Faalauiloa galuega e manuia ai le atunuu mai le gataifale ma le sami

I le fonotaga o le Komiti Fa’afoe o le Marine Sanctuary a Amerika Samoa sa fa’ailoa mai ai i a latou i’ugafono nisi o galuega fa’atino ua mae’a aiaia ma tapena ae a so latou sao e fa’aaoga ai taimi o tu’uaga a le fanau a’oga e fai ma taimi e avatu ai fe’au taua tele a’otau ai fanau, ia latou iloa le aoga tele o fa’asao o puna’oa o le gataifale fa’atasi ai male vaomatua.

 

Na mae’a fono le Marine Sanctuary ma le National Park a Amerika Samoa i le masina o Aperila ma sa latou fa’ataoto ai le auivi o le taumafaiga ina fa’aaoga le tu’uaga lenei o a’oga a le fanua a’oga i a’oga maualuluga ina ia latou asiasi i le nofoaga fou o le MSAS i Utulei, ma ia fa’aosofia ai le fiafia i fanau e fa’asao le sosia i o tatou laufanua fa’atasi ma puna’oa e tele o lo’o i le gataifale.

 

O se tasi o fanau sa ia maua lea ituaiga o avanoa o Jalen Jennings. E 6 masina o galue ai o ia i le Marine Sanctuary ma sa ia fa’atautaia le tele o asiasiga ane i le nofoaga, fa’amatala ia i latou le aoga tele o le fa’asao i ana tautua ua ofoina mo le fa’aleleia o le gataifale, ae o lea ua tu’ua e ia lea galuega fa’ata’ita’i, ae malaga atu e fa’aauau a’oa’oga i le Iunivesite i Niu Ioka ona e fia maua lona tikeri i le communications. Ua fa’ailoa mai, o le a faateleina nisi avanoa mo le fanau a’oga i tausaga o lumana’i ai.

 

Ua auau fa’atasi nei le NOAA ma ana pa’aga o latou galulue fa’atasi ina ia fa’atula’ia se asiasiga i le Motu o Swains i le masina o Aukuso, 2013. O le mea taua e ao ina sailia, o nisi o mea o lo’o i ai pea i le motu lenei e mafai ona maua ai fa’amaumauga taua i le taimi na aina ai le motu ma mea sa fa’aaogaina i lena vaitau e tagata na nofoia lea motu o el atu Samoa.

 

O le motu lenei sa fai ma to’omaga i tagata folau, ona o le mamao ese mai fo’i o le atu Samoa. O nisi o va’a sa tuta ai ma ua faaleagaina ai, o lea e sailia o latou toega mo nei fa’amaumauga aoga tele.

 

O lea faiga, ua una’ia malosi ai le soifua maloloina lelei mo tagata uma o se fesoasoani taua, ma e tatau ona soifua le tagata e fa’aaoga ma fiafia i lona si’omaga matagofie.

 

- O nisi mea ua fa’atulaga, o le Ocean Star Youth Program lea e fa’atautaia ia Iulai 2 se’ia o’o ia Aukuso 1, 2013. O le polokalama lea e mafai ai ona faia su’esu’ega fa’apitoa mo poloketi fa’atino a le fanau, ma e fesoasoani fo’i i ai le fanau o lo’o fa’afaigaluega fa’ata’ita’i e le MSAS i lenei tu’uaga o a’oga.

 

- Ua fa’atulaga fo’i le Apitaga i Manu’a mo le masina o Iulai aso 15 se’ia o’o i le aso 18, 2013, mo alo uma o le Manu’atele. O le Apiataga mo Tutuila e fa’atautaia lea i le aso 23 Iulai se’ia o’o i le aso 25, 2013. O nei Apitaga e fa’atautaia lea e le Le Tausagi.

 

- O le soso’oga o le fa’aaliga tele a le MSAS e fa’atautaia e nisi o sosaiete ma autalavou e fa’afiafia ai turisi e asiasi mai e ala i Va’a Meli tetele ua fa’atulaga e toe tupu lea mea ia Aokuso 23, 2013.

 

- Ua toe fa’atulaga e amatalia fo’i vasega fou mo le a’oa’oina o le Saeanisi o le Vasa ma le a’otauina o fanau talavou i le a’au i le amataga o le isi tausaga a’oga fou ia Aukuso 2013.

 

- O le Polokalama e fa’atautaia e le DOC ua fa’aigoaina o le “PALS” [People, Air, Land & Sea] e amatalia lea ia Novema 4-8, 2013.

 

Ua i ai fo’i ata ua mae’a tu’ufa’atasia e maimoaina ai le matagofie o le tatou Puna’oa o le Gataifale ua i ai nei, ae maise i lona soso’oga fou ua mae’a pasia ma fa’atula’ia, lea ua o’o atu ai i le Motu o Swains.

Comment Here