Ads by Google Ads by Google

Faailoa e le malo Aiga Fetu Auro’ i le atunu’u

O le po o le aso Lulu na tea nei na tauaao atu ai e Kovana Togiola Tulafono ni laisene taavale ma ni meaalofa i aiga o nisi o fitafita ma leoleo na maliliu ao faatinoina o latou tiute, e aloaia ma manatua ai pea la latou taulaga ola sa ofoina mai o le atunuu i le puipuiina lea o le filamu ma le saolotoga o Amerika ma Amerika Samoa, faapea ai le lalolagi atoa.

E na o le toalima i latou sa maliliu ao tautua mo le malo na aloaia o latou suafa i le po o le aso Lulu lea na tatala aloaia ai le Polokalame o Pesepesega o le Kerisimasi a le malo i le Malaeoletalu, ae o le toatele lea na mafai ona tauaaoina atu i ai a latou faailoga i se sauniga sa faia i le aso ananafi, lea sa faapolokalame e le Ofisa o le alii kovana.

Saunoa le alii Kovana, o lenei taumafaiga, o se auala e faailoa atu ai e le malo ma le atunuu le agaga faafetai i aiga o i latou ua maliliu a’o tautua i le taua atoa ai ma le galuega faaleoleo, ina ia manatua ai pea la latou tautua mo Amerika Samoa, e pei foi ona faia e isi setete o le malo o Amerika.

“O laisene taavale nei o le a tuuina atu i aiga o fitafita na maliliu i le taua, atoa ai ma aiga o leoleo na tagatavaleina ma maliliu ao faatino ai o latou tiute faaleoleo, ina ia aloaia ai la latou tautua i le malo ma le atunuu, ma ua taua ai i latou o Aiga Fetu Auro,” o le saunoaga lea a le alii  kovana ao lunanai ai le tauaaoina atu o faailoga i aiga o i latou e toalima na faamanuiaina.

“O le agaga ia faataua le tautua toto sa ofoina mai e nei alo, mo le latou tautua aoga i le atunuu ma le puipuiga o le saolotoga ma le filemu o tagata uma.”

“Ua tatau ai foi ma onomea ona tuuina atu le agaga faafetai a le malo ma le atunuu, ma faataua ai tama fanau a Amerika Samoa, e ala i le latou tautua ua toesea ai soifua ona o le faamaoni i le galuega sa tauto ai,” o le saunoaga lea a le alii kovana.

O i latou e toalima na aloaia i le sauniga lea sa faia i le po o le aso Lulu na tea nei, e aofia ai le tamaitai ia Sgt. Tina Time ma Sgt. Frant Tia’i, o fitafita mai le Ami Faaleoleo a Amerika Samoa, na maliliu mai le taua i Iraq ao tautua ai mo le malo.

O le isi toatolu o alii leoleo na maliliu ao faatinoina o latou tiute mo le puipuiga o le saogalemu lautele, e pei o le susuga ia Sa Fuimaono, Fasi Taase ma Lt. Det. Lusila Brown.

Na agai atu matua, o fanau ma taito’alua o i latou nei mo le tauaaoina mai o laisene taavale ua manatu le malo e avea o se meaalofa mo i latou, ma o ia laisene taavale o le a faafou lava i tausaga uma e aunoa ma se totogi e pei ona saunoa le alii kovana, ona o le manatu ia avea lea auala o se meaalofa faatauvaa a le malo e tusa ai o le tautua a i latou ua maliliu.

Sgt. Tina Time- O  le tamaitai fitafita ia Sgt. Tina Time, o le ulua’i fitafita tama’ita’i lea mai Amerika Samoa na maliu a’o tautua ai i totonu o vaega ‘au a le malo tele, ina ua a’afia i se faalavelave i le aai o Cedar i Iraq i le aso 12 Tesema 2004 ma maliu ai lava, ina ua faatoa 22 tausaga o lona soifua. O Sgt. Time sa i totonu o le vaega o le Transportation Company, lea sa faamautu i Tucson i Arizona.

Sgt. Frank Tia’i- O le alii fitafita ia Sgt. Frank Tia’i, na maliu i le aso 17 Iulai 2005 i le aai i Baghdad i Iraq, ina ua pa se pomu i tafatafa o le vaega sa galue ai ma maliu ai, o ia foi le uluai fitafita mai le Ami Faaleoleo a Amerika Samoa na maliu ao tautua i le taua i Iraq ina ua 45 tausaga o lona soifua.

O Sgt. Tia’i sa i totonu o le vaega o le Army Reserve’s 100th Battalion, 442nd Infantry mai Fort Shafter i Hawai’i.

Sa Fuimaono- O le alii leoleo ia Sa Fuimaono ma malemo i le sami ao ia taumafai e faasao mai le soifua o se alii ‘ona sa taumafai e pule i lona ola, e ala lea i le faatafea o ia i le sami. Na mafai ona toe faasaoina mai le ola o lea alii ae maliu ai le alii leoleo ia Fuimaono i le masina o Iuni 1998, ina ua faatoa 31 tausaga o lona soifua.

Lt. Det. Lusila Brown- O le alii leoleo ia Lusila Brown na maliu ina ua tagatavaleina o ia i le aso 22 Iulai 2010 i luma o le fale faamasino le tumau i Fagatogo. O Lt. Brown sa i ai faatasi ma nisi alii leoleo mo le mataituina lea o le saogalemu ao faagasolo ai le faamasinoga iloilo o se alii sa tuuaia i le umia ma le faapaina o se a’upega malosi, lea e lei mafai ona faamaonia e le vaega iloilo iuga.

O le alii o loo tuuaia i le maliu o Lt. Brown o loo taofia pea o ia i le toese i Tafuna i le taimi nei, o loo molia i le fasioti tagata i le tulaga muamua, atoa ai ma isi moliaga mamafa.

Fasi Taase- O le susuga i le alii leoleo ia Fasi Taase na maliu ina ua agai atu e faatoa filemu se vevesi na tulai mai i le fale kalapu o le Tepa Tasi i Pago Pago i le masina o Iuni 1981, ae osofaia ai o ia e se tagata ma maliu ai.

Na faamaonia mai e se tasi o ona alo i le Samoa News i le aso ananafi, sa tiute le susuga i le alii leoleo ia Taase i le taimi na tupu mai ai lenei faalavelave, lea na i’u ai ma lona soifua.

O le po anapo na faataunuuina ai le isi sauniga e tauaao atu ai faailoga taualoa i aiga o fitafita uma na maliliu ao tautua i vaega au a le malo tele o Amerika.