E ui na taua e kovana Togiola Tulafono i luma o le Fono lona lagolagoina o le tuu atu o le mataupu i le ‘veto override’ i le palota a le atunuu, peitai sa ia taua foi, afai ae pasia e le atunuu le tuu atu o le malosi i le Fono Faitulafono latou te suia ai se faaiuga e teena ai e le kovana se pili sa latou pasia, lona uiga ua manino mai ai iina le tuu atu o le malosi i le Fono Faitulafono, latou te pulea ma faatautaia ai le malo.

Mo se faataitaiga o le finagalo o le alii kovana sa folasia i luma o le fono e faapea, o le taimi lava e pasia ai e le atunuu le tuu atu o le malosi i le fono e suia ai le malosi e teena ai e le kovana se pili na pasia e le fono, lona uiga o nisi pili e pasia atu e le fono ae toe teena e le kovana, o le a faaaoga e le fono lona malosi e toe suia ai le faaiuga a le kovana.

“Pau le mea a le kovana e fai o le usitai ma fai le mea lea ua fai atu ai le Fono, e le toe i ai se malosi o le kovana e faia ai se isi faaiuga, ae o le malosi atoa o le a tuu atu uma i le Fono e faafoe ai tulafono e manatu le fono e tatau mo le atunuu,” o le saunoaga lea a le alii kovana.

“O le laasaga la lea o le a tatou laa atu nei i ai mo le suiga o le faavae, e le o se mea i le va o le fono ma le kovana, ae o le mea moni o le suiga lea o le faigamalo, o le a sui atoa le puleaina o le malo, aua o lea o le a tuu atu i le fono le pule na te faafoe ai le malo,” o le saunoaga lea a le kovana i le feiloaiga ma le fono.

Saunoa Togiola, ua mafua ona ia faailoa lea mataupu, ina ia mafaufau loloto i ai sui uma o le fono i le aano moni i le suia o le faavae lea ua latou naunau i ai, lea foi ua ia sapaia le finagalo lea o le fono ina ia taoto atu i le au palota le faaiuga o le mataupu.

Na faaauau le saunoaga a Togiola e faapea, afai la ua finagalo le Fono e tuu atu i le atunuu le mataupu lenei e palota i ai mo le suiga o le malo, ua alaga tatau ai ona agai atu le malo e faamaopoopo tulaga uma e faatatau i faigamalo faatemokarasi, ma o se tasi o ia laasaga o le palotaina lea o le maota maualuga.

Saunoa Togiola, e le faatauagavale sona manatu i tupu ma tamalii o le atunuu, e le tau faaleaga foi i le aganuu e sapi ai Samoa, ae i lona talitonuga, afai ua a’e se tofa i le fono e sui le faavae, na te lagolagoina foi le tatau ona aiaia uma tu ma aga faatemokarasi ina ia talafeagai ma suiga ua manatu i ai le fono.

Saunoa Togiola, o ia le isi sa tu malosi e lagolago le aua lea ne’i palota le Senate, peitai afai ua naunau le fono i le ausia o aga faatemokarasi, o lona talitonuga e tatau ona ausia tulaga uma.

Sa ia faapupulaina foi i luma o le Fono aiaiga o le tulafono lea ua sauni le malo e faaulu, ina ia aiaia ai agavaa o i latou e mafai ona tauva mo le tofi Senatoa, o i latou ia e aofia ai tagata o loo umia suafa matai taua o aiga, o i latou foi na soifua mai i Amerika Samoa i tuaa Amerika Samoa.

Na faamanino e Togiola i luma o le Fono e faapea, e le avea le palotaina o le tofi Senatoa ma itu e aafia ai tu ma aganuu a Samoa, aua o puipuiga e pei ona aiaia i le tulafono e palota ai le Senate, o loo malu puipuia ai ituaiga tagata e agavaa mo le tofi Senatoa.

O lea puipuiga e pei ona saunoa Togiola, e faamautu ai le popolega o loo nonofo ma le Fono, i le ono mafai lea ona ofi mai ai tagata e le agavaa i le tofi.

Saunoa le afioga i le alii Senatoa ia Alo Dr. Paul Stevenson e faapea, e taua tele le finagalo o le kovana ua faailoa i le fono, peitai i lona talitonuga, e le lava le aofai o sui o le fono o loo i ai e fai ai se tofa mo le atunuu.

Sa talosagaina e Alo le alii kovana ina ia toe saili se isi auala e toe aiaia mai ai lona finagalo i le fono, ona e maualuga lona taofi, e le o lava tupu ma tamalii o le atunuu i le fono, ae afai o lona finagalo lea, e tatau ona auala mai le finagalo o le kovana i itumalo, ina ia tofu lagona uma i ai tupu ma tamalii o le atunuu i lenei mataupu taua.

“O le puipuiina o le faavae o le atunuu, o le puipuiina lea o ana measina ma ona tagata, ina ia mafai ona maua le sini autu, o le ola manuia o tagata uma,” o le saunoaga lea a Alo.

Ae na saunoa Senatoa Galea’i Tuufuli e faapea, o loo manino tulaga o le faigamalo a Amerika Samoa, o le Senate e filifilia mai e le atunuu, ae o le maota o sui e palota mai e tagata lautele, ina ia faamalieina ai aiaiga o se malo faatemokarasi.

Sa taua foi e nisi o Senatoa lo latou le lagolagoina o le finagalo o Togiola e palota le Senate, ae manatu i latou, e tatau lava ona tumau tofiga a le Fono i le mea o loo i ai, e ala lea i le palota o le maota o sui ae filifilia mai e itumalo Senatoa.