Ads by Google Ads by Google

Faailoa Gaoteote i le Kovana auala Fono e fesoasoani ai LBJ

Ao tau fai saili ai e taitai o le malo ma le Fono ni auala e fesoasoani ai i le tulaga pagatia tau tupe lea ua feagai nei ma le falemai, atoa ai ma se auala e taofia ai siitaga i pili a le falemai lea ua faalauiloa mai, o le vaiaso na tea nei na tuuina atu ai e le peresetene o le Senate i le Kovana Sili, se fuafuaga a le Fono e mafai ai ona foia lenei faafitauli, e aunoa ma le toe tulai mai ai o se isi avega i le atunuu.

I se tusi na tuuina atu e le afioga Gaoteote Palaie Tofau ia Togiola Tulafono i le vaiaso na tea nei, o loo ia faailoa atu ai se faaiuga mai taitai o le fono e tusa ai o auala e mafai ona fesoasoani atu ai i le falemai.

Na taua e Gaoteote, ua sauni le Fono Faitulafono e faaulu ni pili e fesoasoani ai i le falemai, ma o nei pili e leai ni lafoga o aafia ai, ma ua faamoemoe foi le Senate o le masina i Ianuari e faaulufale ai nei pili i luma o le maota.

O pili nei ua manatu le Senate, e le gata o le a foia ai le faafitauli mo le taimi nei, ae o le a mafai foi ona fesoasoani ai i le falemai i Fagaalu mo le faaauauina pea lea o ana galuega mo le lumanai.

E 5 pili tupe ua taua e Gaoteote o le a faaulu i luma o le Senate i le masina o Ianuari 2012.

O le pili tupe muamua o le $3 miliona mai le Teugatupe mo Taui o Faalavelave Faafuasei. Saunoa Gaoteote, o le vaega tupe lea o le a faatumu ai le vaega tupe lea e lei totogiina atu e le malo mo le falemai i le tausaga tupe 2011.

Na taua e Gaoteote, e tusa ma le $4 miliona le paleni sa i ai i le teugatupe lea i le faletupe o Hawaii i le masina o Aperila 2011. O loo atagia mai foi i faamaumauga mai totonu o le teugatupe le faatupulaia pa lea o lea teugatupe i le $100,000 i masina taitasi.

O loo taua foi i le ripoti le totogiina atu lea e le malo o le tupe e $283,000 i totonu o masina e 7 ia i latou sa talosaga mo lenei penefiti, ma e i ai le talitonu o le alii peresetene o loo tupu pea lea teugatupe.

Na faapipii faatasi ma le tusi a le alii peresetene i le kovana le ripoti i faamaumauga o le teugatupe a le malo mai le faletupe ina ia faamaonia ai lea tulaga.

“O le pili tupe lea o le a mafai ai ona maua se fesoasoani tupe faanatinati mo le falemai, e aunoa ma se isi faaopoopoga e toe faaee atu i tagata totogi lafoga, o le a mafai ai foi e le falemai ona faatino ona tiute tauave e aofia ai le faafetauiina lea o tupe mo le polokalame a le Medicaid mai le tausaga tupe 2011.

O le pili tupe lona lua e pei ona taua e le alii peresetene ia Togiola, ua fuafua e faatupe mai i vaega tupe ia e totogi atu e le malo i totonu o le teugatupe mo Taui o Faalavelave Faafuasei.

Saunoa Gaoteote, o se tasi o atugaluga e pei ona tulai mai i le ripoti a le Suetusi e faatatau i le totogiina atu e le malo o vaega tupe i totonu o le teugatupe lea, o loo taua ai le leai lea o se fuafuaga maoti faataoto e faavae ai le totogiina atu o le fesoasoani a le malo i totonu o lenei teugatupe.

O le pili tupe lona tolu ua faamoemoe e faatupe mai i tupe mama a le malo mai le tausaga tupe 2011, i le aofai e $4.9 miliona, lea e pei ona taua i le ripoti a le Teutupe ia Magalei Logovii, i le ripoti sa tuuina mai mo le kuata lona fa o le tausaga tupe 2011.

Saunoa Gaoteote i lana tusi ia Togiola, o le aso 21 Oketopa na taua ai i le ripoti a Magalei se tupe mama a le malo e $6.9 miliona mai totonu o teugatupe faalotoifale, ina ua faaopoopo i ai isi tupe maua, ma faailoa mai ai loa le $4.9 miliona le tupe mama e ono maua e le malo.

O le pili tupe lona fa e pei ona taua e le alii peresetene, o le a faatupe mai lea i le vaega tupe lea o loo tipi atu e le malo i totonu o le ASGERF, ina ia faaitiitia le tupe o loo totogi atu e le malo mai le 8% i le 6.71%, ina ia mafai ai ona maua se isi fesoasoani mo le falemai.

Na taua e Gaoteote, afai o le a tuuina atu lea fesoasoani mo le falemai, o le a maitauina le leai o se isi siitaga e manaomia mo le atunuu.

O le pili tupe mulimuli e $1 miliona mai le teugatupe o le Inisiua a le malo lea e tusa ma le $1.9 miliona le aofai o le paleni o loo i ai i le taimi nei, e pei ona taua i le ripoti o le paketi 2012, mai le paketi a le Ofisa o le TOFR.

“Ou te talitonu ma le loto atoa o pili tupe nei ua fuafua i ai le fono, o le a mafai ona fesoasoani e foia ai le faafitauli ua feagai nei ma le falemai, ma, e mafai ona faatinoina nei fuafuaga uma pe afai ete finagalo ma lagolago pili tupe e pei ona faailoa atu,” o le saunoaga lea a Gaoteote ia Togiola.

Na faailoa foi e le alii peresetene  i le kovana e faapea, afai e faaauau pea lava pili a le falemai, o le a le mafai ai ona foia le faafitauli tau tupe o loo tulai mai ai.