Ads by Google Ads by Google

Faaauau suesuega Leoleo i le talepeina faleaoga Leone

E oo mai lava i le taimi nei o lo o faaauau pea suesuega a le Matagaluega o Leoleo, i le faalavelave lea na osofaia ma faaleagaina ai e ni isi potu aoga o le Aoga Maualuga a Leone i le vaiaso na te’a nei, ma faaleaga le tele o mea aoga e aofia ai ma le potu o lo o faaaoga e le vaega a le JROTC.

Na taua e le taitai o le vaega a Leoleo Suesue, le CID, afioga Commander. Lavata’i Ta’ase Sagapolutele i le vaiaso na te’a nei e faapea, “O lo o faaauau pea sailiiliga a leoleo e faatatau i le osofaiga lea, o lo o taumafai pea leoleo e sailiili molimau e faatatau i le faalavelave, ae o lo o mana’omia foi le fesoasoani a le atunuu mo le tuuina mai lea o ni faamatalaga e uiga i lenei faalavelave, pe afai o lo o i ai ni isi o le atunuu o lo o tau silafia le mea sa tupu,” o le saunoaga lea a Lavata’i.

E le o se taimi muamua lenei ua osofaia ma gaoia ai le faleaoga a Leone. O le amataga foi o le tausaga na te’a nei na osofaia ai e ni alii se to’afa le ofisa o le aoga ae gaoi ni isi o mea aoga sa i totonu e aofia ai ni laptop, ma faatau atu i isi tagata.

O lea osofaiga na mafua ai ona molia e le malo le alii o Mu Matu’u ma tu’uaia i moliaga o le talepe fale, gaoi atoa ai ma moliaga e lua o lona taliaina lea o ni oloa sa ave faagaoi e isi tagata.

Na taua foi e leoleo e faapea, e lei mamao atu le faaleagaina o le potu a le JROTC ae toe tulai mai le isi faalavelave i totonu lava o le aoga ina ua sasao se afi i totonu o se tasi o potu e faaaoga e fanau aoga i a latou galuega taulima.

E tusa ai ma ripoti, o le afi na sasao ao usuia le fonotaga a faiaoga ma matua, mo le sailia lea o tofi a le PTA mo lenei tausaga aoga.

E leai ni vaega tele na faaleagaina i lea faalavelave ina ua vave tinei le afi na sasao, i le fesoasoani a nisi o matua o faiaoga atoa ai ma nisi o fanau aoga.

E le o mautinoa mai i le taimi nei po o ai na amataina le afi, pau masalosaloga o lo o i ai, o gaioiga uma lava nei a ni isi o le fanau aoga.

Na taua e le afioga i le alii faipule ia Galumalemana Bill Satele e faapea, o le tula’i soo mai o faalavelave e aafia ai le saogalemu o le aoga i Leone, ua tatau ai ona matua mata’itu e faiaoga ma matua ni auala e puipuia ai faleaoga mai le toe aafia i faafitauli faapenei.

Saunoa le alii faipule, “o ituaiga amioga nei o lo o tutupu e aafia ai fanau aoga, e le atau ona tulai mai i aoga a le atunuu, aua o lo o aoaoina fanau aoga i aso uma i le atamai ma amio e tatau ona ola ai, peitai o lo o maitauina pea le faatupulaia o amioiga le taupulea o lo o tulai mai.”

Saunoa Galumalemana, o le itu o lo o sili ona faanoanoa ai loto, e le na o le tasi le aoga o lo o aafia i amioga a fanau aoga, ae o lo o aafia ai foi isi aoga i le atunuu.

I le ogatotonu o le tausaga nei, na molia ai e le malo i luma o le faamasinoga ni alii talavou, ina masalomia lo latou talepe le faleaoga.

O ni isi o i latou nei ua i luma o le faamasinoga maualuga a latou mataupu, ae o isi o lo o i ai pea i luma o le faamasinoga faaitumalo a latou mataupu.