O le vaiaso nei lea na amata aloaia ai le fa’amasinoga autu a le ali’i o lo o tu’uaia i lona fa’afoeina o se ta’avale na maliu ai se Tama i le masina o Iuni, 2017.

O lo o tuuaia Folasa Galea’i i le moliaga mamafa e tasi o le ave ta’avale ua mafua ai ona oo le maliu i se isi tagata.

O lo o tumau pea le tatala i tua o Galea’i ina ua mae’a ona ia totogi le tupe e $2,500. O le ali’i loia fautua lagolago ia Rob McNeill o lo o tula’i mo ia, ae o le ali’i loia sili lagolago ia Doug Lowe faapea ai ma le tama’ita’i loia sili lagolago ia Laura Garvey o lo o fai ma sui o le malo.

E to’a 6 sui o le vaega iloilo iuga na tofia i le aso Gafua latou te iloiloina se fa’aiuga o lenei mataupu. O i latou ia e aofia ai ni tama’ita’i se to’a 5 faapea ai ma se ali’i se to’atasi.

O le afioga i le ali’i Fa’amasino Sili ia Michael Kruse o lo o fa’atautaia taualumaga o lenei mataupu, ae lagolagosua i ai afioga i ali’i Fa’amasino Lagolago ia Faamausili Pomele ma Tunupopo Alalafaga.

O lo o tu’uaia e le malo i le latou tagi e fa’apea, i le aoauli o le aso 9 o Iuni 2017, na tula’i mai ai se fa’alavelave i Fagaalu, i le vaega e latalata i le Faleaoga mo Fanau e i ai manaoga faapitoa i Matafao, ina ua so’a e se ta’avale se Tama pe tusa ma le 60 tausaga le matua ma maliu ai lava o ia.

Na taua e le malo e fa’apea, o le Tama ua maliu, sa paka le latou ta’avale ma lona to’alua ma fanau a lana fanau e to’alua i le itu taumatau o le auala.

I suesuega a Leoleo na taua ai e fa’apea, o le Tama ua maliu na oso i fafo ma lana ta’avale e siaki le tapuni o le vaega e utu ai le suauu o le ta’avale. Ina ua mae’a ona siaki vaega e pei ona moomia, ona tapuni lea e le Tama le tapuni o le afi o le ta’avale ae sauni loa e toe aga’i atu i totonu o le ta’avale mo le fa’aauauina o le latou malaga.

O le taimi lava na tapuni ai e le Tama le tapuni o le afi o le ta’avale, na fa’afuase’i ai loa ona tifa atu se pikiapu lanu moli na aga’i mai i le itu i Sasa’e ma so’a o ia, ma fiti atu ai pe tusa o le 40 futu le mamao i le isi itu o le auala.

E le i tu le pikiapu lanu moli i le taimi na so’a ai le Tama na a’afia, ae na fa’aauau pea lana alu ma taia ai le pa ma’a i luma o le Faleaoga o le Special Education i Faga’alu ma faaleagaina ai le pa ma’a, faapea ai ma luma o le afi o le ta’avale.

O le susuga a Galea’i, o ia lea sa fa’afoeina le ta’avale i le taimi o le fa’alavelave. Ina ua fesiligia e Leoleo ia Galea’i i le mafua’aga o le fa’alavelave, sa ia taua ai e fa’apea, na moe i le taimi na tula’i mai ai le fa’alavelave, peita’i na te le’i iloaina le taimi na ia so’aina ai le   Tama ua maliu.

O manu’a tuga i le ao o le Tama ia Lameko Lopesi, faapea ai ma ona foliga, o ni isi ia o mafua’aga na ala ai ona oo le maliu ia te ia.

FA’AMASINOGA AUTU

E 3 molimau na valaauina e le malo i le ulua’i aso o le fa’amasinoga - le ali’i Leoleo ia Maerko Fale, o le Inisinia, ma le faletua o le susuga a Lopesi.

E ui i le tele o vaega sa taua e Fale i lana molimau, peita’i o itu na taula’i i ai fesili a le itu tete’e, o le tulaga i le fesiligiaina o Galea’i e tusa ai o le fa’alavelave sa tula’i mai.

Na taua e Fale, e lei maua se avanoa na te fesiligia ai Galea’i e tusa ai o le fa’alavelave sa tula’i mai, e oo fo’i i nisi o molimau na iai i le taimi o le fa’alavelave, e lei maua fo’i se avanoa na te fesiligia ai i latou.

Na finau McNeill e fa’apea, sa tatau ona aami e le malo le Leoleo na autu i ai le suesuega o lenei mataupu, le susuga ia Lomu Mosese.

O Mosese o lo o molia o ia i le mataupu lea na sola ai i tua se ali’i pagota mai le toese i Tafuna i le masina o Aokuso 2018, ma aga’i atu ai ma fana se ali’i i Leone. O lo o i ai pea le mataupu a Mosese i luma o le Fa’amasinoga Maualuga i le taimi nei.

Na valaau e le malo, le ali’i Inisinia o lo o gafa ma le toe fa’aleleia o ta’avale a le Matagaluega o Leoleo. Na pau le itu na fa’ataua e le Inisinia i lana molimau, o lona fa’ailoaina lea, le atoatoa ona lelei o taofi o le ta’avale sa fa’afoe e Galea’i i le taimi na tula’i mai ai le fa’alavelave.

O le molimau lona tolu, o le faletua o le susuga a Lopesi. I le  molimau a le Tina, sa ia taua e fa’apea, o lona to’alua sa i luma o le afi o le ta’avale, o lo o siaki se vaega sa moomia le fia faaleleia, ae o ia ma fanau a lana fanau e to’alua sa i totonu o le ta’avale.

O le taimi lava na tapuni ai e lona to’alua le tapuni o le afi o le ta’avale, sa ia vaaia ai loa se pikiapu lanu moli o aga’i atu i le itu o lo o paka ai le latou ta’avale i se saoasaoa uiga ese. Na faamatala e le Tina e fa’apea, e pei lava o lo o lele le ta’avale i le taimi na aga’i atu ai i le latou itu, ona o le saoasaoa tele o lana alu.

Na taia e le ta’avale lona to’alua ma lelea atu ai i le isi itu o le auala. Sa ia iloaina lava i le taimi na ia oo atu ai i le vaega o loo taatia ai lona to’alua, o si ona to’alua ua maliu, ona o le matuia o manu’a na a’afia ai o ia.

Na taua e le Tina le aga’i o Galea’i ma fa’atoese atu ia te ia e tusa ai o le mea ua tupu, peita’i sa ia fa’ailoa i ai, e le aoga se isi upu e toe fai ona o lea ua maliu si ona to’alua.

I le mae’a ai ona valaau e le malo o a latou molimau, na valaau ai loa e le itu tete’e le susuga a Galea’i, e na o ia fo’i le molimau na valaau e le itu tete’e.

Na taua e Galea’i e fa’apea, a o aga’i mai lana ta’avale i luga o le alatele mai Tafuna, e aga’i mai i le Ofisa o Lafoga i le EOB i Utulei, sa ia lagona lona vaivai ma le lava.

Na pau le vaega na gata ai lona manatua o mea sa tutupu, o le taimi na laasia ai e lana ta’avale magatolu e aga’i i le falema’i o le LBJ i Faga’alu. O le isi mea na ia manatua, o le taimi na fetoai ai lana ta’avale ma le pa ma’a i luma o le faleaoga a le SPEC i Faga’alu.

Na ta’utino Galea’i i luma o le vaega iloilo iuga, na te lei iloaina le taimi na so’a ai e lana ta’avale le Tama ua maliu, na te lei iloaina fo’i le taimi na tifa ai i tua ma le auala lana ta’avale.