Ads by Google Ads by Google

Faaopoopo tagata faigaluega Vaega Tosovaa Satala

Ua i ai le fuafuaga a le Komiti Faafoe o le Vaega Tosova’a, o le a faaauau pea ona o latou faa faigaluegaina tagata mo le faatinoina o a latou galuega o lo o faapea ona faatupulaia i le taimi nei.

Na taua e le sui taitaifono o le komiti o David Robinson i luma o le Komiti o le Faagaioiga o le malo a le Senate i le vaiaso na te’a nei, o tagata faigaluega e toa 17 ia na vaea mai le kamupanu sa latou faatautaia muamua le Vaega Tosovaa o le MYD Samoa Ltd, ua maea ona o latou toe faa faigaluegaina i le taimi nei, ma ua o’o atu ai le aofai o a latou tagata faigaluega i le toa 42, ma le faamoemoe latou te manaomia nisi tagata se toa 10 e toe faaopoopo.

O le iloiloga lea na valaauina e le komiti a le Senate, sa fesiligia ai tulaga o femalagaaiga i Manu’a, atoa ai ma le tulaga ua i ai va’a a le malo ia o loo faatautaiga femalagaaiga i le va o Tutuila ma Manu’a e pei o le MV Sili, faapea ai ma le vaa o le Foisia lea sa faatautaia femalagaaiga i le va o Ofu ma Tau.

O le iloiloga na valaauina lea e le taitai komiti ia Velega Savali Jr, lea foi sa auai sui o le komiti e aofia ai Senatoa Galea’i Tuufuli, Mauga Tasi Asuega, Asuega Faamamata ma Avegalio P. Aigamaua.

Na taua e Robinson e faapea, ua toe foi atu nei le MV Sili mo ana malaga masani i Manu’a, ina ua faamalieina le vaega a le U.S Coast Guard i galuega sa moomia le toe faaleleia.

O le faafitauli o loo feagai pea ma le MV Sili, e le gata ua tuai le vaa ae i ai foi nisi o ona vaega e manaomia lava le siaki ma faaleleia i le tai tolu masina, ina ia mautinoa lona tulaga saogalemu.

Na taua e Robinson le maofa o sui o le Coast Guard i le tulaga sa i ai galuega o le vaa na faatautaia e le latou vaega, ma ua valoia ai, o se uluai taimi lea ua tulaga lelei ai galuega mo le vaa talu mai taimi na faaleleia ai i tausaga ua mavae.

O le konekarate e $82,000 na pasia mai e le Pulega o Uafu ma Taulaga mo le faaleleia o vaega sa moomia le toe fausia.

I le tulaga ua i ai le vaa o le Foisia, ua faamaonia le tele o se galuega e moomia le toe fai i ai, ina ua faaletonu ona afi e lua ma mafua ai loa ona sao i ai le vai.

Na taua e Robinson, na toeitiiti lava goto le Foisia ina ua toso agai mai i le uafu tele i Fagatogo agai atu i le Vaega Tosovaa i Satala e pei ona i ai i le taimi nei, e faatali ai se isi faatonuga mai le Pulega o Uafu ma Taulaga, pe o le a le isi laasaga lea o le a faia i le vaa.

E pei ona silafia, o le Foisia na faatau mai e le malo i se vaega o le tupe e $3 miliona na tuu atu mo le itumalo o Manu’a, ma le faamoemoe e tautuaina ai femalagaaiga i totonu lava o Manu’a, peitai na taua e Robinson i luma o le komiti, o le Foisia e le o se va’a la’upasese o le va’a fagota, ma e le talafeagai ona la’u ai ni tagata.

Na taua e le alii kovana ia Togiola Tulafono i le taimi na faatoa faatau mai ai le Foisia, o lona agaga maualuga, ia taofia le toe faaaogaina e tagata Manu’a o va’a alia e femalagaa’i ai i le va o Ofu ma Ta’u, ae faaaoga le Foisia e tele ma lelei.

Ae talu mai lava le taimi na faatau mai ai le va’a, e le’i umi lava ona fealua’i ae malolo loa, lea lava e oo mai lava i le taimi nei e le o toe aoga lava mo Manu’a, ae o lea foi ua faalauiloa e le alii kovana le isi ana fuafuaga, mo le faatuaina mai lea o se isi fo’i va’a la’upasese na te tautuaina femalagaaiga i totonu lava o Manu’a.

O le va’a lea ua valoia e Togiola e faatau mai mo Manu’a, i lalo o le vaavaaiga a le Mataglauega o Galuega a le malo, e 30 le pasese toe mafai ona ave ai ma uta.

I le tulaga i le paketi a le Vaega Tosovaa i le tausaga tupe lenei 2012, e $1.5 miliona le latou tupe maua, ae $1.4 miliona le latou tupe faaalu. O loo i ai le latou faamoemoega e ono siitia le latou paketi i le tausaga tupe fou ona o lea foi ua faaopoopo tagata faigaluega.

Na faaalia e sui o le komiti le faagaeetia o i latou i le tulaga lelei ma le mautu ua i ai gaioiga a le Vaega Tosovaa, talu ona latou faafoeina lenei tautua i le masina o Iuni o le tausaga na te’a nei.

Sa fautuaina e le afioga i le alii Senatoa ia Mauga le susuga Robinson, ina ia silasila toto’a i faasea a lona nuu o Satala, i le pefu mai a latou galuega o loo aafia ai i latou i le tele o taimi, peitai na taua e Robinson, ua maea ona o latou faafesootaiina le vaega a le ASEPA ina ia o latou molimauina a latou gaioiga, ma taofia ai le ono tulai mai o ni aafiaga i le soifua o tagata ma le siosiomaga.