A’o faagasolo le iloiloga a le Komiti o le Faagaioiga o le malo a le Senate i le taeao ananafi, e pei ona fesiligia ai le mataupu e faatatau i tupe sa totogi atu (payout) i Faatonusili ma ni isi i le nofoaiga ua mavae atu a le malo, sa maua ai le avanoa e saunoa ai ni isi o Senatoa mo le faamaninoina o ni isi o faamatalaga.

Na faamanino e le afioga i le alii senatoa ia Magalei Logovi’i, lea sa avea ma teutupe a le malo i le nofoaiga ua mavae atu, e le $1.4miliona le tupe na alu i le ‘payout’ a le malo e pei ona taua i faamaumauga ua i luma o le komiti, ae na o le $779,000. I le ripoti o lo o taua ai, e $779,596.53 le tupe sa faaalu ina ua uma ona tipi ese lafoga ma isi tupe e moomia ona tipi ese.

Ae na faamanino e le alii senatoa ia Soliai Tuipine Fuimaono, lea sa avea ma Komesina o Palota i le nofoaiga ua mavae atu, e le $50,000 se tupe sa ia maua mai i le ‘payout’, ae na o le $30,000.

E toalua molimau na valaau e le komiti, peita’i e na o le toatasi le molimau na mafai ona auai, na o le alii loia a le Fono ia Henry Kappel, ae o le isi molimau, o le teutupe a le malo ia Falema’o Phil Ma’o ua faamoemoe e maua lona avanoa i le isi iloiloga lea e faia i le Aso Lulu o le vaiaso nei.

A’o lei amataina le iloiloga na faamanino e le taitai komiti ia Galea’i M. Tuufuli e faapea, e le o tete’e le komiti i tupe na totogi atu ai nei siaki, pau le agaga o le komiti, o le fia malamalama pe na talafeagai ma le tulafono le tuuina atu o siaki nei ia i latou sa faamanuiaina.

Na faamanino Kappel i luma o le komiti e faapea, o siaki o le payout sa faavae i luga o livi ma’i, livi tausaga ma itula sa faaopoopo e le kovana i ni isi o lana taupulega ua mavae atu.

O le toatele o senatoa sa latou fia malamalama pe agavaa le kovana, lutena kovana ma faatonusili sa tofia e le kovana i livi e pei ona taua i le ripoti, ae na faamanino e Kappel e faapea, talu ai eseese uma ituaiga tagata faigaluega a le malo, lona uiga e i ai tagata e agavaa i livi ae i ai foi tagata e le agavaa i livi.

O faatonusili sa tofia e le kovana e le agavaa i ni livi, ae o lo o i ai le malosi i le kovana na te tuuina atu ai ni itula faaopoopo mo i latou nei e tusa ai o galuega sa latou faia, peitai e tatau ona faamaumauina i lalo itula nei, ae le faapea e otomeki lava ona maua i le taimi mulimuli o le tautua a le tagata faigaluega.

Na faamanino e Soliai i luma o le komiti e faapea, o lo o manino le vaega 7.1004 o le Tulafono Toe Teuteu a Amerika Samoa, o lo o i ai le malosi i le kovana na te tuuina atu ai itula faaopoopo i ana faatonusili sa tofia, peitai na faamanino e Galea’i e faapea, e tuu atu e le kovana i lona malosi itula faaopoopo i ana faatonu sa tofia  ina ia livi ai ae totogi, ae le faapea faatoa totogi i le taimi mulimuli e maea ai le tautua.

Na taua e ni isi o senatoa lo latou maofa tele i le tetele o nei tupe sa maua e sui o le nofoaiga ua mavae atu, ae o lea e pagatia le atunuu i le itu tau tupe.

Saunoa Tuiasina S. Esera e faapea, o le $1.4miliona lea na totogi ai payout a i latou nei, e le o se tupe laititi, ae o lea foi ua manino i le molimau a le Faatonu o le Paketi, e na o le $600,000 le tupe na pasia i le paketi e totogi ai payout, lona uiga ua soli le tulafono ona ua ova atu le tupe na faaalu nai lo le tupe na pasia i le paketi.

Na fautuaina e Tuiasina afioga i senatoa ina ia silasila totoa i le mataupu lenei, leaga e le o se mataupu e faigofie.

RIPOTI O LE ‘PAYOUT’

I le ripoti o le ‘payout’ ua tauaao e le komiti a le Senate, o lo o taua ai le silia i le to’a 60 tagata faigaluega a le malo sa maua a latou siaki o le ‘payout’, ma le to’a 6 o lo o faatali le taimi e maua ai a latou siaki.

E silia i le $897,000 le aofai o le tupe na alu i siaki o payout mo le silia i le toa 60 sa maua siaki, ma le silia i le $109,000 e alu i siaki a i latou e to’a 6 e le’i maua.

O le siaki pito tele mo i latou e lei maua a latou siaki o payout, o le alii sa avea ma Su’etusi a le Teritori, le susuga ia Robert Dantini lea sa galue faakonekarate, i le aofa’i e $48,000

O ni isi sa maua siaki o le ‘payout’ e aofia ai le sa avea ma kovana ma le lutena kovana ia Togiola Tulafono ma Faoa Aitofele Sunia, faapea i latou sa avea ma Faatonusili, ma isi tagata sa galulue i lalo o konekarate a le malo.

E $39,406 le aofai o le siaki a Togiola na foi ma ia i lona aiga, i le maea ai ona tipi ese o lafoga ma isi vaega tupe e tatau ona tipi mai lana siaki e $43,000 sa maua, ae mo Faoa, e $34,812 lana siaki na fo’i ma ia i lona aiga, ina ua maea ona tipi ese vaega tupe e tatau ona tipi mai lana siaki sa maua e $39,789.

O le toatele o tagata sa maua a latou siaki o le payout, o tagata faigaluega i le ofisa o le kovana, lea e $424,805.26 le aofai o le tupe na alu ai, ona o le toatele o i latou sa galulue faakonekarate.

Mai le silia i le toa 60 sa maua siaki, e na o le toa 12 i latou sa mafai ona maua a latou itula faaopoopo (comp time), o le to’a 11 o i latou e i lalo ifo o le ta’i 300 itula sa maua, sei vagana ai Soliai e 1,096 le aofai o ana itula sa maua.

E silia i le $50,000 le siaki a Soliai sa maua, peitai na saunoa le alii senatoa i le taimi o le iloiloga ananafi, e na o le $30,000 lana siaki sa maua.

O Faatonusili e silia i le ta’i $20,000 a latou siaki sa maua e aofia ai Magalei i le aofaiga e $23,838; Tuaolo M. Fruean e $21,342 ma Dr. Toafa Vaiagae e $20,279.

O faatonusili e silia i le ta’i $10,000 a latou siaki sa maua e aofia ai Matagi Ray McMoore e $19,005; Fepuleai A. Ripley e $19,555; Semo Ve’ave’a Jr e $18,951; Taeaotui Punaofo Tilei e $17,592; Ufagafa Ray Tulafono e $17,387; Paolo Sivia Sivia e $14,367; Leiataua Leuga Turner e $13,452; Reupena Tagaloa e $14,695; Pese Aitulagi e $19,358 ma Michael Sala e $12,678.

O Faatonusili e i lalo mai o le $10,000 a latou siaki sa maua e aofia ai Faafetai Ialiva e $8,669; Uta Dr. Laloulu Tagoilelagi e $8,001; Ivy Taufaasau e $6,772 ma Lealao Melila Purcell e $3,505.