Faalauiloa le isi tautua fou a le TAOA mo tagata matutua

Ua a’e se tofa i le afioga i le faatonusili o le Ofisa o Tagata Matutua (TAOA) ia Ale Tifimalae ma lana au taupulega, o le a faaauau le tautua a le latou ofisa i tama ma tina matutua o lo o nofo fale e mana’omia le fesoasoani i le taimi e malaga ai i a latou talavai poo le fia asiasi i ofisa o le malo, ina ia ofo atu le pasi a le Ofisa e piki ma toe momoli ai i latou i o latou aiga.

 

O lea auaunaga fou e pei ona faamaonia mai e le afioga Ale i le Samoa News i le taeao ananafi, o le a amata lea i le aso Gafua, 2 Tesema, 2013 mo le motu atoa o Tutuila.

 

“O lenei auaunaga fou ua faaigoaina o le ‘Escort Service’, ma ua faamoemoe o le a alu atu le pasi a le TAOA i le taeao e piki mai tama ma tina matutua mai o latou maota ma laoa, ona momoli lea i nofoaga o lo o fia malaga i ai, a mae’a, ona toe momoli lea o i latou i o latou aiga i le aoauli,” o se saunoaga lea a le afioga Ale.

 

O lenei auaunaga fou e pei ona saunoa le alii faatonu, o le a faapitoa na o tama ma tina matutua o lo o i lalo o le polokalame a le TAOA, ua ta’i 60 tausaga le matutua pe sili atu fo’i, aemaise lava i latou e vaivai le tamaoaiga, feoa’i i nofoa faataavalevale pe faaaoga fo’i tootoo e savavali ai.

 

“O i latou tonu lava nei o lo o faapitoa i ai le auaunaga fou lenei a le Matagaluega, o tagata e le atoa le malosi o le tino, e faigata ona fesiita’i i luga o pasi ma taavale pe a fia malaga i a latou talavai i le falema’i, po o le fia malaga foi i le faletupe poo isi ofisa a le malo,” o le saunoaga lea a Ale.

 

O le faagasologa la o le auaunaga a le TAOA mo tagata matutua, o le aso Gafua ua faapitoa mo le itu i Sasa’e o le motu nei o Tutuila, ae o le aso Lua ua faapitoa mo le itu i Sisifo.

 

O tama ma tina matutua uma lava o lo o alala i le itu i Sasa’e o le motu, e tatau ona latou faafesootai le Ofisa o le TAOA i le aso Faraile o vaiaso taitasi, e faailoa atu ai le manaoga mo le pasi, ina ia alu atu le pasi i le aso Gafua e sosoo ai ua iloa i latou e tatau ona piki.

 

O le itula e 7:30 i le taeao o aso Gafua uma lava e tuua ai e le pasi le afioga o Tula mo le itu i Sasa’e, ona malaga atu ai loa lea i Utulei ma le falema’i, ae o le itula e 2:30 i le aoauli e toe tuua ai e le pasi le falema’i i Fagaalu, ma faasolo atu ai i le faletupe ma le ofisa o le malo i Utulei mo le toe pikiina o lana pasese, ma toe momoli atu ai loa tama ma tina matutua i o latou aiga.

 

E faapena foi mo le itu i Sisifo, o le 7:30 i le taeao e tuua ai e le pasi le afioaga o Amanave, ma faasolo mai ai i Utulei ma le falema’i mo le momoliina mai o tama ma tina matutua, o le itula e 2:30 e toe fo’i atu ai le pasi e momoli lana pasese i maota ma laoa.

 

“O le talitonuga o lenei matagaluega, e tatau ona maua e nai tama ma tina matutua tautua faapitoa nei, ina ia fesoasoani ai i lo latou soifua maloloina,” o le saunoaga lea a le afioga Ale.

 

Sa ia taua foi e faapea, talu ai e na o le tasi le pasi a le TAOA o lo o i ai i le taimi nei, o le a faaaoga ai isi taavale a le ofisa e faatino ai isi galuega, ae o le a faa avanoa le pasi mo lenei auaunaga fou ma le faamoemoe, e manaomia se isi pasi e fesoasoani ai i lenei auaunaga taua.

 

Comment Here