Faamanino Sandra mafuaaga faamalolo ai tagata faigaluega to’aono LBJ

“Na gau mai lava LBJ ina ua faatoa tatala lana tautua 1999”

 

I se tusi sa tuuina atu e le susuga a Tofoitaufa Sandra King Young sa avea muamua ma Taitaifono o le Komiti Faafoe a le LBJ, i le afioga i le ali’i faipule ia Maugaoali’i Leapai Tusipa Anoa’i o le taitaifono o le Komiti o le LBJ/Soifua Maloloina a le maota o sui, o lo o ia taua ai mafuaaga eseese na ala ai ona manatu le Komiti Fa’afoe e toe fa’atulaga tulaga ma totogi o tagata faigaluega i totonu o le falema’i.

 

O le tusi a Tofoitaufa sa tuuina atu ia Maugaoalii i le aso 31 Iulai 2013, o lona aso mulimuli fo’i lea i le tofiga o le Ta’ita’ifono o le Komiti Faafoe, o sana tali atu lea i se tusi sa tuuina atu i ai e Maugaoali’i ia te ia i le aso 29 Iulai 2013, lea sa taua ai e le afioga a Maugaoalii e faapea, o le faaiuga a le Komiti Faafoe ua faia e le gata ua faanatinati ae sa faia fo’i e aunoa ma le fesiligia o ni finagalo o tagata faigaluega na aafia i le faaiuga.

 

Mai tagata faigaluega e to’aono, o i latou ia sa fai ma ta’ita’i i ni isi o vaega o le falemai na tuuina atu i ai tusi e faamalolo mai ai i o latou tofiga, ua uma ona toe tuuina atu i ai le tusi e faaleaoga ai le faaiuga ina ia faamalolo i latou mai a latou galuega.

 

Na taua e Tofoitaufa i lana tusi e faapea, o le faaiuga sa faia e le komiti faafoe, e le gata e le’i faanatinatiina ona faia, ae sa fesiligia fo’i e sui o le komiti e toalua tagata faigaluega na fuafua e faamalolo e tusa ai o le faaiuga o le a faia, latou te le’i lagolagoina fo’i le faaiuga a le komiti faafoe mo le toe faatulagaina o tulaga ma totogi i totonu o le falema’i.

 

E ono masina na galulue ai le komiti faafoe i le faia o a latou suesuega e tusa ai o lenei mataupu, aemaise ai o le suesueina o le tulaga o lo o i ai tupe a le falemai, ona o le manatu maualuga sa i ai i le komiti, o le latou tiute o le mautinoa lea e ausia e le falema’i lana manulauti  i le tautuaina o le soifua maloloina o le atunuu, ma ia mautinoa foi e saogalemu gasegase uma e agai atu i le falema’i i soo se taimi.

 

Na taua e Tofoitaufa i lana tusi le ofo o le komiti ina ua maua i a latou suesuega le tele o faafitauli eseese o lo o tula’i mai i le falema’i, ona o le tulaga le lava i vaega tupe o lo o faatinoina ai lana tautua e pei o le tele o aitalafu e le mafai ona aoina mai i totonu, maualalo tulaga o tupe o lo o sau i totonu, le tausisi i tulafono mo le faa faigaluegaina o tagata, tulaga o totogi faapea ai ma itula faigaluega.

 

“Ina ua uma ona matou iloiloina faamaumauga uma a le falema’i, na matou maua ai, talu mai lava le tausaga e 1999 ina ua faatoa avea le Falema’i ma Vaega Tumaoti o le malo, sa faaauau mai pea lava i le taimi lea ona nofo aitalafu le falema’i i tulaga o tupe e faafoe ai ana galuega,” o le saunoaga lea a Tofoitaufa.

 

O ni isi o taimi e faasala ai e le feterale le falemai ma poloaina i latou ina ia toe totogi atu tupe sa tuuina mai e faatino ai lana auaunaga, ma o tupe e totogi ai sala a le falema’i o lo o sau i tupe lotoifale a le malo, po o tupe a tagata totogi lafoga.

 

O ni isi o mafuaaga o le faaiuga e toe faatulaga tulaga ma totogi o tagata faigaluega, na faia ina ua maua e le komiti faafoe, e tusa ma le $3.3 miliona pili a le falema’i ua fia tausaga e le’i aoina atu lava i totonu, ma o le 38% o nei pili ua ta’i 90 aso le umi e le’i aoina atu lava i totonu.

 

O lo o taua foi i isi faamaumauga e faapea, e tusa ma le $31.4 miliona tupe sa tatau ona maua e le falema’i, peita’i e le’i totogiina atu lava i totonu.

 

O le $1.5 miliona lea sa tatau ona maua e le falema’i mai le lafoga o totogi e 2% na pasia e le Fono ma sainia e le kovana ua mavae atu, e na o le $200,000 ua maea ona totogi atu. O isi aitalafu o lo o faaauau pea ona totogi e le falema’i i le taimi nei, o le $64,000 lea e totogi i masina taitasi seia oo atu i le masina o Ianuari 2014, mo tupe o le polokalame a le Medicare lea ua faatonu e le feterale le falema’i e toe totogi atu.

 

E o o foi i aitalafu a le LBJ i pisinisi tua mo le aumaia o vailaau ma fualaau, e tatau ona totogi e le falema’i le $300,000 i le masina mo lea tautua, ma o le tele o pisinisi ma kamupani tua ua mumusu e toe tuuina mai lea tautua sei vagana ua totogi muamua atu e le falema’i le tupe.

 

I tulaga o totogi a i latou e toaono sa fuafua e faamalolo e amata mai i le $36,275 e o o atu i le $93,000 i le tausaga.

 

Na faafetaia e Tofoitaufa le afioga i le alii faipule ia Maugaoalii e tusa ai o lona fesiligia o le faaiuga a le falema’i, ma ia taua ai le tele o tupe sa faaalu e le latou komiti faafoe mo le faatinoina o lenei suesuega, ona o le latou naunau ia saili se auala e foia ai le faafitauli tau tupe ua tele tausaga o feagai ma le falema’i.

Comment Here