Ina ua o’o i le vaega o A’oa’oga e ao ina pasia e i latou e a’oa’o ma tausia fanau i totonu o Day Care Centers, ua fa’atulaga mai ai e ao ina i ai se tasi e maua le fa’ailoga o le AA i lea aufaigaluega, e tatau fo’i ona i ai nisi e i ai fa’ailoga Diploma i totonu o nei lava nofoaga.

O lea fa’amalosiga o tulaga tau le a’oa’oga, ua suia mai ai le mea sa sau a’i le faiga tuai, sa tausia lava e tina matutua fanau e foliga mai o se nofoaga e na’o na va’ava’aia lelei ai fanau.

Lea ua fa’alaugatasia le fa’atautaiga o le tausiga lelei o fanauiti ma toe amatalia ai ona a’oa’o i latou ia sologa lelei le ulufale atu i A’oga Fa’ata’ita’i pe a o’o ina atoa le ta’i 3 ma le 4 tausaga le matutua.

E silia ma le to’a 80 i latou na fa’aulufale i le kosi o le BEd i a’oa’oga ECE, ma o lo’o fa’aauau pea, ae o le isi vaega sa fa’aulu atu i A’oa’oga mo Tagata Matutua, ma e le’i umia ni fa’ailoga Tipiloma ona e le’i uma a’oa’oga  maualuluga, i totonu fo’i o le Kolisi Tu’ufa’atasi.

O le vaega la lea e sailia latou fa’ailoga CDA, ma ua i ai ni sui sa latou mauaina fa’ailoga nei, ma ua taua’aona fa’apitoa ma latou meaalofa fa’apitoa mai le Polokalama Governor’s Early Childhood Education.

Mai le amataga o le ulufale atu i nei a’oa’oga, e maua ai e i latou se vaega tupe, ae i le toe taua’aoina fo’i o latou fa’ailoga, ua toe maua ai fo’i le isi vaega tupe, ona ua mafai e i latou su’ea ma pasia mataupu o le Igilisi 90, Igilisi 120 ma le Igilisi 150.

O sui nei na taua’aoina fa’apitoa latou tusi pasi i le tau fa’ai’ui’u ai o le fonotaga mo le lua aso a le Early Childhood Education Summit i le vaiaso na te’a:

Ms Rita Ameperosa, Sinatoga Tu’ufuli, Asoiva Alopopo, Kasia Maiava, Lucy Tuia’ana ma Solonaima Levaoali’i.

I le tautalaga a le tama’ita’i o Mrs Te’i, sa ia fa’ailoa ai, “O le taimi nei ua fa’atulaga mai le itu tau le auaunaga ia a’oa’o lelei fanauiti, ma ua fa’amalosia ai:

“Totonu o Day Care Ta’itasi ia tofu ma se sui Faia’oga e fai le fa’ailoga AA, le isi to’alua o sui faia’oga e tatau ona i ai fa’ailoga CDA po’o Tipiloma High School, ma le tina matua loa e tasi e pei o se matua mo nei sui uma e a’otau ma tausia fanau i totonu o Day Care ta’itasi.

I totonu o le ECE, ia atoa lelei le 50% o faia’oga e galulue ai, ua tofusia ma le BEd i A’oa’oga tau ECE.”

Ua fa’ailoa mai, o le a taumafai le Governor’s Early Childhood Education ina ia fa’atulaga le latou nofoaga tutotonu i se vaipanoa i le taulaga, ina ia mafai ona o’o mai i ai nisi faia’oga, ia le faigata atili i le mamao. O ia nofoaga o le a faia ina ia mautinoa ua maua avanoa mo masini Komipiuta ma isi auaunaga mo i latou e saili fa’ailoga, se’ia o’o ina mautinoa ua le toe faigata ona tausaili e i latou ni meafaigaluega e fa’atautaia ai latou a’oa’oga.