O le aoauli ananafi sa taua’aoina ai e le Pulega ma le Komiti Fa’afoe o le fale’aiga lauiloa o le McDonald’s sikolasipi, e aofia ai le fa mo le ASCC ma le to’atasi mo a’oa’oga i Iunivesite i fafo i e ua mae’a agava’a ai.

Fa’ailoa i le saunoaga a le Taitaifono o le Komiti Fa’afoe a le McDonald’s lea e filifilia latou ua agava’a mo nei avanoa sikolasipi o Delores Tautolo-Galeai, “Afai lava e mafai ona e fa’atumauina lou GPA ma vave fo’i ona fa’ao’o mai ou togi i lea afa tausaga ma lea afa tausaga ole a’oga, fafo po’o i’inei fo’i, e vave lava ona maua atu lau siaki e fesoasoani mo au pili totogi o tou a’oga.”

O le to’alima lenei, ua maua ai le aofa’iga e 38 alo o le atunu’u ua maua nei fa’amanuiaga talu mai le 8 tausaga ua te’a na amatalia ai lenei galuega lelei, na fuafuaina e le CEO McDonald’s Afioga Tautolo Agaoleatu Charlie, “Ina ia mafai ona tino mai le toe fa’afo’i a lenei fale’aiga mo le pa’ia lautele o le atunu’u.”

O i latou ua agava’a mo sikolasipi e to’afa mai a’ogamaualuluga, ae o le a ulufale i le Kolisi Tu’ufa’atasi e aofia ai:

- Adolf Petaia mai le vasega fa’ai’uaso a le Polytech High Nuuuli ma o lo’o tauavea fo’i e ia mataupu tau su’etusi ma tausitusi ma le fa’amoemoe e amatalia sana pisinisi i le mae’a ai o ana a’oa’oga.

- Taisamasamaoletuimanu’a Toatelegese mai le vasega fa’ai’uaso a le Polytech High i Nuuuli ma e tauavea e ia mataupu tau “tausitusi ma su’etusi.”

- Meripa Poloai o se tasi o le vasega fa’ai’uaso mai Leone High ma ua agava’a mo le fa’aauauina o ana a’oa’oga i le Criminal Justice i le ASCC.

- William Leo o se tasi o agava’a mai fanau a nisi o le aufaigaluega,  po’o tagata fo’i o le aufaigaluega a le McDonalds mai le afio’aga o Nuuuli, o le a fa’aauau a’oa’oga i le tatou Kolisi Tu’ufa’atasi.

O le to’atasi o le fanau fa’au’u mai le Kolisi Tu’ufa’atasi i le tausaga a’oga na te’a nei, ae ua maua le sikolasipi e $8,000. mai le McDonalds e fa’aauau ai ana a’oa’oga i UH Manoa, o le tama’ita’i lea o Hillary Chong, alo e fa’asino ia Mr. & Mrs Sam Chong o Utulei. O le a ia sailia lona fa’ailoga i le Meterology po’o le Va’ai Tau.

O fanau ua fa’aauau a latou a’oa’oga maualuluga ma o lo’o gafatia pea e o latou togi ona ausia a latou sikolasipi mai le McDonalds e aofia ai: Anna Afoa, Salamasina Aumua, Talimeli Taufete’e ma Angeline Maeli.

Mai le to’a 38 lea o fanau, e to’a 9 na fa’atupe fa’apitoa ina ia a’oa’oina mo fa’ailoga maualuluga i Iunivesite i fafo atu o Amerika Samoa. Na fa’aalu ai e McD le aofaiga e $77,000. E to’aono ua mae’a fa’au’u ma fa’ailoga maualuluga, ae to’atasi lava ua ofo lana tautua i le militeri. O le to’aono lea ua fa’au’u ma fa’ailoga maualuluga, ua fa’aauau a’oga mo fa’ailoga sili atu, o nisi ua faia pisinisi ae o nisi ua taliu mai e faigaluega i le Malo ma aiga.

O se tasi o i latou, Faith Vaifanua, sa avea ma fofoga fa’apitoa, e faia sana molimau e tusa o le aoga fo’i o lenei fesoasoani tupe a le McDonalds mo lana a’oga, a’o i ai i University of Hawaii - Hilo.

“O a’u sa mua’i maua lenei sikolasipi a’o o’u aga’i atu i le tatou Kolisi Tu’ufa’atasi e sailia lo’u fa’ailoga AA - Criminal Justice. Fa’afetai na mae’a fo’i ona maua fa’amanuiaga mo ia tausaga e lua sa i ai i le ASCC.”

Sa ia toe talosaga mo se avanoa e a’oga ai i UH - Hilo, “Na ou fa’afetaia le toe taliaina fo’i e le CEO ma le Komiti Fa’afoe o le isi a’u talosaga mo lea lava avanoa e totogia ai nisi o pili mo a’u a’oga i tausaga e lua i UH Hilo. Lea ua mae’a, ua ou manatu, e tatau ona ou sau so’u aoga mo lenei taimi, ma toe talosaga fo’i nisi avanoa e fa’aauau a’oa’oga mo le avea ma Loia.” O se tala fiafia lea a Vaifanua sa fa’afofogaina e matua ma fanau agava’a i sikolasipi a le McDonalds ananafi, i le Ofisa autu i Fagatogo McDonalds.

O le tupe aofa’i e fa’aalu mo nei sikolasipi fou e $12,800. peita’i, sa fa’ailoa mai fo’i, ua toe fa’aopoopo atu i lea vasega o fanau a’oga fou ua maua nei sikolasipi, o fanau a’oga o lo’o fa’aauau pea latou a’oa’oga, ua toe maua mai latou lipoti o togi ma o lo’o taofia pea e i latou a latou GPA e agava’a ai mo lea fesoasoani, e to’afa, ua fa’aalu atoa ai e le McDonalds le aofa’iga e $17,600. mo lenei tausaga a’oga fou.