa'agatama i le tai, e nofo fealofani ma fefa'amasani a'i Samoa, i ona tupulaga ma faiganu'u.

 

O i latou o e faia upu ma tonu o lea agaifanua taua a Samoa, e aofia ai ta'ita'i o le Malo ma Matai o Aiga, o lona uiga, o Sui mamalu nei o le pulega a Ali'i ma Faipule ua va'aia o loo auai atu pea i nei aso e tolu o lenei fa’atasiga.

 

O le vaega lua, o i latou nei e matele ina i ai le tele o manatu fa'aalia na soalaupule ai le fa'atofala'iga mo aso e tolu. O i latou o le so'otaga o le taimi tuana'i ma le taimi nei. O i latou e afua mai le 40 tausaga aga'i i le 65 tausaga le matutua. Vaega lona tolu, o talavou o le atunu'u.

 

I nei vaega e tolu, sa tofusia ma lisi o fesili ua fa'atulaga mai e le National Marine Sanctuary ina ia tata'i aga'i i ai o latou finagalo fa'aalia, e talia ai nei fesili aua se taumafaiga mo se Komisi Fa'afoe o Fautasi Samoa.

 

Vasega o Ta'ita'i i Matai i totonu o faiganu'u, e ese a latou fesili sa taua'aoina i ai. Na fa'afesili mo se aga'i i luma o Fautasi Samoa ma ala e fa'aleleia atili ai,

 

O nisi o manatau mai sui na tutula'i, o Va'amua Henry Sesepasara, sa ia fa'ailoa, "O le ulua'i Fa'atofalaiga o Fautasi Samoa lenei ua faia, ua mafai ai ona fa'amauina taofi o ta'ita'i o le Malo, Matai o afio'aga ma itumalo, ae maise i latou o lo'o avea ma Sa'o i o latou aiga, e tatau ona fa'aauau pea lenei agaifanua i totonu o afio'aga. Ua iloga e taugata tele, ma o le a mafai ona fa'aulu mai nisi o ala e saili ai le seleni mo le fa'amoemoe ia fausia fautasi. A o'o i vaitau o tu'uga ma fa'agatama i le Tai, ia taumafai ona fa'atula'ia le Komisi Fa'apitoa o Fautasi ma Tu'uga Fautasi. O lea Komisi e pasia aiaiga uma e faatula'ia ai i totonu o le fono faitulafono. O lea Komisi e pasia uma ala o fa'atupega o Fautasi, aiaiaga o Tu'uga Fautasi, ma o le a le aia i ai le Malo, ina ia taumafai ai e ave'ese mai le tele o polokiki o lo'o a'afia ai tu'uga va'a."

 

O se mau na matua patipatia lea ina ua fa'alauiloa lea iuga ua soalaupule i ai ai ta'ita'i ma le saofaiga o Matai ma Faipule sa auai. Ua latou fa'ailoa mai, "Ua le gata i Tu'uga Fautasi mo ali'i, ae o le a faia tu'uaga va'a tulula e pei ona saunia mo tama'ita'i ma ali'i, faapea fo'i ma paopao, o agaifanua uma nei o ala o folauga a Samoa.”

 

"Ona o lea ua tula'i mai e mafai ona fa'apasia lea komisi, ua tatau ona aoga uma le faiganuu i fautasi o latou afioaga, ma o le a usita'ia ai e tatou uma le agaga tonu sa fa'atula'ia ai lenei agaifanua e o tatou tua'a.

 

"O le ave'esea fo'i o le pulega fa'alemalo e fa'atautaia ai le fa'agatama, o le a ave'esea ai le faitonu tutasi a le Kovana mai le taimi o tu'uga ma ona fa'aiuga. Ae o le a soalaupule lava le Komisi e tusa o le usita'ia o tulafono na mae'a pasia.”

 

"O le isi, afai e sousou le vasa, e le tau fesiligia fua le vaega o le Ofisa o le Tau, e leai se pule mai lea Ofisa e taofia ai le tu'uga, pe sou pe malu le tai, o le tu'uga lava ua fa'atulaga e alu. O iina fo'i e fa'ailoa ai le agava'a o tautai folau, pe a iloa lelei fa'atautaia lona sa i aso sousou, ma e le umi lava le tu'uga, e matele ina na'o le ta'i 30 minute ua mae'a."

 

Mai le vasega tulaga lua o le fa'amoemoe, sa latou talia ai fesili, "Po'o tumau le agaifanua o Fautasi ma le tausiga o le fealofani i le va o afio'aga ma tupulaga?" O le tali mai o le “Ioe, ma ua va'aia lava le sagisagi fiafia o tagata uma e tapua'ia faiva o latou Sa. I nisi tausaga sa fa'aletonu ai le tele o fa'aiuga pe faia pe le faia se tu'uga, sa matua fa'asea tagata e to'atele ma fa'auia mai o latou lagona o'otia, to'atama'i ma le fa'asea i le ta'ita'iga o le Malo. Peita'i na taofia lava, aua o le tele o taimi ua fa'alala mai, ua leaga le tau.”

 

Fa'aalia taofi tau le pulega a le Malo i tu'uga, e le faigofie ona fa'atulaga lelei va'a i le tai, ona o le fa'alogogata o ali'i Kapeteni i tulafono ua mae'a malilie i ai. Peita'i, e iloga lava auva'a e i'u lelei le taumafaia e le gaoia mai le amataga o le tu'uga. O iina fo'i le isi a'oa'oga lelei, ia fa'alogo e le mafai ona manumalo le mea sese, e malo lava le mea sa'o i faiva i le tai.

 

"Mai le tetele ua oo i ai fa'ailoga o tu'uga va'a, ua ta'i $25,000 i nisi tausaga peita'i ua fa'ailoa fo'i se manatu, sa tatau ona feololo se seleni e tufa mo le fanau sa alova'a.”

 

Sa faailoa e nisi, "O le maua o le tupe mo le fanau talavou e foliga mai o se galuega e faia ia totogia le alo ai i le Sa o lona nu'u moni. E tatau ona mua'i iloa e le taule'ale'a, o lana tautua lea i lona nu'u. A maua e itiiti lava se seleni, ae o lo'o fa'asoa e le pulega a Ali'i Matai ma Faipule le seleni na maua mai, ma toe fausia ai se isi Sa fou e fa'alua ai Sa.”

 

O lo ua tu'ua ai fa'apena lea fo'i mataupu, e tatau ona talanoaina pea lea tulaga e le saofaiga a Ali'i ma Faipule o le afio'aga.

 

O le filifiliga o Kapeteni, po'o ai sui e sili ona agava'a i lea agaifanua. Ua fa'ailoa mai e manatu o nisi, "Aua ne'i tofia mai se tasi e le'i muamua alova'a mo ni tausaga se tele i lo latou Sa, aua afai e le'i i ai muamua i lea agaifanua lona sui, e le malamalama fo'i o ia i le faigata ma ona tiga, a'o le'i maua se fiafiaga o le manumalo. O le to'atele e le'i alo muamua e fefefe i le sousou o le tai.”

 

O le lumana'i o Fautasi Samoa, pe tatau ona faia i ai ni suiga, i lona Fausaga ma lona sao i le faiganu'u?

 

"O se fesili e le'i faigata ona talia, aua ua mautinoa i loto ma agaga o tagata Samoa e taua le Fautasi ia i latou. E amata mai lava i le igoa "Fautasi" e matua Samoa lava lona a'ano ma lona ute. Ia galulue fa'atasi tagata uma mo se manuia mo le nuu, le Ekalesia, le aiga lautele, e o'o lava i totonu o le li'o o aiga.

 

O le sui talavou, Tamiano Gurr mai le auva'a a le Iseula o le Moana mai Fagatogo, sa tatala lona taofi, aua sa folasia fa'atasi o latou taofi ma isi sui talavou mai a'oga maualuluga sa auai i lea fa'atofala'iga o Fautasi Samoa.

 

"O le taofi ma le vavao a le auva'a mo i matou uma e to'a 45 ua mae'a fili fa'apitoa mo se nofoa e alo ai i le va'a o Fagatogo, e lima lelei vaiaso o taofia fa'atasi i matou, ina ia mautu lelei, lo matou loto fa'aleuso e tasi. Pe mua pe leai, e le o le auau lea o le fa'amoemoe, ao le fai uso ma le loto gatasi i mea uma.”

 

“O le malosi fo'i o i matou i luga o le vasa, e fa'amoemoe tele i le tapua'iga mau a le afio'aga lea e amata i tama ma le saofaiga a alii ma faipule o matai fo'i o le afioaga se'ia o'o i faletua ma tausi ma sa'oao, ae maise le fanau tupulaga lalovaoa o le afio'aga.”

 

"Peita'i o se mea tiga tele i lagona, i taimi e faia ai fa'aiuga a le Komiti ma le afioga le fa'aao o le Malo, ua solofua ai le tu'uaga va'a i le tai, ae ua le se'i tepa lava i le tautiga sa fa'atino i le fa pe tolu masina a'o loma le fa'amoemoe.”

 

"O le Malolo o le mea a le tamali'i, aua o lagona e o'o mai, e matua e le fia o'o i ai, aua sa tu'u atoa i ai lou loto ma lou taumafai,” o sana toe tala lea.

 

Mai le tala'aga o tu'uga uma sa faia i tausaga ua mavae ua mafai ai ona fa'ailoa mai fa'amaumauga nei.

 

Fautasi na mua'i tatalaina nei mea o tu'ugavaa i aso fa'ailogaina o le fu'a na amata lea i le tu'uga va'a i le tausaga 1911, lea e i ai fa'amaumauga na tutu'u ai fautasi ma mua ai le Sa o Aunu'u, tulaga lua ai Aua, tulaga tolu Pago Pago, tulaga fa Fagaitua. I le fu'a a Manu'a na malo ai le vaa o Olosega, ae tulaga lua ai le va'a o Faleasao, ma isi va'a e lua sa auai ae le maua igoa.

 

I le tausaga 1912, e le'i fa'amauina mai le fa'aiuga o le Tu'uga Fautasi mo le Fu'a, peita'i o le tu’uga ia Iulai 4, Fu'a a Meleke na tulaga muamua ai le va'a Fagatogo, ae tulaga lua le va'a o Fitiuta.

 

Tausaga 1913 na faia ai le tu'uga mo le sisigafu'a i va'a ta'i 36 nofoa na manumalo ai Pago Pago, tulaga lua ai Fagatogo. O tu'uga i va'a 24-34 nofoa le uumi na malo Fagasa, tulaga lua Fagaitua, ae tulaga tolu ai Vailoa. O le fu'a a Manu'a i lea tausaga na mua ai le va'a o Ta'u ae tulaga lua le va'a o Olosega.

 

Ona soso'o mai lea ma isi tausaga se'ia o'o i le sisigafu'a 1920, fa'ato'a toe faia le tu'uga fa'atasi. O iina na fa'ato'a tutu'u ai se Sa o Nuuuli ma sa latou mauaina ai le tulaga muamua, tulua ai Fagasa ae tulaga tolu Amanave. I le tu'uga o le Fu'a a Manu'a i lea lava tausaga na malo ai le va'a o Luma, ae tulaga lua Faleasao.

 

O le tausaga 1921 na toe suipi ai fo'i le va'a o Nuuuli, tulaga lua ai Pago Pago ae tulaga tolu Fagasa. Tausaga e 1922 na toe malo fo'i Nuuuli, tulaga lua Fagasa ae tulaga tolu Amanave. Peita'i i le tausaga e 1923, na oso ai i luga o le fua le afio'aga o Afonotele ma latou maua le tulaga muamua, tulua ai Nuuuli ae tulaga tolu Fagasa. [soso'o lomiga aso Lua]