Ads by Google Ads by Google

Faalauiloa suiga tetele totonu Matagaluega Leoleo

O le aso Faraile na te’a nei, Novema 29, na tuuina atu ai se poloaiga faalaua’itele a le afioga i le Komesina o Leoleo ia William E. Haleck, e faalauiloa ai nisi o suiga tetele i totonu o le Matagaluega o Pupuiga Lautele, po’o le vaega o leoleo.

 

I se vaega o lea poloaiga, na taua ai e Haleck e faapea, o nei suiga ua faia ina ia siitia ma faaleleia ai auaunaga i totonu o le matagaluega, ae talu ai o le taua tele o le vave aloaia o nei suiga, sa ia faalauiloa ai loa le tatau lea ona aloaia suiga nei, i le aso 1 Tesema, 2013.

 

O le ulua’i suiga e aofia ai le aveese mai o le susuga a Captain Lumana’i Maifea mai le puleaina o le Toese i Tafuna, ae tofia e faauluulu i ai le Ofisa o Faamaumauga a le matagaluega, e ripoti fo’i o ia i le Taitai Leoleo ia Maimaga Maiava mo ni faatonuga.

 

O le susuga Captain Fo’ifua Fo’ifua Jr o lo o avea ma Ta’ita’i i le Ofisa o Leoleo i Tafuna, ua alu ese mai lea tofiga ae ua tofia e avea ma pule le tumau o le toese i Tafuna.

 

O Captain John Cendrowski lea o lo o Taitaia le Traffic Division, ua alu ese mai lona tofiga ae tofia e galue i le Ofisa o Leoleo i Tafuna.

 

O Captain Fuamoli Ah-Mu ma Sgt. Simeativa Maloata lea o lo o galulue i le Falepuipui o Tamaiti (Juveniles Detention Center), ua o ese mai la tofiga e pei ona i ai ae ua tofia e galulue i le toese i Tafuna, i lalo o le vaavaaiga a le susuga Capt. Fo’ifua Jr.

 

O Lt. Siaosi Aiono lea sa galue i le vaega o Leoleo Suesue, ua alu ese mai lona tofiga ae tofia e pulea le Traffic Division, i lalo o le vaavaaiga a le ta’ita’i leoleo ia Maiava.

 

O Lt. Pene Taafua o lo o galue i le falepuipui i Tafuna, ua alu ese mai lona tofiga ae tofia e galue i le Falepuipui o Tamaiti, i lalo o le vaavaaiga a le pule le tumau o le toese ia Capt. Fo’ifua Jr.

 

O Lt. Maturo Taafua lea sa galue i le Ofisa o Leoleo i Leone, ua alu ese mai lona tofiga ae tofia e galue i le Vaega o Leoleo Suesue, i lalo o le taitaiga a Cmdr. Lavata’i T. Sagapolutele, ma le suiga mulimuli, o Mara Brown lea o lo o avea ma faufautua mo le Falepuipui o Tamaiti, ua tofia na te vaavaaiga ma pulea polokalame uma mo le Falepuipiu o Tamaiti.

 

I se faatalatalanoaga a le Samoa News ma le afioga i le alii Komesina i le amataga o le vaiaso nei, sa ia faamaonia mai ai nisi o suiga o lo o fuafua le matagaluega e faia faasaga i nisi o leoleo o lo o galulue i le taimi nei, ona o tulaga i amioga le taupulea o lo o aafia ai i latou i le faatinoina o latou tiute.

 

Na faamanino atili e le alii komesina e faapea, o faaiuga ma suiga o lo o fuafua e faia, e aofia ai faaiuga faasaga i ni leoleo ua sauni le matagaluega e faamalolo mai a latou galuega, atoa ai ma se tagata faigaluega e toatasi o lo o tuli sona faasalaga faafalepuipui i le taimi nei, ae o lo o tumau pea ona faigaluega mo le matagaluega.

 

Na faasino e le alii komesina i le Samoa News se faila mafiafia sa i luga o lana laulau, o le ripoti lea o se suesuega sa faia faasaga i se tasi o Leoleo Ta’ita’i o lo o galue i le lala o le Ofisa o Leoleo i Tafuna, susuga Lt. Solovaa Mageo, ma faia ai loa le faaiuga e faamalolo o ia mo le 30 aso e aunoa ma le maua o lona totogi.

 

O le isi alii leoleo mai le ofisa o leoleo i Tafuna ua faamalolo tumau e pei ona faamaonia mai e le alii komesina, o le susuga ia Vaughn Sagapolutele, ma o lea faaiuga sa faia ina ua maea se suesuega lotoifale a le ofisa o leoleo sa faia faasaga ia Sagapolutele e tusa ai o le amio e tatau ona tausisia e le alii leoleo, ma maitauina ai lona le ausia o le tulaga maualuga sa tatau ona i ai lana auaunaga faaleoleo.

 

Mo le susuga a Lt. Mageo e pei ona saunoa le alii komesina, sa i ai le faaiuga e faamalolo o ia ona o le tulaga sa i ai le faaiuga o le suesuega sa faia faasaga ia te ia, ae ina ua latou toe iloiloina le tulaga i lana tautua i le matagaluega, sa faia ai loa le faaiuga o le a le faate’aeseina o ia, ae o le a faamalolo mo le 30 aso e aunoa ma se totogi, a maea lea faasalaga, ona toe vaavaai lea e le matagaluega le tulaga o lana galue ma lana amio i totonu o le matagaluega.

 

O isi alii leoleo e toalua e pei ona saunoa le alii komesina, o i laua ia sa galulue i le toese i Tafuna, lea na tuuaia e le malo i lo la faataga lea o ni pagota e o e faatau mai ni fagupia toe fo’i atu ai i totonu, o le susuga ia Fiti Aina ma Rocky Tua.

 

O Aina ua mae’a ona ta’usala o ia e le faamasinoga maualuga i le moliaga mamafa o lona fesoasoani lea i se pagota e tuua le toese, ma ua faamalumalu le tuuina atu o sana faasalaga i totonu o le 6 masina, ae o Tua e le’i fa’amaonia tuuaiga a le malo faasaga ia te ia, ina ua maea lana faamasinoga iloilo ae tuuina mai ai le faaiuga a alii ma tamaitai faamasino, e le nofosala o ia i moliaga mamafa e lua sa tuuaia ai o ia e le malo.

 

E ui e le o nofosala Tua e tusa ai o tuuaiga a le malo, peitai na faamanino e le alii komesina e faapea, e tusa ai ma suesuega faalotoifale a le matagaluega o leoleo sa faia, ua latou talitonuina ai sa i ai le aafiaga o le alii leoleo lea i tuuaiga sa faia faasaga ia te ia.

 

Saunoa Haleck e faapea, e le toe manaomia e le matagaluega o leoleo ituaiga tagata faigaluega faapenei, ona o lea ua manino i suesuega lotoifale a le matagaluega sa faia, le le toe talitonuina o lenei alii i le faatinoina ai o ona tiute faaleoleo o le toese i totonu o le matagaluega.

 

Ua maea ona tuuina atu e le alii leoleo lea ma lana loia sa laua talosaga i le Faamasinoga o Mataupu tau Pulega a le malo, mo se poloaiga e toe faafoi ai o ia i lana galuega ma ia agavaa i itula faigaluega sa tatau ona totogi ai o ia, peitai e le’i totogiina ona sa faamalolo mai le galuega, a’o faagasolo ai taualumaga o lana mataupu i luma o le faamasinoga.

 

O le tagata faigaluega mulimuli na taua e le alii komesina o le a faamalolo, o se alii fuimu o lo o tuli sona faasalaga faafalepuipui i le toese i Tafuna, ae o lo o tumau pea ona faigaluega i le Vaega Fuimu, le susuga ia Iuliano Tavale.

 

I lalo o le tulafono, e le tatau ona toe faa faigaluega e le malo sana tagata faigaluega ua ta’usala i soo se solitulafono mamafa, po o se tasi fo’i na faasala i le falepuipui mo le umi e silia i le 30 aso.

 

O Tavale o lo o tuli sona faasalaga faafalepuipui e tasi le tausaga, ina ua ta’usala o ia i le solitulafono o lona faatamala ua mafua ai ona oo le maliu i lona atalii sa le malaga i se ta’avale.