Ads by Google Ads by Google

Faalauiloa ni isi o suiga i le Ofisa o le TAOA

Ua faalauiloa e le Faatonusili fou o le Ofisa o Tagata Matutua i le atunuu ni isi o suiga fou ua faia, ina ia mautinoa e fesoasoani ai i tama ma tina matutua o lo o i lalo o le polokalame.

 

O ni isi o ia suiga fou e pei ona faalauiloa e le susuga a Ale Tifimale e aofia ai le i ai lea o isi Ofisa laiti e lua i le itu i Sisifo ma Sasa’e o le atunuu, e fesoasoani ai i le tufatufaina atu o pepa taumafa (food voucher) mo tama ma tina matutua.

 

O le Ofisa i Sasa’e lea ua faamoemoe e faaaoga i ai le maota o Leiato i Fagaitua, ma o i latou uma o lo o alala i Alega e oo atu i Onenoa, faapea ai afioaga i Aoa, Aunuu ma Masausi ua poloaina ina ia aga’i i le Ofisa lea.

 

Ae mo le itu i Sisifo, o le maota o Vele i Pava’ia’i lea ua avea ma nofoaga autu i lea itu o le atunuu, ma o i latou uma o lo o alala i Tafuna e oo atu i Fagamalo, atoa ai Aoloau ma Aasu ua poloaina ina ia aga’i atu i lea nofoaga.

 

Ae mo i latou o lo o alala i le Fagaloa, e aofia ai afioaga e pei o Fagasa, Vatia ma Afono, ua poloaina ina ia aga’i atu i le Ofisa autu i Pago Pago.

 

Saunoa Ale i le Samoa News e faapea, o se tasi o mafuaaga ua manatu ai le Ofisa e faia nei suiga, o le toatele o tama ma tina matutua o lo o alala i nuu mamao i Sisifo ma Sasa’e, latou te faaalu le $4 i masina ta’itasi e malaga atu ai i le Ofisa i Pago Pago mo le pikiina o a latou pepa taumafa e na o le $25 le aofa’i.

 

“O se tupe tele lea e faaalu e nai tagata matutua ona o le pikiina o le pepa ai e na o le $25, o le isi lena mafuaaga ua ou manatu ai, ua tatau fai se suiga ina ia matou fesoasoani atu ai i nai tagata matutua ma le tau o mai mamao i Pago Pago nei,” o le saunoaga lea a Ale.

 

O le aso Faraile o le vaiaso nei, aso 1 Mati lea ua faamoemoe e amata ai suiga e pei ona taua, o le aso foi lea e tufatufaina ai pepa taumafa mo tagata matutua.

 

“Pau le faamanatu i tama ma tina uma o lo o agavaa i lalo o le polokalame, e lelei lou susu i le nofoaga lena ua latalata atu i lou nuu, aua nei galo lou ID e faamaonia ai lou tagata, e le taliaina ni tusi pe afai e te le auai atu e piki lau voucher, e le taliaina fo’i lou alu fua i le isi Ofisa pe afai e le o iina lea ua poloaina oe ete aga’i i ai,” o le fautuaga faatamalii lea a Ale mo tina ma tama matutua.

 

Talu ona tofia e le kovana sili ia Lolo Matalasi Moliga le afioga Ale e avea ma Faatonusili o lenei ofisa, sa ia taua lona taumafai pea e saili ni isi auala e faaopoopo ai vaega tupe mo tagata matutua.

 

“Mai polokalame e 9 sa agavaa i ai tagata matutua mai le malo tele, toe 2 lava polokalame o lo o totoe i le taimi nei, ma o se tasi o faafitauli ua feagai ma nei polokalame e lua, o lo o tumau pea le vaega tupe o lo o tuuina mai i le feterale i tausaga tupe taitasi, e ui o lo o faaopoopo pea i luga le aofai o tama ma tina ua agavaa i le polokalame,” o le saunoaga lea a Ale.

 

E tusa ma le 2,400 le aofai o ‘food voucher’ e tufatufa atu e le TAOA i le silia i le to’a 3,000 tama ma tina matutua o lo o agavaa i le polokalame i le masina e tasi, ma e tusa ma le $61,000 le tupe e faaalu ai.

 

E ese mai i le polokalame lea e maua ai e tagata matutua ‘food voucher’, o lo o i ai foi le isi polokalame o lo o mafai ai ona faa faigaluega le tusa ma le to’a 149 o tama ma tina i ni isi o Ofisa ma Matagaluega a le malo mo le 4 itula i le aso, ae 5 aso o le vaiaso.

 

“O le taimi nei o lo o taumafai pea e saili ni isi auala e mafai ai ona faaopoopo pepa meaai mo nai tagata matutua, talosia ae mafai ona faaopoopo se isi $10 i le tupe o lo o i ai nei, ina ia fesoasoani ai i nai o latou aiga,” o moomooga ia o le alii faatonu.

 

O le mataupu i le faaopoopo lea o se isi $5 i pepa ai a tagata matutua o lo o i ai, e le fou i le faafofoga a tama ma tina matutua o lo o i ai i le polokalame.

 

Na taua e se tasi ona tina o lo o galue i tasi o Toomaga a le TAOA e faapea, ua tele tausaga o talosaga ta’ita’i a le TAOA sa i ai i le alii kovana sa i ai o Togiola Tulafono mo se faaopoopoga, peitai e maea lava le nofoaiga a Togiola i le tausaga na te’a nei e le’i maua lava se faaopoopoga.

 

“E i ai lo’u talitonuga e maea atu foi le nofoaiga lenei e le tupu lava se mea faapena, sei vagana ua toe faaopoopo mai e le feterale le tupe o lo o tuuina mai mo i matou ona faatoa maua lea o se mapusaga,” o le saunoaga lea a lea tina matua, peitai na saunoa Ale e faapea, o se tasi o moemitiga o lo o ia te ia, ia mafai ona faaopoopo se isi tupe mo nai tagata matutua.