Ads by Google Ads by Google

Faatauto aloaia Kovana ma le Lutena Kovana fou

Na faalogoina i tulimanu e fa o le Malaeoletalu i le taeao ananafi le tau fai pati o aao o le atunuu, o le au valaaulia tainane taitai o le malo, ina ua maea le faatautoina o le tofa Lolo Matalagi Moliga ma le afioga ia Lemanu Peleti Mauga, e avea ma Kovana Sili ma le Lutena Kovana mo Amerika Samoa mo leisi fa tausaga.

E lei avea le toulu o uaga i le taeao ananafi e taofia ai le faamalo’ulo’u atu o le mamalu o le atunuu faapea le au valaaulia, mo le molimauina o lenei faamoemoe taua o Tutuila ma Manu’a.

I le aotelega o le feau faaleagaga na saunoa i ai le Taitai Fono o le Ekalesia EFKAS i Amerika Samoa, susuga ia Rev. Faataape Lavata’i, faapea ai ma le tatalo faamanuia na saunia e le susuga Bishop John Quinn Weitzel. M.M, o le taitai o le Ekalesia Katoliko i Amerika Samoa, na autu uma ai i le agaga e tasi, “Afai e faavae i le Atua le nofoaiga fou a Amerika Samoa, o le a le pine ona avea ma nofoaiga fiafia ma manuia mo tagata uma.”

O le afioga i le Ao mamalu o le malo o Samoa, le afioga i le Tui Atua Tupua Tamasese Efi, ma le afioga i le alii Palemia, susuga Tuilaepa Lupesoliai Sailele Malielegaoi na fai ma sui o le malo o Samoa, e auai i le molimauina o lenei faamoemoe taua.

Ina ua maea le faatautoina o taitai fou o le malo, e le alii faamasino sili ia Lealaialoa Michael Kruse, na sosoo ai ma le faaeeina  o aao o susuga i Faifeau o Ekalesia eseese, faapea ai ma tofa i Tamamatua, e fai ai i latou ma sui o taitai faaleaganuu.

I lana ulua’i saunoaga faa kovana sili o le malo, na muai faafetaia ai e Lolo le Ao o le malo o Samoa ma le Palemia, i lo la talia leleia o le faatalauula atu ina ia faatasi mai e molimauina lo la aso fiafia ma Lemanu.

Na talosagaina e Lolo le atunuu atoa, ina ia faate’a ni fatia ua sola e ala i faiga palota, ae o mai latou te galulue faatasi e saili se manuia o Amerika Samoa.  “Afai o lou outou finagalo ina ia tulai mai se faigamalo mo ni suiga fou, e faapena foi lo ma lagona ma Lemanu”.

“A ia silafia e le atunuu, soo se suiga fou lava e o mai faatasi ma faigata, soo se suiga foi e i ai tagata o le a le fiafia i ai, ae mafua ona fai suiga i soo se taimi ma soo se atunuu, ina ia soifua manuia le toatele o le atunuu,” o le saunoaga lea a Lolo.

Na faafetaia e le alii kovana le atunuu atoa e tusa ai o le tofa sasaa ua mafua ai ona avea i laua ma Lemanu ma taitai.  “Amerika Samoa, o lau pule lea, a lea ua ou sapaia faatuaeleele, e fai ai a’u e fai ma o ma sui ma Lemanu e fai ma a outou auauna mo le isi 4 tausaga.”

Sa faafetaia foi e Lolo le afioga i le matua ia Togiola Tulafono ma le faletua ia Mary Ann, aemaise ai o le afioga a Faoa Aitofele Sunia ma le faletua ia Elisapeta, ona o le avanoa sa latou tauaveina ai tofiga o le malo.

Na faaiu le saunoaga a Lolo i lona tauaaoina o le foai tupe e $15,000 mo le malo o Samoa, e fai ai o ia ma sui o le Koluse Mumu, e fesoasoani atu ai i tagata ma aiga sa pagatia i le afa o Evan na faatoa maea atu nei i Samoa.

O le maea ai o le saunoaga a le alii kovana ia Lolo, na tulei saunoa ai loa le afioga i le alii Palemia mo le saunoaga autu o le aso.

I lana saunoaga, sa ia faaamuia mai ai ia Amerika Samoa, i lo tatou fai paaga pea ma le malo tele o Amerika, o le malo e pito sili ona malosi ma tamaoaiga i le lalolagi, i lalo o le taitaiga a le alii peresetene o Barack Obama.

Na toe faatepa e Tuilaepa ni isi o mataupu taua sa latou galulue faatasi ai ma Togiola ao tulai mai i le taitaiga o le malo, ma ua i ai lona talitonuga o le a faaauau foi e le faigamalo fou lea galulue faatasi, mo mataupu e manuia ai atumotu o le Pasefika e aofia ai Samoanalua.

Sa ia faamanuia i le nofoaiga fou a Lolo ma Lemanu, ma ia faafetaia le atunuu e tusa ai o le alofa tula’i, amata mai lava i le uluai taimi na taunuu atu ai fesoasoani o taumafa, lavalava, vai ma tupe seia oo mai i le foai tupe e pei ona tauaao atu e le alii kovana.

Fai mai Tuilapea, e amuia lava Amerika Samoa e tua i le vao ola, ae o le itu e lelei ai, afai e manuia Amerika Samoa, o le a manuia atu ai foi ma Samoa.

O le afioga Lemanu na saunoa e faafetaia le au valaaulia na mafai ona tali atu i le valaaulia, faapea ai le atunuu atoa i lo latou talaaao atu e molimauina lo la aso fiafia ma Lolo.

O le maea ai o saunoaga faapitoa o le aso, na aloaia ai loa le tulai ese o le afioga i le matua ia Togiola ma le nofoa o le kovana, ae seei atu loa le tofa Lolo na te tauaveina, ma faaiu ai loa i le ‘ava na tapena i ai itumalo o Fofo ma Alataua, ae faaiu i faafiafiaga ma le taumafaga na tapena e le komiti.