Ads by Google Ads by Google

Faalauiloa le isi ata tifaga Samoa ua faaigoaina “E lelei le Alii”

Ua taunuu nei i laufanua o Amerika Samoa se tasi o ata tifaga mai Samoa ua faaigoaina, “E lelei le Ali’i”, ma o lenei ata o lo o faaautu i le soifuaga o lo o i ai mafutaga i totonu o aiga i Samoa i le va o ulugalii ma fanau.

 

I se faatalatalanoaga a le Samoa News ma alii o lo o pulea fefaatauaiga a le kamupani sa latou tuufaatasia lenei ata tifaga, le afioga i le Aloalii ia Tofilau Lemafua Kepaoa, sa ia taua ai e faapea, o le afa na afatia ai Samoa i le masina o Tesema 2012, lea na mafai ona toe laveaia ai le atunuu atoa i le aao lavea’i o le Atua, ua mafua ai ona faaautu lenei ata tifaga i lona autu e pei ona i ai.

 

Ua i ai ni isi o le atunuu ua mafai ona o latou maimoa i lenei ata tifaga talu ona taunuu mai i le vaiaso na tea nei.

 

O le autu o le ata tifaga o lo o faamanino mai ai le mafutaga a le ulugalii Samoa, amata mai lava i le taimi na faatoa masani ai seia oo ina faamanuia i ai le Atua e ala i fanau, ma faaiu ai loa i faafitauli ua aafia ai totonu o le aiga.

 

“O lo o autu le ata i le ulugalii na fasi e le tamaloa lona toalua, ae aafia ai atu ma si ona atalii ma i’u ina maliu ai, lona uiga o le feau o lo o momoli atu e lenei ata tifaga, ua aafia fanau ona o le va o matua i totonu o le aiga,” o le saunoaga lea a Tofilau.

 

O le kamupani fai ata tifaga na o latou tuu faatasia le ata tifaga lenei, o le kamupani lava foi lea na o latou tuu faatasia le ata tifaga ua toatele le atunuu ia fiafia i ai, le “Silamanino.”

 

O lenei ata ua maea ona pasia e le Komisi e pasiaina ata tifaga i totonu o Samoa mo le faalauiloaina, ma ua faatulaga mai foi lenei ata i le tulaga o le ‘G’, lona uiga e aoga e matamata ai le aiga atoa.

 

I le taunuu mai ai o lenei ata tifaga i le atunuu i le vaiaso na te’a nei a’o lumana’i ai le faamanatuina o le Aso Maliu, ua tuuina faatasi mai ai ma se talosaga mai se sui o le kamupani o lo o tuufaatasia lenei ata tifaga, i le mamalu o le atunuu o lo o fiafia e fai faagaoi kopi o ata tifaga mai Samoa ma faatau atu i se auala faagaoi, ina ia taofi nei loa lea amio e le lelei.

 

Saunoa Tofilau e faapea, ua i ai le taui ua tapena e le kamupani mo soo se tasi na te faailoa atu ni faamatalaga e faatatau i ni isi o lo o latou faia lenei amio o le fai faagaoi o kopi o lenei ata ae faatau atu i se tau maualalo.

 

Soo se tasi e fia maua sana ata tifaga fou, faafesootai le afioga Tofilau i le numera o le telefoni feavea’i o le 252-0043.