O le vaiaso na te’a nei na faalauiloa ai e le afioga i le kovana sili ia Lolo Matalasi Moliga  isi  tofiga, mo tofi Faatonusili o Ofisa ma Matagaluega a le malo, faapea ai totino o ni isi o Komiti Faafoe.

O ni isi o ia tofiga e aofia ai le toe filifilia o le tofa a Lealao Melila Purcell e avea ma Faatonusili o le Matagaluega o Faatoaga, o se tofiga sa ia tauaveina i le nofoaiga a kovana Togiola Tulafono i le tausaga ua te’a.

O le isi tofiga e aofia ai le filifilia o le tofa Velega Savali Jr, lea sa avea muamua ma Teutupe a le malo i tausaga ua fano, mulimuli ane avea ma senatoa mo Manu’a i le nofoaiga na mavae atu nei a le Fono Faitulafono, e fai ma Komesina o Palota, e sui tulaga i le afioga i le Maopu ia Soliai Tuipine Fuimaono lea ua avea nei ma Senatoa mo le Itumalo o Ituau.

O le isi tofiga e aofia ai le tofia o le susuga a Timothy Jones, lea sa tauva mo le tofi kovana i le faiga palota tele na mavae atu nei, e avea ma Faatonusili o le Ofisa o le Enetia (Territorial Energy Office); ma le tofiga lona fa mo Catherine Dora Aigamaua-Saelua e avea ma Faatonusili o le Ofisa o le Paketi a le malo.

O Catherine, ua loa tausaga o avea ma tagata faigaluega i lea Ofisa taua a le malo, sa ia tauaveina foi le tofiga o le sui faatonusili mo lea Ofisa, ina ua faatoa tofia o ia e le alii kovana i lenei tofiga taua.

E ese mai i tofiga o Faatonusili, ua faalauiloa foi e Lolo totino o Komiti Faafoe o le Litaea ma le Ofisa o Femalagaaiga, e sui tulaga i Komiti Faafoe o lo o i ai nei.

O le Komiti Faafoe la mo le Vaega o Femalagaaiga ua tofia i ai le susuga ia Frank Gaisoa Sr lea ua avea nei ma Taitaifono; Fred Memea; Anitele’a Misioka; Moatulu’i Sipili Fuiava ma Sheri Butler.

Ae mo le Komiti o le Litaea ua tofia i ai Talalemotu Mauga, lea o lo o avea ma Teutupe a le Fono Faitulafono; John Marsh lea sa avea ma Teutupe i le komiti a Lolo ma Lemanu mo le palota na mavae atu nei; o Avamua Dave Haleck o se ali’i faipinisi; Su’a Schuster, se tasi o tamalii faipisinisi i le atunuu; ma Brandt Judy, lea foi sa avea muamua ma totino o le Komiti i le tele o tausaga ua fano.

Ua i ai le faamoemoe o tofiga fou ua faalauiloaina nei, o le a tuuina atu i luma o le Fono Faitulafono mo le faamaoniaina, pe afai ae toe a’e mai galuega a le Fono mai lana malologa e 3 vaiaso i le aso 4 o Mati, 2013.

O ni isi ia o tofiga fou a le alii kovana sa ia faalauiloa i luma o lana kapeneta i le fonotaga sa faia i le aso Faraile na te’a nei, i le potu fono a le Matagaluega o Galuega a le malo i Tafuna.