Ads by Google Ads by Google

Fa'amaonia Lealao suiga ua faia mo le Farm Fair

O ananafi na fa'amaonia mai ai e le fa'atonusili o le Ofisa o Fa'atoaga a le malo ia Lealao M. Purcell suiga ua faia i le fa'aaliga o fa'atoaga a le aufai fa'atoaga a le atunu'u (Farm Fair), lea na fa'amoemoe e faia mo le umi e lua aso, peita'i o lea ua suia i le na o le tasi le aso, ua na o le aso Lulu, Novema 26, 2014.

 

Ina ua fesiligia e le Samoa News le tofa a Lealao i le mafuaaga ua toe faia ai lenei suiga i le polokalame, na taua ai e le ali'i fa'atonusili e fa'apea, talu ai o se poloaiga mai le ali'i kovana ina ia avea le aso Tofi o se aso malolo mo le malo, ua manatu ai loa e lava na o le aso Lulu e fa'atino ai le polokalame a le aufai fa'atoaga, ina ia aloaia ai pea le aso malolo a le malo ua fa'alauiloa mo le vaiaso nei.

 

"O polokalame uma lava lea na fuafua e faia i le aso Tofi, ua tu'u fa'atasi uma lava i totonu o le aso Lulu, e pei o tuuga fautasi, tuuga va'a 'alo, atoa ai ma fa'afiafiaga ma le taumafataga, e amata mai lava i le taeao ae faamae'a i le afiafi, ma tufatufa ai loa ma fa'ailoga i lea aso", o le saunoaga lea a Lealao.

 

Toeititi lava atoa le to'a 150 o tagata fai fa'atoaga ua mae'a ona lesitala o latou suafa mo lenei tauvaga, e pei ona fa'amaonia mai e le tofa a Lealao ananafi.

 

O i latou ua lesitala e aofia ai i latou o le a tausinio i tulaga o fua o fa'aeleeleaga, lafu manu, togalaau 'aina, atoa ai ma i latou ua lesitala mo le fa'alauiloaina o taumafa vela a Samoa, lea o lo o autu i ai le tauvaga o lenei tausaga, o le toe fa'amanatu lea o taumafa a Samoa mai aso anamua.

 

Saunoa Lealao e fa'apea, o le a ese fo'i le silasila ma le maimoa a le atunu'u i le polokalame o lenei tausaga, aua e i ai le talitonuga, o le a matua tele fua o fa'aeleeleaga a le atunu'u o lo o a fa'atauina ai, ma maua ai fo'i ma le avanoa e molimauina ai galuega sa gapatia i ai le aufai fa'atoaga i lenei tausaga ma aso e tele.

 

O lo o aofia ai i totonu o le polokalame le saunoaga a le afioga i le ali'i kovana ia Lolo Matalasi Moliga, lea o le a ia fa'afetaia ai le aufai fa'atoaga e tusa ai o le latou sao i le atina'e o le atunu'u ma le malo, aua o i latou o lo o pau i ai le mamafa o le fatu aiga i le tulaga o le fofoga taumafa o le atunu'u fa'apea ai le polokalame a le fanau aoga, le School Lunch.

 

O se tasi o suiga e pei ona saunoa Lealao, o le uluai taimi lenei talu mai le tolu tausaga ua tauna'i ua auai ai ni talo mai Manu'a e auai i le tauvaga a le aufai fa'atoaga. O le suiga mo lafu manu o lo o tumau pea, o le asiasia lea e sui o le komiti i nofoaga o lo o tausi ma fafaga ai lafu manu, ma le tau aumai i le nofoaga o lo o faia ai le tauvaga.