Ads by Google Ads by Google

Faamaonia e Vui Florence Saulo lona agava’a e avea ma Faipule

Ua faaalia e le afioga Vui Florence Saulo, lea sa manumalo i le isi nofoa o le Itumalo o Tualauta i le Maota o Sui i le Fono Faitulafono i le palota na mae’a atu nei, le faateia tele o ia i le faaiuga ua faia e le Fofoga Fetalai o le Maota o Sui, i le faia o se suesuega faapitoa e faatatau i le agava’a o le avea o ia ma Faipule i le Maota o Sui.

I se talanoaga a le Samoa News ma le tofa Savali Talavou Ale e uiga i lenei mataupu, sa ia faamaonia mai ai lona fautuaina o le Loia Fautua a le Fono Faitulafono, ina ia sailiili atili i le mataupu e faatatau ia Vui, ma tuu atu sana fautuaga a’o le’i o’o i le taimi e faatauto ai le Nofoaiga fou a le Fono Faitulafono. (Faitau i le tala atoa i Le Lali i le Aso Faraile, Tesema 28, 2012).

Na taua e Vui e faapea, ua mafua ona faateia o ia i le faaiuga a Savali, ona o lea ua taoto le faaiuga sa tuuina mai e le Vaega Apili o le Faamasinoga Maualuga, e faaleaoga ai le tagi a Esther Wall ma Lucia Bartley faasaga ia te ia.

O Wall ma Bartley, o  ni isi ia o sui e toavalu ai i latou na tauva mo nofoa e lua a le Itumalo Tualauta, peitai e le’i faamanuiaina le la taumafaiga.

Fai mai Vui, sa i ai lona manatu ua taoto lenei mataupu, ina ua le mafai ona faamaonia i le Faamasinoga, e le o ia o se Nesionale a le malo o Amerika, ae peita’i, e foliga mai o le a tula’i mai pea ni aafiaga faaumiumi e tatau ai ona ia tula’i e puipui o ia.

Na saunoa Vui,  “Sa ou manatu faapea, o le avea o a’u ma sui o le Fono, o le a mafai ai ona faalautele la’u tautua mo i latou, aemaise ai foi, o le avea o a’u ma le isi faipule o lo’u itumalo, o le a faa faigofie ai lo’u tulaga e fesoasoani atu ai i ni isi o faafitauli o lo o tula’i mai”.

Sa ia taua foi e faapea, i le avea ai o ia o se sui filifilia o le Maota o Sui ma se tagatanuu o Amerika Samoa, ua ia lagona ai, o lona tiute o le faasa’o o faaletonu o lo o tula’i mai, atoa ai ma tala e faapea, ua agavaa nei ona tauva mo le tofi faipule tagata e le o ni Nesionale o Amerika.

Na faamanino e Vui e faapea, o ia o le ‘Nesionale o le Iunaite Setete o Amerika’.

“Na ou fanau mai i le nuu o Laulii i Amerika Samoa i le aso 20 Aokuso 1963. O o’u matua sa Faifeau i le Ekalesia Metotisi, o i laua foi o Misionare sa valaauina e galulue mo le galuega a le Alii i le Ekalesia Metotisi i Laulii i le taimi na ou fanau mai ai,” o le molimau lea a Vui.

“O lo’u aso fanau o lo o faamauina i le Ofisa o Faamaumauga, o lo o i ai fo’i pepa fanau Amerika Samoa e faamaonia ai lo’u fanau mai, o lo o i ai fo’i lo’u tusi folau Amerika o lo o tusia ai le nofoaga ma le aso na ou fanau mai ai, faatasi ai ma le tuuina mai ia te a’u o le tulaga o le Nesionale o le Iunaite Setete.”

Na taua e Vui e faapea, e oo mai lava i le taimi nei, e leai lava ma se isi ua ia tuuina atu ni faamaoniga e lagolago ai o ia na soifua mai i le malo Tutoatasi o Samoa, e oo lava foi i faamatalaga sa tuuina atu e Bartley ma Wall i le au faasalalau.

Na ta’ua e Vui le faate’ia foi o ia, ona e “mai i faipule fou e to’a 7 o lo o aofia ai i faipule e to’a 21 o le maota o sui, e na o a’u lava lea o lo o fesiligia ina ia tuu atu se kopi o lo’u pepa fanau, mai le to’a 21 sa faamaonia e le Komesina o Palota, e na o a’u lava lea ua faatonu e tuuina atu se faamaoniga o le atunuu na ou fanau ai”.

I le 2005 e pei ona taua e Vui, na tofia ai o ia e kovana Togiola Tulafono e avea ma se tasi o totiono o le Komiti Faafoe a le Ofisa o Femalagaaiga, peitai sa avea ai foi le tulaga o lona pepa fanau o se tasi o mataupu sa talanoaina ai, mulimuli ane, sa mafai ona toe faamalieina uma tulaga sa manaomia, ma faamaonia ai o ia e avea ma totino o le Komiti Faafoe.

Na fa’aalia e Vui, e ui i tala sese ma le le sa’o ua tu’ua’ia ai o ia, e le avea ai le tuuina atu o lona loto ia i latou uma o lo o alala i Amerika Samoa sa soifua mai i le malo Tutoatasi o Samoa, lea o lo o nonofo aumau iinei ma tuuina atu la latou sao i le atina’eina o le tamaoaiga o le atunuu, faapea ai a latou fanau na fananau i Amerika Samoa, ma ua latou taua ai Amerika Samoa o lo latou aiga.

Fai mai Vui, e ui i le tiga o le mataupu ina ua tulai mai, ona e i ai foi ona aiga i Samoa, peitai o se itu e mitamita ai, ina ua mafai ona i ai sona sootaga i Samoa, ma e tumau pea lona faaaloalogia o ia sootaga mo aso uma o lona olaga.

“Ae mo le afioga i le Fofoga Fetalai, talosia ua maua atu ai i la’u faamatalaga se isi o vaega sa ia fia mauaina, ma atonu ua faamalieina o ia i pepa faamaonia sa ou tuuina atu i lana loia ma lona ofisa,” o le saunoaga lea a Vui.