Faalauiloa i fanau aoga matata eseese e maua ai galuega

O le aso a’oga ananafi i Tafuna High sa latou fa’ailo ai i le fanau a’oga “Matata Eseese e mafai ona maua ai avanoa faigaluega,” pe a mae’a le olaga a’oga i potu a’oga i a’oga maualuga, Kolisi ma Iunivesite fo’i.

 

“O lenei taumafaiga, ia tima’i le fanau e fa’aauau a’oa’oga maualuluga i Kolisi ma Iunivesite e mautu atili ai agava’a mo so’o se matata ua manatu e fia faigaluega ai, peita’i, a uma fo’i le A’oga Maualuga ae ua manatu e amata faigaluega, ia iloa lelei avanoa ua mafai ona talosaga i ai.” O se tala lea a le tama’ita’i o ta’ita’ia le itu o a’oa’oga pisinisi a le THS Faitele Aiono.

 

O le aofaiga’iga o potu a’oga sa fa’atumu i lea polokalama fa’apitoa ananafi e 32 i totonu o le a’oga, e aofia ma le faleta’alo ma potu a’oga o le JROTC. O potu a’oga o lea polokalama sa fa’atino ai tima’iga a le Vaega Au, Army, Coast Guard ma le Marines. O le faleta’alo, sa fa’afeiloa’ia ai le SOFIA le fanau a’oga i le piliota muamua, ae fa’ai’u i le vasega a le Wellness mai le Land Grant ASCC i le piliota lua.

 

O iai matata uma lava e afua mai matagaluega eseese o le Malo Amerika Samoa ma pisinisi tumaoti, e aofia ai ma le “Musika & Fa’aili” ma “Tagape’a,” o nisi ia o mea sa iloga ona fou fo’i i le lisi o tomai ua vala’auina i lenei tausaga.

 

Na suia mai le Kolisi Tu’ufa’atasi ma le Remington College ma le ASCC Land Grant ina ia toe tima’i tamaiti fa’au’u mai a’oga maualuluga, e fa’aauau a’oa’oga i Kolisi ma Iunivesite ae ‘aua le vave fia faigaluega, ae le’i maua’a a’oa’oga mo’omia mo avanoa faigaluega lelei toe lelei totogi.

 

Na i ai le vaega a le McConnell Dowell, ASPA, Public Works, ASTCA ma isi matata fa’apena, lea e i ai lava avanoa faigaluega mo le fanau e mae’a a’oga maualuluga.

 

O le vaega fo’i a le School Lunch sa o’o ane aua o le Au Kuka fo’i e mafai ona agava’a i ai le fanau a’oga maualuluga ua maua tipiloma, fa’apea ma le Ofisa o Palotaga a le tatou malo. E le’i i ai se tasi mai le McDonald i lenei tausaga, ae sa suia fo’i le vaega o Au Fa’asalalau e le 93KHJ ma le tatou nusipepa nei.

 

Na i ai fo’i sui o le Matagaluega o le Soifua Maloloina, lea e mafai ona faigaluega ai i le avea ma tama’ita’i tausima’i, po’o le saili o fa’ailoga Fa’afoma’i. O kamupani Inisiua sa suia lea e le NPI ma le Ofisa o Inisiua o tagata faigaluega a le malo “Workmens Compensation” ae o le ERATE a le DOE sa avea ma nisi o tima’iga aoga i le fanau, ina ia sogasoga i tekonolosi fa’aonaponei, l;ea e matele ina fiafia i ai i latou e afua mai Komipiuta e o’o lava isi masini laiti eseese e fa’aaogaina i totonu o ofisa eseese.

 

Na i ai le Ofisa o Tagata faigaluega a le Malo, e fa’ailoa i le fanau, ituaiga tomai e mo’omia tele i galuega ua i ai nei a le Malo. “I le avea o oe ma faia’oga, ua mo’omia fa’ailoga maualuluga! Afai e na’o le tipiloma mai Tafuna e fa’atumu ai lau pepa talosaga mo se avanoa, e le faigofie ona e maua se galuega e le palapala ai ou lima.

 

Ina ua mae’a piliota e lua, sa faia lea o le fa’aaliga taleni e fa’afiafia ai i latou na avea ma faia’oga i piliota e lua a le a’oga atoa i Tafuna, ma le latou ‘aiga fiafia, ma fa’amae’a ai le latou aso o “tima’iga mo ni tomai mo’omia mo ni galuega e fia tautua ai le fanau i le lumana’i.”

Comment Here