Na fa’aalia e le Pulesili o le Pulega o le Eletise ma le Suavai a Amerika Samoa (ASPA) ia Utu Abe Malae i luma o le maota o sui i le taeao ananafi, lona fa’anoanoa tele i le tulaga fa’aletonu ua o o i ai le va’a a le malo, le MV Sili, ina ua tula’i mai fa’aletonu i le va’a ae lei taitai ausia le maliliega sa latou faia ma le Pulega o Uafu ma Malaeva’alele mo malaga e 10 i Manu’a i le tausaga lenei e la’u ai uta a le ASPA e fa’atino ai ana galuega i Manu’a.

Ona o lea fa’aletonu, sa faia ai loa ni feutanaiga i le va o Amerika Samoa ma Kamupani Va’a a Samoa mo se avanoa e malaga mai ai le Fotu-o-Samoa e fa’aauauina malaga mo Manu’a.

O le mataupu i femalagaaiga i Manu’a sa fesiligia e le afioga i le ali’i faipule mai Manu’a ia Vesi Talalelei Fautanu Jr, ma maua ai loa le avanoa o Utu e fa’aleo ai sona finagalo e uiga i lenei mataupu.

Saunoa Utu e fa’apea, e matua manaomia lava se fesoasoani mo le fa’aleleia o le tulaga tau femalagaaiga mo Manu’a, ae afai e fa’aauau ai pea i le tulaga o lo o i ai i le taimi nei, o le pulea lea e le malo o le va’a e fa’atino ai femalagaaiga, i lona talitonuga, tusa lava pe toe aumai se isi va’a fou e fealua’i i le va o Tutuila ma Manu’a, e tumau pea tulaga fa’aletonu i le va’a.

I lona talitonuga, ua tatau ona fai se suiga, ina ia sui le vaega latou te pulea tulaga tau femalagaaiga i Manu’a, aveese mai i le malo ae tu’u atu i se pisinisi, po o le ituaiga suiga e taua o le ‘Public Private Partnership’ (PPP).

“Tusa lava poo le malo e pulea le uafu ma isi mea totino uma lava o lo o i ai, i lo’u lava talitonuga, o le va’a e tatau ona fa’afoe e se tagata faipisinisi, se tagata e naunau e mulimulita’i i tulafono a le US Coast Guard, o se tagata foi e naunau ina ia maua se tupe fa’asili mo le fa’atautaiga o le va’a, ina ia mafai ai ona fa’aauau pea le fa’aleleia o vaega o le va’a e fa’aletonu mai”, o le saunoaga lea a Utu.

E tele vaega ua mafai ona fesoasoani atu i ai pisinisi ma vaega tupe i le taumafaiga o le va’a a le MV sili o lo o i ai nei, e pei ona saunoa Utu, ma o ni isi o ia fesoasoani e aofia ai le afi a le ASPA lea o lo o fa’aaoga e alu ai le va’a, ona ua fa’aletonu le isi ona afi.

Sa taua fo’i e Utu se fesoasoani ma le konekarate a le Fletcher Constructions sa mafai fo’i ona ofo atu mo le va’a ina ia fa’aauau ai pea ona lelei ma aoga mo femalagaaiga i Manu’a.

“O le mea lea ua ou maitauina, a fa’aletonu le va’a, e leai se gaioiga a le malo e faia i le tagata sa mafua ai ona leaga le va’a, pau le gaioiga a le malo e fai, o le tau saili mai lea o se tupe e toe fa’aleleia ai vaega ua fa’aletonu”, o le isi lea saunoaga a Utu.

Sa ia taua fo’i se latou fesootaiga ma le Pulega a le Uafu i se taimi ua te’a, lea sa fa’ailoa atu ai e fa’apea, e silia i le 2 tausaga e lei fa’aleleia lava e le malo vaega o le va’a sa fa’aletonu, ma, atonu o le isi lea mafua’aga o le fai ma leaga le va’a.

E oo mai i le taimi nei, e tele uta a le ASPA o lo o fia la’u mo Manu’a, peitai ua poloka uma ona o le fa’aletonu o le MV Sili.

I le tulaga o le Fotu-o-Samoa e $42,000 le tau sa mananao mai ai Samoa e totogi ai le va’a mo le malaga e tasi, ina ua silafia e Samoa ua toe fa’aletonu fo’i le MV Sili, e pei ona faamanino e Utu, ae o feutanaiga sa faia ma Samoa na mafai ai loa ona toe pau le totogi i le $24,000, ma ua fa’amoemoe o le vaiaso nei e malaga ai le Fotu-o-Samoa i Manu’a.