Ads by Google Ads by Google

Faapepele Hunkin sui Samoa faaaliga i So. Carolina

E ui ina mamao South Carolina, ae ua i ai se sui o Amerika Samoa, ia Fa’apepele Hunkin-Tajalle, na te fa’aalia la’ei Samoa i se faatasiga i lea setete.

 

O lea tama’ita’i Samoa o lo’o fa’aalia laei fa’a-tausala e sausaunoa ai i le fale mata’aga tele o le “Columbia Museum of Arts” i le fa’aaliga e taua o le “A Fair to Remember!” po’o le “Fa’aaliga Toe Fa’amanatu” o tu ma agaifanua o atunu’u eseese o le lalolagi.

 

O le fa’aaliga lea mo le fa’alauiloaga o galuega e fa’amanatu ai Charles Courtney Curran sa amata ia Mati 22, 2015. O le ulufale i lea fa’aaliga e $200 i le tagata e to’atasi.

 

O le Fa’atonu o le Columbia International Festival, Dr. Raj Aluri, sa ia filifilia Hunkin-Tajalle, mai tagata Samoa uma i Columbia, South Carolina e na te fa’aalia la’ei samoa moni i lea fa’aaliga tele.

 

I se tala mai a Hunkin-Tajalle, sa ia fa’ailoa ai, “Ua ou fa’afetai i le amana’ia o lo’u sui fa’atauva’a, ae i se va’aiga lautele, o se fa’aeaga i lo’u tagata fa’atauva’a, ma ua fesiligia fo’i, pe aisea lava? O le ola latou ia aoga mo tagata lautele, ae maise lava se sao mo le atunu’u e pele i le agaga, sa ou si’i a’e ai le fa’afetai mo lo’u avanoa matagofie e fa’aalia ai la’ei Samoa mo tausala e sausaunoa ai, i lea fa’aaliga tele i South Carolina, o lo’o matou o nonofo mau ai ma le fanau.”

 

E le na’o le pau lea o le avanoa fa’aauro ua maua e Hunkin-Tajalle e na te fa’aalia ai lona atunu’u. I le tausaga ua mavae, sa tofia ai o ia e saunoa fa’apitoa mo le Christian Fellowship Church i South Carolina. O iina sa matua iloga ai ona ola feso’ota’i le to’atele o tagata mai atunu’u eseese i lea Ekalesia ma tagata Samoa, e le o to’atele, o lo’o soifua ma alaala tumau i lea setete.

 

“Ou te lagona, o se tasi lea o mafuaga na ala ai ona o’o a’e le igoa o lenei sui vaivai i le lisi o e fa’aalia la’ei fa’asamoa moni i le Fa’aaliga Tele i Fale Mata’aga Lauiloa i lenei tausaga,” o se tala lea a Hunkin-Tajalle.

 

O Hunkin-Tajalle mai lona afio’aga o Nuuuli ma Pesega ma Vaiusu i Samoa, sa soifua a’e o ia i Nuuuli, ona tausia lea o ia ma nisi o ona tuagane e matua o si ona tina, Fa’apepele ma Leauma i Samoa. Peita’i na toe fa’afo’i mai o ia i Amerika Samoa ma amatalia ana a’oga i Manulele Elementary School ina ua alaala ma ona matua o Fuatau ma Miriama Hunkin.

 

Na fa’asolo atu ana a’oa’oga maualuga i Fa’asao High ma fa’au’u ai, aga’i atu i le Kolisi Tu’ufa’atasi Amerika Samoa ma maua ai lona AA, ae ulufale ai i le US Army i le 1994.

 

O atunu’u sa alaala ma tautua ai Hunkin-Tajalle e afua mai le amataga o lana tautua se’ia o’o ina litaea mai le Vaega Au, e aofia ai:  Fort Stewart, i Georgia; Fort Eustis, Virginia; Fort Sill, Oklahoma ma Fort Jackson, South Carolina.

 

O fa’ailoga sa ia mauaina i lana tautua lea e aofia ai: Iraq Campaign Medal ma 2 Campaign Stars; Meritorious Service Medal (2nd award); Army Commendation Medal (3rd Award); National Defense Service Medal with Bronze Service Star; Global War on Terrorism Service Medal; ma le Army Service Ribbon.

 

O lo’o fa’aauau nei ana a’oa’oga i le University of Management Technology i South Carolina o lo’o sailia ai lona fa’ailoga Masters in Health Care Management ina ua mae’a umia lona fa’ailoga Bachelor in Business Administration, aua ua mae’a litaea mai le US Army ia Oketopa 2013 ina ua atoa le 18 tausaga o lana tautua, ae ua maliu fo’i le sa la’ua mafuta o le tama o le aiga, Deanne Ignacio Tajalle, i se fa’alavelave a’o tiute i Iraq. E to’atolu o la’ua alo Nichole ‘Nikki’, Dean Jr. and Victoria Tajalle.

 

O le tama’ita’i o Lesili Lee, o se tasi o alo mai le afio’aga o Nuuuli, sa ia fesoasoani i le tapenaga o laei samoa o Hunkin-Tajalle. O le susuga ia Monty Tago sa ia saunia lona tuiga, ma si ona tina o Miriama sa ia tapenaina atu lona laei mai Nuuuli, ina ia matagofie lona sao mo Samoa atoa.