Ads by Google Ads by Google

Faamanino Tupetupe auala na faaaoga i ai pili tupe $5miliona a le Kovana

E ui o le pili tupe e $5miliona a le kovana na faatoa pasia e le Fono Faitulafono i le masina o Aperila na te’a nei, na sainia ai e le alii kovana sili i le aso 12 Aperila, peitai o ni isi o vaega sa faaaoga i ai le tupe lea o lo o aofia mai i totonu o ripoti o tupe faaalu a le malo mo le Kuata Lua o le Tausaga Tupe lenei, lea e aofia ai Ianuari e oo atu ia Mati, 2013.

 

Ina ua fesiligia e le Samoa News le Teutupe a le malo ia Falema’o ‘Phil’ M Pili i le mafuaaga ua aofia ai tupe o le $5miliona i le ripoti o Ianuari e oo mai ia Mati, ae o le pili tupe e $5miliona na faatoa pasia ia Aperila, na taua ai e Falema’o e faapea, o le ripoti o tupe maua ma tupe faaalu a le malo sa tuuina mai mo le kuata lua, o lo o aofia ai ma gaioiga uma sa faia e oo mai i le aso 26 Aperila, 2013, lona uiga o lo o aofia ai ma tupe mai le $5miliona.

 

O lea mataupu na fesiligia e ni isi o sui o le Fono Faitulafono ina ua latou maua le avanoa e faitau ma iloilo ai le ripoti a le malo mo le kuata lua.

 

O ni isi o galuega na taua e Falema’o o lo o aofia ai i le ripoti o le kuata lua o le $282,000 lea sa totogi atu e le malo i le kamupani a le PIE, ma le $95,000 sa totogi atu mo Amosa S. Amosa Jr e tusa ai ma poloaiga a le Faamasinoga.

 

O le taimi nei fo’i e pei ona saunoa Falema’o, o lo o galulue lona ofisa faatasi ma le Matagaluega o Tupe a le malo tele o Amerika, mo le faamautuina o le mataupu i le toe totogiina atu lea o le $916,000 mo ova taimi a ni isi o tagata faigaluega a le malo e le’i sa’o ona faamaumau, ma le $25,000 lea na totogi atu i le maliliega na faia e le latou ofisa ma le vaega o le Equal Employment Opportunity a le malo tele.

 

Na taua e Falema’o i le Samoa News e faapea, ina ua tapunia galuega mo le kuata muamua o le tausaga tupe lenei ia Tesema 31, 2012, e $8.86 miliona le tupe na ova ai le faaaoga a le malo, ma o lo o vaavaai le malo i le aofaiga e $9.8miliona e nofo aitalafu ai i le faaiuga o le tausaga tupe lenei 2013.

 

Ina ua fesiligia le Teutupe i le tulaga o le tamaoaiga o le malo talu ona tula’i mai Lolo ma Lemanu i le lima masina talu ai, na ia taua ai e faapea, o lo o i ai pea ni isi o galuega a le malo e le’i paketiina mai tausaga ua mavae ae sa faatinoina lava, ma o lo o taumafai pea le malo i le taimi nei e vaavaai toto’a i ai i tulaga ia, ina ia gafatia e vaega tupe vaivai a le malo ona faatino manaoga nei.

 

“O le isi itu e ao i le malo ona vaavaai toto’a i ai, o le sailia lea o ni isi alagatupe fou e aumai i totonu ina ia mafai ai ona maua e le malo ni isi tupe fou e faatino ai ana galuega,” o le saunoaga lea a le Teutupe.

 

“E manaomia lava sina taimi sei taumafai ai e faataoto fuafuaga ma faatulaga tulaga o tupe a le malo, ina ia mafai ai ona gafatia e tupe manaoga o lo o tula’i mai,” o le isi lea saunoaga a le Teutupe.

 

Saunoa Falema’o e faapea, e i ai lona talitonuga o le sootaga vavalalata i le va o le malo ma pisinisi tua, o le isi lea vaega o lo o taula’i i ai le silasila a le alii kovana, ina ia mafai ona atina’e pisinisi ma mafai ai ona latou fesoasoani mai i le tamaoaiga o le malo i tausaga o lumana’i.

 

O le finagalo o le afioga i le kovana sili ia Lolo Matalasi Moliga, a lelei ona atina’e pisinisi o le manuia fo’i lena o le malo i le lumana’i.

 

fa’aliliu Ausage Fausia