Ads by Google Ads by Google

Faailoa popolega nofoaga o le a fausia ai faleaisa StarKist Samoa

Ua faaalia e le talitaifono o le Asosi o Faipisinisi i le atunuu sona popolega i le tulaga malupuipuia ma le saogalemu o le gataifale ma le sami, i le fuafuaga a le StarKist Samoa lea ua faalauiloa mai, mo le fausiaina lea o lana Faleaisa i luga o le uafu tele i Fagatogo, e ui o loo matua lagolagoina e le susuga David Robinson le fuafuaga mo le faalauteleina o le tautua ma le auaunaga a le kamupani i’a.

O se tasi atugaluega o le susuga Robinson e agai tonu i le tulaga lea, o le nofoaga lea o loo tanuu mai ai vaa meli ia o loo malaga mai ai turisi i totonu o le atunuu.

Na faalauiloa e kovana Togiola Tulafono i le vaiaso na tea nei, le sainia lea e le  malo ma le kamupani o loo pulea le StarKist Samoa se maliliega e aofia ai ma le sainia o se lisi mo le faaaogaina o se vaega o lea nofoaga e 42,000 sikuea futu e fausia ai le Faleaisa.

O le vaega lea o le a fausia ai le Faleaisa e taoto tonu lava i le va o le Ofisa o Pulega  o Uafu ma Taulaga ma le uafu lea e taunuu mai ai vaa laiti.

Saunoa Robinson, o se tulaga faagaeetia ina ua faalogo atu o loo i ai le faanaunauga o le StarKist Samoa e faalautele lana auaunaga, e ala lea i le fausiaina o le Faleaisa, atoa ai ma le vaavaai atu o loo i ai ma le lagolago a le malo.

“Mai le itu tau tagata faipisinisi, matou te matua lagolagoina lenei atinae ina ia mafai ai ona maua se isi itu lelei mo le toe faaleleia o le tamaoaiga o le atunuu,” o le saunoaga lea a Robinson.

“Peitai o le popolega o loo i ai, e ono le talafeagai le nofoaga lea ua faamoemoe e fausia ai lea atinae, mai le tulaga o le malupuipuia lea o le siosiomaga, e le o se atina’e foi e ono mafai ona fausia i se nofoaga o loo fai ma taunuuga o vaa meli o loo malaga mai ai turisi i le atunuu, atoa ai ma le ono i ai lea o ni fela’uaiga o uta mai le kamupani aga’i atu i le uafu,” o le saunoaga lea a Robinson.

O le nofoaga lea ua faamoemoe e fausia ai le Faleaisa a le kamupani i’a, e foliga mai e fai lava si taugata o le faatupeina o lenei galuega, ona o se nofoaga sa tanu lea ua tuuina atu e  le malo, ma e moomia le mautinoa o  le malosi ma le mautu o le fale o le a fausia ai.

Na taua foi e Robinson le i ai o se isi nofoaga i tafatafa o le Vaega Tosovaa i Satala sa ofoina atu i le kamupani e fausia ai le Faleaisa, ma e le o se nofoaga e mamao mai le tulaga o loo i ai le StarKist.

Saunoa Robison, o ia foi o le Sui Taitaifono o le Komiti Faafoe a le Vaega Tosovaa i Satala, o le nofoaga lea sa i ai le manatu o le nofoaga pito sili lea ona lelei ma talafeagai mo le fausiaina o le faleaisa a le kamupani.

E fia faailoa atu foi e le Samoa News e faapea, e tusa ai ma se saunoaga a le alii kovana, ua tuuina atu nei se talosaga a le malo lotoifale i le Matagaluega o le Initeria, mo se tupe e fausia ai le Faleaisa.

E le o matua manino mai foi i le taimi nei le uiga tonu o le maliliega lea ua maea ona sainia e le kamupani i’a ma le malo mo le faleaisa o loo fuafua, pe o se faleaisa fai faatasi a le malo ma le kamupani i’a.

Saunoa kovana Togiola Tulafono, o le autu o lenei taumafaiga, e le gata ia fesoasoani ai i le kamupani i’a ina ia tumau pea le tulaga lelei mo ana auaunaga, ae ia maua ai foi ni galuega mo le atunuu.

faaliliu Ausage Fausia