Faafetaia kovana ia komiti sa faafoeina Sisiga Fu’a 2013

Ua faalauiloa e le faigamalo a Lolo ma Lemanu e faapea, o le Sisiga Fu’a o le 2014 o le a ave ai le faamuamua i Pisinisi uma o le atunuu, ona o le galuega fita ma le ma’a o lo o latou togi i le tau atina’eina o le tamaoaiga o le malo mai le tele o tausaga.

O lea mataupu na faalauiloa e le afioga i le kovana sili ia Lolo Matalasi Moliga i le fono a le kapeneta sa faia i le vaiaso na te’a nei.

Saunoa le alii kovana e faapea, mai le tele o tausaga, e le’i i ai lava se taimi ua faafetaia ai e le malo le aufai pisinisi i le latou pito laau o lo o faia i le unaia o le tamaoaiga o le atunuu, e ala i le aumaia o galuega mo tagatanuu atoa ai ma tupe o lo o maua mai i lafoga o lo o totogi i le malo.

“O le tele o tupe mai lafoga o lo o maua e le malo i le taimi nei, e mafua mai ona o lafoga a pisinisi atoa ai ma lafoga a tagata faigaluega o lo o galulue i pisinisi, o le ma talitonuga la ma Lemanu, o le isi sisigafu’a o lo o soso’o nei, o le a ave ai le faataua i a tatou pisinisi uma ma i latou o lo o faatautaia, ina ia o latou lagona ai le taua o le latou galuega o lo o faia mo le malo,” o le saunoaga lea a le alii kovana.

“Ua oo i le taimi ua tatau ai ona tatou faafetaia le latou pito laau ma le latou fesoasoani sili o lo o faia mo le malo, aua ana leai la latou tautua faapenei tatou te le ausia le tulaga manuia ma le maualuga ua tatou i ai,” o le isi lea finagalo o le alii kovana.

E le gata i le agaga faafetai e tatau i le malo ona tuuina atu i le aufai pisinisi, ae tatau foi ona faaauau ona tuu atu e le malo lana lagolago i pisinisi a le atunuu, e le gata ia manuia ai pea a latou taumafaiga mo le lumana’i, a ia maua ai pea tupe mo le malo ma avanoa faigaluega mo tagata taitoatasi.

Na taua e Lolo le telegese o le tupu o galuega fou i totonu o le malo i le taimi nei, ona o tulaga pagatia o lo o feagai ma le malo i le itu tau tupe, peitai o lona faanaunauga o lo o i ai, o le a mafai ona maua se isi fesoasoani mo le atunuu pe afai ae tatala galuega fou mai le kamupani i’a a le Tri Marine lea o lo o fuafua e tatala i le faaiuga o le tausaga nei po o le amataga foi o le tausaga fou.

I le talanoa ai o le alii kovana e faatatau i polokalama o le fu’a mo le tausaga fou, sa ia faafetaia ai le galuega fita sa gafa ma le komiti o le sisigafu’a ua mavae atu, aemaise lava i faatonusili uma sa gafa ma le faatinoina o le galuega.

E ui o le ulua’i sisigafu’a lea mo le alii kovama ma le lutena kovana, faapea ai le toatele o i latou ua filifilia e fai ma faatonusili ma ni isi o tagata faigaluega a le malo e fou mai, ae na taua e Lolo le to o la pulou ma Lemanu ia i latou uma sa tofu sao i le faatinoina o lenei faamoemoe, ona o le tulaga manaia sa i ai tapenaga o le fu’a.

Fai mai Lolo, e leai lava se isi o i latou na malamalama i le faapolokalameina o se sisigafu’a, peitai o gaioiga sa faia i lea aso na vaaia ai le lava saunia o le aufaigaluega mo le galuega.

Na faamalulu le alii kovana i lana kapeneta, ona o ni isi o taimi e tetele atu ai a la faaupuga ma tala ma Lemanu i ni isi o i latou, ona o le naunau ia lelei ma maopoopo mea uma, ae o le itu sa sili ona faafiafiaina ai i latou, e tiga lava ona la tetele atu ae tali mai lava i le faaaloalo ma uiga tauagafau.

“E fai maua ma Lemanu ma sui o le atunuu atoa, i matua ma fanau e momoli atu ai le agaga faafetai ia te outou uma sa galulue i komiti taitasi mo lenei faamoemoe, ua i’u manuia le sisigafu’a o lenei tausaga, e le o se aso sa faia mo maua poo tatou, ae o le aso sa faapitoa mo le atunuu o lo o tatou tautua i ai, ae i ai lo ma talitonuga o le a sili atu tapenaga o le isi sisigafu’a o lo o lumana’i,” o le saunoaga lea a le alii kovana.