Ads by Google Ads by Google

Faapopoleina le atunuu i le faaiuga a le BOH

Ua fa’aalia e ni isi o tagata o lo o faia a latou nonogatupe ma teugatupe i le lala o le Faletupe o Hawai, o le faaiuga ua faia e le pulega a le Faletupe e tapunia ai lona lala i Amerika Samoa nei, o se vaaiga pagatia ma ootia mo tagata e vaivai le tamaoaiga o lo o latou mauaina.

“Afai nei o le a tapuni le lala o le faletupe a Hawaii, o fea o le a tua i ai matou nei o tagata lima vaivai,” o le saunoaga lea a Liu Asiata o Tafuna, o se tasi o paaga masani a le faletupe i nonogatupe laiti mo le tele o tausaga.

Na taua e Asiata e faapea, “O le faletupe lava lenei sa fai ma faletupe ou te teutupe ma ou nono tupe mai ai ina ua amata ona ou faigaluega i le 1996 seia oo mai i le taimi nei, ou te tua i ai mo ni a’u nonogatupe i taimi o faalavelave tetele a lo’u aiga aua e le malosi le tamaoaiga ou te maua, ae afai o le a tapunia nei, ua ou le iloa poo fea o le a ou toe sulu i ai mo ni nonogatupe.”

O le lagona foi lea na faailoa mai e le tina o Mareta Unutoa i le Samoa News, o se tina e fai ana tama’i pasi la’upasese e lua i le atunuu.

Na taua e Unutoa e faapea, ua tele tausaga o avea le faletupe o Hawaii ma faletupe e fai ai ana nonogatupe, e le gata e maualalo le tupe totogi mo lana nonogatupe, ae lelei foi lo latou tautuaina o ia ma lona aiga i soo se taimi latou te manaomia ai se fesoasoani.

Na saunoa Unotoa e uiga i le faaiuga a le faletupe lea o le a tapunia ai i le tausaga fou, “O se lagona faanoanoa mo a’u ma le aiga, ou te iloa e faapena foi i le toatele o tagata.”

Fai mai Unotoa, o vaiaso uma lava e alu ai i le faletupe e teu tupe e maua mai i ana pasi, ae ina ua fesili poo fea lea ua manatu e teu ai ana tupe pe afai ae tapunia le faletupe o Hawaii, na ata le faletua ma faapea mai, “e sili ai loa le eli o se pu i tua o le fale ma teu ai.”

E to’a 4 isi tagata faigaluega e faia a latou teugatupe i le Faletupe o Hawaii na o latou faaalia le lagona lava lea e tasi.

Na taua e i latou nei i le Samoa News, o le faaiuga ua faia e le gata e pagatia ai paaga masani a le faletupe, aafia atu ai ma aiga o tagata faigaluega o le a le toe maua a latou galuega, ae sili le aafia atu ai o le malo ma lona tamaoaiga.

O le Aso Faraile na tea nei na tuuina mai ai se pepa o faamatalaga mai le pulega o le faletupe a Hawaii, e faailoa mai ai la latou faaiuga ua faia, i le tapunia lea o le latou lala i le teritori nei i le faaiuga o le kuata muamua o le tausaga 2013.

Na taua e le alii peresetene o le faletupe a Hawaii i le teritori nei ia Hobbs Lowson i le pepa o faamatalaga e faapea, i le 2000 sa faia ai se faaiuga a le faletupe ina ia avea ona lala i Hawaii ma Guam o nofoaga tutotonu ia e fai mai ai ana faaiuga, ae faaauau pea ona i ai sana tautua i Amerika Samoa nei, mo le tuuina atu lea o le tautua talafeagai mo tagata o le atunuu.

Ae i lea faanaunauga ina ia faaauau lana auaunaga i le teritori nei, na taua e Lowson le tulai mai pea o faafitauli i le taumafai lea e faatumau tulaga o auaunaga i Amerika Samoa nei, e mafua mai i le vava mamao ma isi ona lala i fafo.

Ua talosagaina e ni isi o le atunuu sa mafai ona fesiligia e le Samoa News le alii kovana, i se auala e mafai ai ona ia faia ni fesootaiga ma le pulega tutotonu o le faletupe i Hawaii, i se auala e faatuatuai ai le faataunuuina o lea faaiuga.

E tailtonu ni isi o le atunuu, o le fesoasoani a le alii kovana o le a mafai ai ona maua se isi faamama avega mo tagata lautele.