Faailoa Lolo taua aoaoga ma galuega mo Amerika Samoa

O le faavaeina o se Vaega Faapitoa latou te fuafuaina auala ma fuafuaga mo aoaoga ma galuega fou i totonu o Amerika Samoa, o se tasi lea o vaega na taua e le alii kovana ia Lolo Moliga o lo o ave ai pea le faamuamua a le faigamalo mo le lumana’i manuia o tupulaga talavou.

 

I se tusi na tuuina atu e le alii kovana i faatonusili ma faauluuluga a le malo i le aso 9 Ianuaru 2014, sa ia faataotoina ai le taua o le faavae o lenei Vaega Faapitoa, ina ia galulue i le faaleleia o aoaoga atoa ai ma le sailiga o galuega fou mo tupulaga o le atunuu.

 

Na taua e Lolo e faapea, o se fonotaga i tulaga tau aoaoga a Amerika sa faia i New Mexico i le tausaga na te’a nei, na faataua ai ta’iala ma le manaoga i le tatau lea ona atina’e auala e faaleleia ai aoga ma aoaoga faamasani (training), ma le manaoga o le faaleleia lea o le tamaoaiga o le atunuu.

 

“O lo o tuuina atu atoatoa e Amerika Samoa lana lagolago faatasi ai ma isi teritori ma setete o le malo tele, i le faamalosia lea o le feau ma ta’iala i le unaia o le faia lea o se isi amataga fou ma lelei mo aoaoga,” o le saunoaga lea a le alii kovana.

 

O le faatula’iina o aoaoga fou e pei ona faamama e le alii kovana i lana tusi, o le fesoota’i lelei lea o auala uma o lo o faia ai aoaoga i le vaega o aoga, e pei o le fesootai o aoaoga mai vaega K e o atu i le vasega 12, ma afua mai ai loa iina ona faatulaga aoaoga maualuluga, ma fesoasoani ai loa i le tamaoaiga o Amerika Samoa, e ala i le auai atu o fanau aoga i le sailia o latou faailoga i totonu o aoga, ma faauu mai ai i togi lelei.

 

Ina ia faatinoina ai lenei manaoga taua e pei ona saunoa le alii kovana, e manaomia e le malo o Amerika Samoa se vaega tupe e faatinoina ai lenei manaoga, ina ina atina’e ai pea tulaga o aoaoga i totonu o le teritori.

 

E tusa ma le $10 miliona se vaega tupe fesoasoani (grant) mai le Matagaluega o Leipa a le malo tele (USDOL), o lo o talosagaina e le Matagaluega o Fefaatauaiga ma Alamanuia a le malo o Amerika Samoa (DOC), e fesoasoani ai mo lenei faamoemoe, ma o ta’iala e mafai ai ona faamanuiaina Amerika Samoa mo lea vaega tupe tele e faamutaina lea i le aso 27 Ianuari 2014.

 

O le vaega tupe fesoasoani e pei ona saunoa le alii kovana, o le a mafai ai ona maua se vaega tupe e fesoasoani ai i le faaleleia atili o tulaga tau aoaoga i totonu o Amerika Samoa, aemaise ai le faaleleia o tulaga o aoga maualuluga i totonu o teritori ma setete e pei ona aafia i fuafuaga faataoto a le alii peresetene ia Obama.

 

O se tasi la o poutu e mautinoa ai le agavaa o Amerika Samoa i lenei vaega tupe, o le faia lea o ni polokalame e mafai ai ona aloaia tagata faigaluega ma maua agavaa, ma mafai ai loa ona faa faigaluega e ofisa e pei o le falema’i o le LBJ ma le Matagaluega o le Soifua Maloloina fanau faauu nei, ina ia mautinoa ai ua talafeagai tulaga i tusi faamaonia e pei ona latou tauaaoina e mafua mai ona o polokalame faaauau i tulaga tau aoaoga.

 

Na taua e le alii kovana e faapea, e tatau i ofisa uma ma matagaluega a le malo o lo o i totonu o le Vaega Faapitoa e pei ona tofia, ona auai i fonotaga ma tali i manaoga uma o lo o tuuina mai e le USDOL, ina ia mafai ai ona faamanuiaina le malo i lenei vaega tupe, ona ua utiuti le taimi faatulagaina.

 

O ofisa o le malo ma o latou sui o lo o auai i totonu o lenei Vaega faapitoa, e aofia ai Maria Salevao o lo o faauluulu i ai le polokalame o faufautua, ma Dr. Amy Blizzard o lo o galue i le tuu faatasia o ripoti ma faamaumauga a le polokalame.

 

Mo le Kolisi Tuufaatasi o le susuga ia Dr. Seth Galea’i; o le Matagaluega o Tagata Faigaluega a le malo e aofia ai le Faatonusili ia Sonny Thompson; o le falema’i o le LBJ e aofia ai le alii pulesili ia Joe Davis-Fleming; ma le faatonusili ia Motusa Saoluaga Nua o le Matagaluega o le Soifua Maloloina.

 

“Faamoemoe o le a outou tuuina atu uma i le Matagaluega o Fefaatauaiga ma Alamanuia  faamaumauga uma o lo o latou moomia, ina ia manuia ai le talosaga e pei ona fuafuaina,” o se vaega faaiu lea o le saunoaga a le alii kovana.

Comment Here