SILI FATU KOKO SAMOA MO LE GAOSIA O LE SUKALAT

O le faatuputeleina o le manaomia o le koko e gaosi ai le sukalati i maketi i fafo, o se tasi lea o mafuaaga ua unaia ai e le Matagaluega o Faatoaga le aufai faatoaga i le atunuu, ina ia toaga e toto le koko Samoa ina ia mafai ai ona faamalieina manaoga mo maketi i fafo, ma maua ai se fesoasoani tau tupe mo i latou.

I se faatalatalanoaga a le Samoa News ma le Faatonusili o le Ofisa o Faatoaga i le vaiaso na te’a nei, na faailoa mai ai e le tofa Lealao Mel Purcell e faapea, o le isi lea alagatupe ua maitauina o le a selesele ai le malo i le isi 5 tausaga o lo o muamua.

Saunoa Lealao, ua maea ona tuuina atu sa latou fautuaga i le aufai faatoaga ina ia toaaga e toto le koko, ma ua vaaia foi le naunau o le aufai faatoaga e lagolagosua mai i lea faamoemoe taua.

“Ua faamaonia i suesuega sa faia, e sili atu ona lelei le fatu koko o loo maua i Samoa nai lo fatu koko o isi ituaiga koko e pei o le koko Solomona, koko Fiti, Lafi Fiti, o le mafuaaga la lena ua matou fautuaina ai le aufai faatoaga ina ia toaga e toto le fatu koko Samoa e lelei ma manaia,” o le saunoaga lea a Lealao i luga o le telefoni.

E silia i le $200,000 se vaega tupe mai le Matagaluega o Faatoaga a le malo tele (USDA) ua faamanuiaina ai le matagaluega o Faatoaga a le atunuu, mo le faamoemoe e fesoasoani lea i le faaleleia o le atinae’eina o faatoaga koko i le atunuu.

Na taua e Lealao e faapea, o le tupe lenei o le a fesoasoani ai i le faatupeina o galuega uma e fesoasoani ai i le faaleleia o le atina’e. ma o nisi o galuega o le a mafai ona fesoasoani ai lea vaega tupe e aofia ai le faatauina mai o le koko mai Samoa ma le faamoemoe e toto iinei, faatupeina o galuega mo le faato’aina o fanua e galulue ai tagata mo le totoina o le koko, e pei o le suaina lea o fanua ma le tipi i lalo o laau tetele.

“Ua matou fautuaina le atunuu ina ia toto na o le koko Samoa, ma ia valaau mai i le matou ofisa mo se fesoasoani,” o le saunoaga lea a Lealao.

Ua galulue faatasi le matagaluega o Faatoaga i le teritori ma le Matagaluega o Faatoaga a Samoa, mo le aumaia o le koko ina ia toto iinei.

Na taua e le susuga Reupena Atuatasi o Pava’ia’i e faapea, o le itu e lelei ai le fatu koko Samoa nai lo isi lava ituaiga koko, e le gata e suamalie, e lapopo’a ona fatu ae vave foi ona fua.

“O le isi itu lelei o le koko Samoa, a oo ina fua e fetiitii ona fua e maua, ae mafai foi ona fua i totonu o le 5 tausaga pe afai e lelei le nofoaga e toto ai, e le maluia ae lelei le eleele,” o le molimau lea a Atuatasi.

Fai mai Atuatasi, o le unaia o le aufai faatoaga e toto le koko, o le isi lea alagatupe vave ma lelei mo aiga ma le atunuu, e pei foi ona faamanuiaina ai isi atumotu o le pasefika e aofia ai ma Samoa.

Na taua e kovana Togiola Tulafono i lana polokalama i le faaiuga o le vaiaso na te’a nei, le taua tele o lenei fesoasoani mo le atunuu, o le a mafai ai ona tatala mai le isi alagatupe mo le aufai faatoaga, ona o lea ua manaomia mai maketi i fafo le koko mo le gaosia o le sukalati.

Na taua e le alii kovana e faapea, o le isi mataupu lea o le a talanoaina i le talanoaga ma sui o le malo o Samoa, lea na usuia i le Aso Gafua, o le faamautuina o talanoaga mo le faaleleia atili o tulaga i faatoaga atoa ai ma fefaatauaiga i le va o malo e lua