Ads by Google Ads by Google

Faamanino sui ASPA le mataupu e faatatau i le ‘recycling’

O le iloiloga a le komiti o le ASPA/TEO a le maota o sui sa faia i le vaiaso na te’a nei, na maua ai le avanoa o le pulesili o le Faalapotopotoga o le Eletise ma le Suavai (ASPA) e faamalamalama ai le tulaga o le latou polokalame o le ‘recycling program’, lea ua fesiligia e faipule pe aisea ua taofia ai.

 

E ui ua taofia lenei tautua taua a le ASPA mo le atunuu, ae na faamaonia e le afioga i le matua ia Utu Abe malae i luma o le komiti e faapea, o le a mafai ona toe tatalaina lea auaunaga pe afai e mae’a ona faamautu ni isi o tulaga e faatatau i le faatinoina o lenei tautua, lea o lo o galulue i ai le ASPA.

 

Saunoa Utu e faapea, ina ua tapunia lenei auaunaga i le tausaga na te’a nei, e $868,000 le aofa’i o le tupe ua gau a le ASPA mai le faatinoina o lea tautua, ma o lo o taumafai e saili ni isi o auala e toe faapaleni mai ai lea tupe tele, e pei o le toe faatauina atu o ni isi o vaega o lapisi o lo o i ai i Futiga ma Tafuna.

 

“Ae ui sa gau le tupe a le ASPA i le faatinoina o le polokalame lenei, e tele mea taua ou te fia faailoa atu sa mafai ona maua mai ai, e le gata ua mama atoa ai vaega eseese o le atunuu, ae ua le toe vaaia ai foi lapisi e pei o u’amea, atigi taavale, pusaaisa ma isi lava lapisi sa masani ona faaputu ma lafoa’i i tafatafa o le alatele,” o le saunoaga lea a Utu.

 

Na taua e ni isi o sui o le komiti a le maota o sui e faapea, o le tulaga lelei sa i ai lenei polokalame ina ua amata mai, e lei toe vaaia ai ni lapisi i vaega eseese o le atunuu, ma ua unaia ai tagata e faaputu le lapisi ma ave i le ASPA e faatau ai.

 

“O le isi itu taua o le polokalame lenei, sa mafai ai ona fesoasoani i le totogiina o pili a nai aiga lima vaivai, ma ou te tatalo ina ia toe faaauau lenei polokalame i se taimi o i luma, ina ia mafai ai ona fesoasoani i nai aiga lima vaivai,” o le saunoaga lea a le alii faipule ia Puletuimalo D. Koko o le taitai komiti.

 

Na faamanino e Utu e faapea, ina ua amata mai e le ASPA lenei polokalame, sa mafai ona faaalu e le ASPA tupe sa maua mai i lapisi na la’u atu e le atunuu e pei o atigiapa, fagu, ‘plastic’, e oo lava fo’i i atigi taavale ma pusaaisa i pili uila a tagata.

 

Sa ia taua foi e faapea, o se tasi o itu sa maitauina ao faagasolo mai lenei polokalame, sa maitauina le uumi o laina taavale i itu uma e lua e ulufale ai i le Ofisa o le ASPA i Tafuna, ma o le isi lea pine faamau sa iloa ai e toatele le atunuu sa fiafia i le polokalame.

 

O se tasi o itu sa fia malamalama i ai sui o le komiti, o tagata faigaluega sa galulue i lalo o le polokalame, pe moni ripoti ua faamalolo ni isi o i latou nei. Na faamanino e Utu e faapea, e toa 10 tagata faigaluega na faa faigaluega e le pulega a le ASPA ua mavae atu e galulue i le polokalame lenei, ae talu ai o lea ua tapunia, ua logoina ai e taitai i latou nei e i ai le taimi e faamalolo ai latou mai le galuega.

 

Saunoa Utu, e leai se isi o i latou nei ua faamalolo i le taimi nei, ae o lo o taumafai pea e saili ni isi galuega e tuu i ai i latou ina ia taofia ai le maimau o a latou galuega, a ia maua ai pea galuega e gaalulue ai i lato.

 

O ni isi o galuega ua galulue ai i latou nei sa i lalo o le polokalame, o le fesoasoani lea i le toe tuu faatasia o ni isi o faamaumauga a le ASPA sa faaleagaina talu mai le galulolo o le 2009, ona o ni isi o i latou nei o lo o i ai le agavaa ma le tomai e faatinoina ai nei galuega.

 

Na faaiu le iloiloga i fautuaga mai sui o le komiti sa tuuina atu i sui o le ASPA, ina ia saili se isi auala e mafai ai ona toe faaauau lenei polokalame taua.