Ads by Google Ads by Google

Faanoanoa le kovana i le le auai o Faatonusili i faafiafiaga a le Arts Council

O le taeao ananafi na tuuina atu ai e le afioga i le kovana sili ia Lolo Matalasi Moliga sana tusi i Faatonusili uma ma Faauluuluga o Matagaluega ma Ofisa o le malo, e faailoa atu i ai lona le fiafia tele, ona o le le o atu e lagolago polokalame ma fuafuaga a le malo mo le fu’a o lenei tausaga, e pei ona amataina ai i faafiafiaga a le Arts Council i le po o le aso Gafua na te’a nei i le malae o le Suigaula o le Atuvasa.

 

Na taua e Lolo i lana tusi e faapea, i le fonotaga a le kapeneta na faatoa maea atu nei, sa ia faailoa atu ai i faatonusili uma le agaga o le galulue faatasi i totonu o le faigamalo, e ala i le vaai o le atunuu o lo o auai uma i soo se polokalame fai o le fu’a o lenei tausaga.

 

“Ae foliga mai o nei upu uma na tuu atu ia te outou o lo o pau i taliga o tagata tutuli e le lagona se mea, ona e le atoa se toalima o faatonusili na faatasi atu i le uluai aso o polokalame o le fu’a lea na faatautaia e le vaega a le Arts Council i Utulei,” o le saunoaga lea a le alii kovana.

 

Fai mai Lolo, ua uma ona tuuina atu le la faafetai ma le afioga i le alii lutena kovana ia Lemanu Mauga, i faatonusili uma na faatasi atu i faafiafiaga i le po o le aso Gafua na tea nei, e tusa ai o le latou lagolago atu.

 

O Faatonusili na mafai ona molimauina e le Samoa News sa auai i lea po e aofia ai le afioga a Satele Galu Satele; Le’i Sonny Thompson; Fagafaga Daniel Langkilde; Uta Dr. Laloulu Tagoilelagi, Lealao M. Purcell; Ameto Pato ma Pa’u Fuiavailiili Roy Ausage.

 

O le afioga ia Uta, o lona ofisa lea o lo o faatautaia polokalame o pesepesega o le fu’a ae o Fagafaga na fai ma fofoga o le polokalame i le po.

 

Na taua e Lolo e faapea, e le mafai ona talia e le atunuu le feau o lo o taumafai le faigamalo e momoli atu, pe afai e vaai mai le atunuu e solomua i le faigamalo ona le lagolago ma talitonu i mea o lo o latou fai atu ai, aemaise ai gaioiga e pei ona talosagaina ai i latou mo le faamatagofieina lea o vaega eseese o le atunuu.

 

“E leai lava se isi o tatou e le pisi,” o le saunoaga lea a Lolo, “ae o le auai i soo se faagaioiga o lo o lagolagoina e le faigamalo, e faailoa mai ai lou lagolago.”

 

“Atonu ua outou taumateina mai le leo o loo tusia ai la’u tusi, ae o iina e faailoa atu ai lo’u le fiafia tele i la outou lagolago e pei ona vaaia anapo (po o le aso Gafua na te’a nei), e le afaina ai lava le to’alima na faatasi atu ma faailoa la latou lagolago,” o le saunoaga lea a Lolo ma ia taua ai e faapea, talosia e le toe faaauauina lea mea i le po nanei (po anapo).

 

Fai mai Lolo, o lana saunoaga na tuuina atu i le fono a le kapeneta i le vaiaso na tea nei, o lo o tumau pea e oo mai i le taimi nei, i lona manao lea i faatonusili uma lava ina ia auai i soo se faagaioiga a le malo e faia mo aso o le fua ua faamanatuina nei.

 

Na faaiu le tusi a le alii kovana i lona faapea atu i faatonusili, o lo o i ai lona faanaunauga e fia vaai ia te i latou uma lava i le po mulimuli o lenei faamoemoe.