Ads by Google Ads by Google

Faati’eti’e e leoleo se ulugalii i le van uliuli

Na sese le nofoaga na faai’u i ai le faamanatuina o le aso 4 o Iulai a le isi ulugali’i, ina ua feala a’e i le la onana sa i ai o loo momoe i le potu e sima ona puipui ae u’amea le faitoto’a, o le falepuipui lea i Tafuna, ina ua ripoti e aiga tuai i leoleo le maoa’e o le auala na faamanatu ai le la aso fiafia.

O le fiafia a le ulugalii sa faia lea i le la fale peitai ina ua fefiloi upu lelei ma upu leaga, soso’o atu ai loa ma le la fusuaga ina ua ova le onana, na mafua ai loa ona fautuaina i laua e nisi o aiga tuai e tuutuu le pisa i lalo e le na o laua se lalolagi, peitai sa atili ai ona faaali le fiafia o si ulugalii e faamanatu le aso 4 o Iulai.

Na fo’i fiafia uma tagata Amerika sa faamanatuina le aso 4 o Iulai ma momoe i o latou aiga, e oo foi i tagata o le atunuu sa fai a latou tafaoga, BBQ ma isi lava fiafia, sa toe foi filemu uma i o latou fale ma malolo lelei ai, ae faati’eti’e e leoleo le ulugalii i le van uliuli ma momoli i le falepuipui e faamomoe ai, ma latou feiloai ai loa ma le alii faamasino i le taeao na sosoo ai.

E to’a 10 isi tagata na taofia faatasi ma le ulugalii i le toese i le po o le aso lea, ona o tuuaiga i le faamisa i aiga ma nofoaga faitele, ave taavale ona faapea ai ma le ona.

O nisi o i latou sa taofia o loo faanofovaavaaia peitai ua toe molia atu foi i isi moliaga fou, ae o isi o le uluai taimi lenei ua tuuaia ai i ni solitulafono.

Na teena e le ulugalii tuuaiga o le faatupu vevesi i nofoaga faitele e pei ona tuuaia ai i laua e le malo, ma ua tatala i tua le tamaloa e aunoa ma se tupe e totogi, ae o le fafine ua poloaina o ia na te totogiina le $200 ona faatoa mafai lea ona tatala o ia i tua, ona o lea ua maua i faamaumauga a le faamasinoga, o loo faanofovaavaaia o ia i le taimi lenei.

I faamaumauga a le faamasinoga na taua ai e faapea, e le faatasi ona fautuaina e aiga tuaoi le ulugalii e tuutuu i lalo le pisa peitai sa atili ai ona pisa le ulugalii.

Sa toe fautuaina foi i laua e aiga tuaoi e soia le palalauvavale ma lafo upu mataga o lo faalogologo a latou fanau, peitai sa atili ai ona fai le misa a le ulugalii, ma lafo upu masoa i aiga tuaoi.

Na faailoa e aiga tuaoi i leoleo, e le o se taimi muamua lea ua misa ai le ulugalii lea, ae tai misa lava i vaiaso uma. Soo se taimi foi e misa ai e laulauvavale solo ai le isi i le tasi.

Ua poloaina e le faamasinoga le ulugalii ina ia aua nei o la toe tagofia le ava malosi poo ni fualaau faasaina i soo se taimi, faasa foi ona la toe taumafai e faafesootai aiga tuaoi ia na fautuaina i laua e soia le pisa.

Ua poloaina foi i laua ina ia tausi le filemu i le nofoaga o loo nonofo ai, aua nei o la toe soliina se tulafono, ma ia la fesootai vava lalata i le la loia fautua.