Ads by Google Ads by Google

FAASOSOLA I APIA TAMAITAI NA FAIA I AI UIGA MATAGA

O loo tau saili e le Ofisa o le  Loia Sili i le taimi nei pe na faapefea ona sosola tamaitai e toalua ia sa faia faasaga i ai uiga mataga e le to’alua o le la aunty, e pei ona manino i faamaumauga ua i luma o le faamasinioga maualuga i le vaiaso nei.

O le mataupu na alia’e mai i le mataupu o loo tuuaia ai se tama e silia ma le 50 tausaga lona matua mai Manu’a, o ia lea o Tau Malae, ona o gaioiga mataga sa ia faia i ni tamaitai se toalua e aiga i lona toalua, sa la aumai ma faanonofo i lo la aiga.

O Malae o loo tuuaia i moliaga e lua o le faia o uiga faasotoma, lua moliaga o le tagofia o itutinosa o ni tamaitai, lua moliaga o le faia o uiga mataga faafeusuaiga, atoa ai ma lona faiaiga lea i se teineititi e laititi i lalo o le tulafono.

O le vaiaso fou sa faatulaga e faia ai le faamasinoga autu o le alii o loo tuuaia i lenei mataupu, peitai ina ua taumafai le ofisa o le loia sili e faafesootai tamaitai na aafia mo a laua molimau, na iloa ai ua maea ona faasosola i laua i Samoa, o le mafuaaga lena na faila ai loa e le loia a le malo o Mitzie Folau se talosaga i le faamasinoga, mo se avanoa e toe tolopo ai le faamasinoga autu a Malae, ae sei taumafai ni auala e aumai ai tamaitai na aafia i le teritori nei e molimau i lona faamasinoga.

O le aso 22 o Me na mafai ai ona maua tamaitai nei e toalua i Samoa o loo aumau ai i laua.

Na taua e Folau i lana talosaga, o loo faaauau pea suesuega a le malo pe na faapefea ona oo tamaitai nei e toalua i Samoa, ae o loo taofia e le malo a laua tusi folau.

Sa ia taua foi le ono i ai o se avanoa e mafai ai ona faila e le malo moliaga faaopoopo faasaga ia i latou o loo aafia i lenei mataupu, pe afai ae maea suesuega o loo faagasolo i le taimi nei.

E lei faatuiese le loia o loo tulai mo Malae o Fiti Sunia i le talosaga a le malo, ma ua talia lelei foi e le faamasinoga le talosaga, ma toe faatulaga ai loa le aso 11 Setema e toe valaauina ai le mataupu a Malae, ma faataunuu ai loa lana faamasinoga autu.

O le ogatotonu o le tausaga na tea nei na alie’a mai ai lenei mataupu ma tofu atu ai i le ofisa o leoleo, ina ua faila e se tagata e aiga i tamaitai e toalua na aafia se ripoti i le ofisa o leoleo. O tamaitai e toalua na aafia e tai 16 tausaga lo la matutua e pei ona taua i faamaumauga a le faamasinoga.

Fai mai le malo, o tamaitai e toalua na aafia na faatoa taunuu mai i le teritori i le ogatotonu o le 2011, ae o le masina o Oketopa na alia’e mai ai lenei mataupu ina ua alu Malae i totonu o le potu o loo momoe ai tamaitai e toalua, ma taumafai e faamalosi le isi o i laua la te faiaiga peitai sa musu o ia.

Fai mai le malo, na taumafai le ua molia e tagofia itutinosa o le isi tamaitai na aafia peitai sa mafai ona ia sosola ese mai ai, ae o le isi tamaitai na aafia o ia i gaioiga a le ua molia, i le po muamua lava na faatoa taunuu atu ai i le aiga o Malae i Ofu e pei ona taua i faamaumauga a le faamasinoga.

Fai mai le malo, ao moe le na aafia i le potu, na ala i luga ina ua tago tago atu le ua molia ia te ia i ni auala e faamalie ai lona tuinanau, ae o le po lona lua na faamalosi ai loa e le ua molia le tamaitai lea, e pei ona tuuaia e le malo.

Fai mai le malo, e lei mafai e le tamaitai lea ona faitau pe faafia ona fai e le ua molia uiga mataga nei ia te ia, na te le iloaina foi pe na faafia ona faamalosi o ia e le ua molia la te faiaiga.

Na faailoa e le isi tamaitai na aafia i leoleo, sa faafefe e le ua molia o ia i lona fasiina lea o ia ma toe faafoi i Upolu, pe afai na te faailoaina i se isi le mea o loo tupu, ae i le aso 22 Tesema i se talanoaga a le aiga sa faia ai, na faatoese ai le ua molia i lona aiga e tusa ai o le mea sa ia faia.

Na taua foi le faatonu e le toalua o le ua molia o tamaitai na aafia ia aua lava nei o la faailoaina i se isi le mea sa tupu poo ni leoleo foi, aua afai la te faailoaina i nisi le mea sa tupu, o le a ia sasaina i laua.

Na faailoa e le aunty o tamaitai na aafia i leoleo, sa ia iloaina lava gaioiga sa faia e lona toalua i ona nieces ia e toalua na aafia, sa ia faatonuina foi i laua e aua nei o la faailoaina i se isi le mea o loo tupu, ina nei ona sasaina i laua.

O le afioga i le alii faamasino lagolago ia Lyle L. Richmond sa faatautaia lenei mataupu, i le lagolagosua a le afioga i le alii faamasino ia Mamea Sala Jr.

O loo tumau pea poloaiga o loo tatala ai Malae i tua mai le toese, ina ua ia totogiina le tupe e $50,000 na faatulaga e le faamasinoga e tatala ai o ia.