Ads by Google Ads by Google

Faasea pagota i le teena soo o a latou talosaga

O le toatele o pagota na teena e le Komiti o le Palola a latou talosaga, na alia’e ai se faasea a ni alii pagota o lo o tuli a la faasalaga i le toese i Tafuna, tauala mai i se tusi na faaoo mai i le Samoa News, na tusia e alii pagota o Sebastian Igafo ma Michael Agasiva.

O faasea a nei alii pagota o lo o faatautau i le aofia o le faletua ia Ipu Avegalio Lefiti i totonu o le Komiti o le Palola, ae o lo o avea o ia ma tagata faigaluega a le malo.

Fai mai Igafo ma Agasiva, o le tofia e le kovana sili o Lefiti e avea ma totino o lea Komiti, e le gata e sese ae ua soli ai le vaega o le Tulafono Toe Teuteu a Amerika Samoa, 46.2701, lea e le tatau ai ona tofia e le kovana se tasi i totonu o le komiti, pe afai o lea tagata o se tagata faigaluega a le malo.

“Faamolemole lau afioga i le kovana sili, fai le mea sa’o ma ia toe fai se isi au tofiga mo se isi sui e sui tulaga ia Lefiti, faatasi ai ma sau poloaiga i le taitaifono o le Komiti a le Palola e toe iloilo la latou faaiuga i talosaga e 9 ia sa latou teena i le taimi a’o i ai Lefiti,” o se vaega lea o le tusi a alii pagota.

Fai mai alii pagota, o pagota ia na teena a latou talosaga, e agavaa i lalo i le toe faia o ni isi a latou iloiloga i luma o le Komiti.

Ae peitai, na fa’aalia e Lefiti, “Ou te le o toe galue i le Falema’i o le LBJ, na ou litaea lava i le 2010, ae se’i vagana ua latou mana’omia a’u i se mataupu taua lava, ona faatoa ofo atu lea i ai o la’u fesoasoani,” o le saunaoga lea a Lefiti.

O le taimi nei, ua galue nei Lefiti i le Ofisa o le alii faipule i le Konekeresi i Uosigitone, i lalo o se polokalama feterale, e fesoasoani ai i fitafita litaea o le taua, faapea ai ma mataupu e tete’e atu ai i sauaga i totonu o aiga.

E toalima sui o le Komiti a le Palola o lo o i ai i le taimi nei, faatasi ma Lefiti, i lalo o le taitaiga a le susuga Rev. Ned Ripley o le taitaifono.

Na taua e Lefiti e faapea, e le faigofie ona faia sa latou fa’ai’uga i talosaga a pagota, ona

o taimi uma lava e iloilo ai e le komiti talosaga a pagota, e le faigofie ai ona faia sa latou ona e tele itu e tatau ona latou vaavaai toto’a i ai.

“E le faapea a tuu atu loa le talosaga i luma o le Komiti ona manatu loa lea o pagota o le a otomeki lava ona talia, e leai, e i ai fo’i la matou vaega e fai ina ia mautinoa ai e faamalieina itu uma e lua, e le gata o le itu a le alii pagota, ae o le itu fo’i a i latou na aafia i le solitulafono a le alii pagota,” o le saunoaga lea a Lefiti.  “Mo se faataitaiga, e tatau ona matua iloilo toto’a lelei e le Komiti pe saogalemu le atunuu lautele poo i latou foi sa aafia i le solitulafono a le pagota, pe afai ae toe tatala atu o ia i tua, aua o le toatele o tagata, e lagona lo latou fefe pe afai e vave tatala i tua se pagota ae le’i leva ona loka i lana solitulafono”.

“E le o pagota uma e tatau ona iloilo, ae i ai lava i latou o lo o faa falepuipui i mataupu ogaoga e tatau ona iloilo faalelei e le komiti a latou talsoaga,” o Lefiti lea.

O le aso 29 o le masina nei lea ua faamoemoe e faia ai le isi fonotaga a le Komiti, mo le iloiloina o isi talosaga o le a tuuina atu.