Na fa’atoese le afioga i le ali’i Kovana ia Lolo Matalasi Moliga i le maota maualuga o le Fono Faitulafono, ona o se fa’aletonu i lana vaega e fa’atatau i le tofiaina o le afioga i le ali’i Fa’atonusili o le Matagaluega o Tagata Faigaluega a le malo ia Sonny Thompson, e avea ai o ia ma totino o le Komiti Fa’afoe a le Litaea.

I se tusi sa tu’uina atu e Lolo i le peresetene o le Senate ia Gaoteote Palaie Tofau ma le mamalu o afioga i Senatoa i le maota maualuga i le aso 25 Aokuso 2015, o lo o taua ai e Lolo ona lagona e uiga i lenei mataupu.

“O lena ua fa’apipi’i atu i la’u tusi le kopi ole ulu siaki a le tofa a Le’i Sonny Thompson e fa’amaonia ai, le avea o ia ma totino o le teugatupe o le Litaea a le malo o Amerika Samoa,” o le vaega muamua lea o le tusi a le ali’i kovana i le Senate.

“Ou te fa’atoese atu ai i se tulaga fa’aletonu i la’u vaega, i le tofiaina lea o Thompson e avea ma totino o le Komiti Fa’afoe a le litaea, ina ua ou manatu o ia sa avea ma totino o le teugatupe i le taimi na ou tofia ai o ia,” o se vaega lea o le tusi a Lolo.

“Sa i ai lo’u manatu o ia o se totino o le Teugatupe o le Litaea, fa’avae mai lea i luga o faiga masani sa i ai, o le Fa’atonusili o le Ofisa lea o se sui o le teugatupe a le litaea. Ua ou fa’atamala i le fa’atinoina o o’u tiute, e ala i le sailiina lea o fa’amatalaga sa’o e uiga i lenei mataupu, ina ia tusa ai ma tulafono a le malo,” o le saunoaga lea a Lolo i lana tusi.

“O a’u lava ua mafua ai le fa’aletonu, ina ua ou manatu o le ali’i Fa’atonu o lo o avea ma totino o le teugatupe a le litaea, i le taimi na ou tofia ai o ia, ae o le mea moni, sa tatau ia te a’u ona mautinoa o le tagata na te vaavaaia uma tagata faigaluega a le malo o se totino o le teugatupe a le litaea,” o le saunoaga lea a le ali’i kovana.

Na fa’ai’u le tusi a Lolo i le maota maualuga, i lona fa’ailoa i ai e fa’apea, e i ai lona talitonuga, o lona fa’amaonia atu o le avea o le ali’i Fa’atonu ma totino o le teugatupe a le litaea, o le a fa’aauau ai loa le fa’amaonia o lana tofiga fou mo se tasi e sui tulaga i le afioga a Fanene Morris Scanlan ua malolo litaea.

O le vaiaso na te’a nei na pasia ai e le maota maualuga sa latou i’ugafono, e talosagaina ai le ali’i kovana, ina ia aveese le susuga a Thompson mai le toe avea ma totino o le komiti fa’afoe o le litaea a le malo.

O lea fa’aiuga mai le maota maualuga, na fa’avae lea i luga o suesuega sa faia e le maota, lea na fa’amaonia ai, e le o Thompson o se totino o le teugatupe a le litaea i le taimi na tofia ai o ia e le kovana ma fa’amaonia e le Fono Faitulafono, e avea ma toino o le komiti fa’afoe a le litaea, i lalo o le talitonuga, o ia o se totino o le teugatupe a le litaea.

Na taua e le maota maualuga i le latou iugafono sa pasia i le vaiaso na te’a nei, o le faia e Thompson o lea gaioiga, ua atagia mai ai le le fa’amaoni o le molimau sa ia tu’uina mai i luma o le fono faitulafono a le atunu’u.

O le vaiaso na te’a nei na faamaonia ai e le Fono Faitulafono le susuga a Tony Tagoa’i e avea ma totino fou o le Komiti Fa’afoe o le litaea, e sui tulaga ia Fanene ua malolo litaea.