Faaauau pea fesoasoani StarKist i Aoga Tulaga muamua

O le vaiaso na te’a nei na faamanuiaina ai ni Aoga Tulaga muamua se 10 i le atunuu i foa’i tupe e ta’i $1,000 a le aoga e tasi, i lalo o se polokalame fesoasoani faaauau a le kamupani a le StarKist Samoa ua faaigoaina o le Charlie’s Kids Program, lea ua atoa le 8 tausaga talu ona amataina mai.

 

O se sauniga puupuu sa faia i le fale’aiga a le Kamupani i le vaiaso na te’a nei, na tauaaoina atu ai loa nei faailoga tupe e le alii pule o le kamupani, susuga Brett Butler ma lona sui lagolago ia Sandy Satele, i sui o aoga taitasi sa lautogia i le polokalame o lenei tausaga.

 

I se pepa o faamatalaga na tuuina mai i le sui sooupu o le kamupani ia Satele, o sui o aoga na auai mo le tauaaoina o a latou faailoga, o susuga ia i faiaoga sa gafa ma le tuu faatasia o galuega faatino mo le poloakalame o lenei tausaga (proposals).

 

“O le fesoasoani tupe o lo o tuuina atu e le polokalame a le Charlie’s Kids Program i aoga o lo o faamanuiaina, o le a fesoasoani i aoga mo le faaleleia o a latou poloketi  ma galuega o lo o faatinoina i totonu o potu aoga,” o se vaega lea o le pepa o faamatalaga sa tuuina mai i le Samoa News.

 

“O le autu o lenei polokalame e pei ona faaauau ai i tausaga uma lava, ia mafai ona faailoa mai e faiaoga lo latou mataalia i le faatinoina o galuega faatino mo fanau aoga, e ala i le auina mai lea o a latou galuega fuafuaina i totonu o le taimi talafeaga, ma maua atu ai fesoasoani mo a latou aoga,”o se vaega lea o le pepa o faamatalaga.

 

Na taua e Satele i se talanoaga ma le Samoa News i le vaiaso na te’a nei e faapea, o le faanaunauga o le StarKist Samoa, ia faaauau pea lana polokalame lenei mo aoga a le fanau i tausaga taitasi.

 

E silia i le 20 aoga Tulaga Muamua sa tuuina atu a latou talosaga mo le tauvaga, peitai sa faamanuiaina na o aoga e 10 ina ua latou ausia tulaga uma e pei ona manaomia.

 

LISI O AOGA NA FAAMANUIAINA

 

O le aoga a Coleman Elementary, sa faamanuiaina la latou Poloketi sa faaigoaina, ‘Partner Up with a Good Book’, lea na tuu faatasia e le tamaitai faiaoga ia Mabel Matautia, ma o le taua o lea poloketi, e le gata o lo o faataua ai le faitau tusi, ae o lo o faailoa ai le taua o le galulue faatasi o matua ma faiaoga (PTA) i le faaleleia o galuega taulima a fanau i totonu o le aoga.

 

O le aoga lona lua na faamanuiaina o Matafao Elementary, i lalo o le taitaiga a le faiaoga ia Atalina Coffin, lea sa latou faataua le faitau tusi i totonu o aoga uma i Amerika Samoa, lea foi e mafai ai ona galulue faatasi matua ma fanau aoga e ala i le faitau faatasi o a latou tusi, ina ia unaia ai le faitau tusi a fanau ia lelei.

 

O le faiaoga ia Eleanor M. Tagaloa sa fai ma sui o le aoga a Pavaiai Elementary e tauaaoina le latou faailoga, e pei ona latou faataua ai le mataupu, “One Ocean, One World,” ona o le latou talitonuga, e tatau ona unaia fanau ina ia puipui le sami ma faaleleia atina’e o le siosiomaga.

 

O le aoga a Olomoana Elementary sa fai ai Hermia Simanu ma Ana Fosi ma o latou sui, e pei ona latou faatauaina ai le autu, “From Me to You” lea sa latou faatauaina ai le tulaga lea, e tatau ona aoao lelei fanau ina ia latou iloa le taua o le avea o i latou ma tagatanuu e faalagolago atu i ai le atunuu i le lumana’i.

 

O le aoga a Manumalo Elementary na sui tulaga ai le tamaitai faiaoga ia Lynn Tiapula, ma faaautu ai le latou poloketi o le “Library on Wheels,” ma latou faataua ai fanau ina ia toaaga e faitau le tele o tusi aoga, ina ia fesoasoani ai i le faaleleia o le faitau tusi.

 

O Asofaafetai Pulu na fai ma sui o le aoga a Masefau Elementary, i le tauaaoina atu o le latou poloketi, lea sa faaautu i le “Computer Class,” ona o le latou talitonuga, e taua le i ai o computer i le aoga mo matua ma le atunuu lautele.

 

O le aoga a Tafuna Elementary na sui tulaga mai ai Lalovaea Polu, i le latou poloketi autu “Projector,” ma le latou talitonuga, e tatau ona fesoasoani i le faaleleia o mea faigaluega e faaleleia ai le aoaoina o fanau i totonu o potu aoga.

 

O Sharon Broecker ma Tania Ilaoa sa fai ma sui o le aoga a le Ta’iala Academy, lea na faaautu le la poloketi i le “E-Books” ona o le manatu e tatau ona avanoa aoaoga mo fanau i luga o initaneti, e fesoasoani atili ai i le faaleleia o a latou lesona, ma le aoga mulimuli o Olosega Elementary mai Manu’a, lea sa autu la latou poloketi i le tatau lea ona suesueina le suavai i totonu o fale e faia ai suesuega faasaienisi (Science Lab).

Comment Here