E SILI AI ONA TAOFI ASIASIGA A AIGA

O le fesili pe fa'apefea ona sao atu fuala'au fa'asaina i totonu o le to'ese i Tafuna, e le o mafai ona maua i ai se tali i le taimi nei, ae ua avea fo'i o se mata'upu ua pasi ai finagalo o le Fono.

Na ta'ua e le tama'ita'i Senatoa ia Fonoti Tafa'ifa Aufata e fa'apea, e tasi lava le 'auala lea na te iloa e ono mafai ona sao atu ai mea nei i totonu o le falepuipui, o taimi o asiasiga a aiga o pagota i fa'ai'uga o vaiaso.

Ona la o lea mafua'aga e pei ona saunoa le tama'ita'i Senatoa, sa ia fautuaina ai loa le tatau lea ona taofi asiasiga i le falepuipui, ae le o lena fo'i, ia fa'aaoga lelei ni masini po o ni ta’ifau ua a'oa'oina lelei e sa'ili ai tagata uma o lo o ulufale atu i totonu ina ia mautinoa e le sao masalosaloga e pei ona tula'i mai.

E le'i nofo lelei i le finagalo o Fonoti ripoti fai mai o le fa'aletonu o le si'osi'omaga o lo o i ai le to'ese, o se tasi lea o 'auala e ono masalomia o lo o sao atu ai fuala'au fa'asaina i totonu, ona e mafai lava ona alu atu se tasi ma tau'ai atu ni mea i totonu o le pa, ona o ane lea o pagota ua piki ma 'ave i latou potu.

Saunoa Fonoti, o tiute lena o leoleo o le to'ese ia mautinoa e malu puipuia tulimanu uma o le falepuipui ina ia aua lava nei sao atu i ai se mea fa'aletonu.

E o gatasi le finagalo o Senatoa Fonoti ma le finagalo o le ali'i fa'amasino sili ia Michael Kruse i le tele o taimi e iloiloina ai e le fa'amasinoga mata'upu e uiga i fuala'au fa'asaina ma le sao atu i totonu o le to'ese.

Saunoa Kruse, e tatau ona i ai ni tulafono e mulimulita’i i ai le pulega a le to'ese mo le mata'ituina o asiasiga o lo o aga'i atu i le falepuipui, ona o le isi lea 'auala e masalomia o lo o sao atu ai i totonu o le falepuipui fuala'au fa'asaina.

I se molimau a le Sui Komesina o Leoleo i le masina na te'a nei i luma o le Senate, sa ia ta'ua ai e fa'apea, o ni isi o 'auala e mafai ona sao atu ai mea nei i le falepuipui, o le fa'aaogaina lea e ni isi o le pa e tau'ai atu ai ni mea i totonu.

Sa tautino fo'i le tofa ia Lesei'au Laumoli i luma o le Senate e fa'apea, ua fa'atamala leoleo o le falepuipui i le fa'atinoina o latou tiute, lea ua mafua ai loa ona taunu'u fa'afitauli e pei ona tula'i mai.

Saunoa le ali'i Senatoa o Mauga Tasi Asuega e fa'apea, pau le 'auala e mafai ai ona fo'ia fa'afitauli ia o lo o tula'i mai i le to'ese, o le fausia o se isi falepuipui fou e aofia ai se pa fou e si'omia ai le lotoa atoa, ina ia le mafai ai ona toe sao ni gaoioiga e afua atu i fafo o le lotoa o le to;ese.

Ae na saunoa Paogofie e fa'apea, afai e fa'afo'i uma pagota mai isi atunu'u o lo o loka i Tafuna i o latou atunu'u, ona talafeagai ai loa lea i le to'atele o leoleo o le to'ese ona fa'atino a latou tiute i le va'ava'aia lea o pagota o lo o tuli a latou fa'asalaga i Tafuna.