Ads by Google Ads by Google

Faaalu tupe o lafoga totogi ai pili ma fai ai faalavelave a aiga

Na taua e ni isi o le atunuu na maua a latou lafoga i le vaiaso nei e faapea, o nei tupe maua o le a faaalu e totogi ai pili ma fai ai faalavelave a aiga.

 

“O le a fa’aalu la’u lafoga e totogi ai nai pili o le uila ma le eletise o lo o totoe, ma fai ai ni isi manaoga o le aiga e pei o mea faalelotu ma nai faalavelave o lo o i ai,” o le saunoaga lea a Justin Malo o Pago Pago, e galue i se tasi o kamupani tumaoti i le taulaga.

 

Mai le fa tausaga talu ona galue lenei alii talavou e 24 tausaga le matua, sa ia taua ai e faapea, soo se taimi lava e maua ai lana lafoga, o lona tina lava e faasoasoaina, “ae a maua lava se isi $1 ma a’u ua lelei lea.”

 

Ae na taua e le tama o Mareko Ifopo, o se alii kamuta i se tasi o konekarate faufale e faapea, o lana lafoga o le a fesoasoani ai i le totogiina o pili aoga a lana fanau e to’alua, ma fesoasoani ai foi i ni isi pili a le aiga o lo o i ai.

 

I le toe tepa i lafoga o le tausaga na tea nei na saunoa ai Ifopo e faapea, o le la lafoga sa faila faatasi ma si ona faletua i le tausaga na te’a nei ae le’i maliu o ia ia Iulai 2012, na faatau ai le latou taavale ma lana faanau o lo o faaaoga i le taimi nei.

 

“O sina tupe feololo la lea ua ou maua i lenei tausaga, o le a faatino ai loa ni isi manaoga o le aiga,” o le saunoaga lea ma ata.

 

O isi tina e toalua e lei finagalo e faailoa o la suafa na la faailoa mai i le Samoa News e faapea, o a la siaki o le a faaaoga e faatau ai ni isi o mea aoga mo le aiga e pei o ogaumu, ipu, solo ma ie afu, ma fesoasoani ai foi i meaai ma pili o lo o i ai.

 

O le vaiaso nei na faamatuu mai ai e le Ofisa o Lafoga siaki mo le tusa ma le toa 150 tagata faila lafoga na faila a latou lafoga i le amata o le masina o Ianuari seia oo mai i le aso 28.

 

E $150,092 le aofai o siaki sa faamatuu atu e le Ofisa o Lafoga i le au fai lafoga a le atunuu, lea e aofia ai le $43,956 mo lafoga lotoifale, ae $106,136 mo lafoga a fanau (Additional Child Tax Credit).

 

O lo o i ai le faamoemoe o le Ofisa o Lafoga, o le a faamatuu mai isi siaki mo le au faila lafoga ua oo i ai le faasologa, pe afai ae faamatuu mai e le Ofisa o Lafoga a le malo tele la latou fesoasoani i lafoga a tagata o le atunuu.

 

O se tausaga ese lenei mai ni isi o tausaga ua mavae atu, ina ua le vaaia laina uumi i fafo o le Ofisa o Lafoga, mo le aufai lafoga i le taimi na faila ai a latou lafoga.

 

Na taua e se sui o le Ofisa o Lafoga e le faataga ona talanoa mai i tusitala i mataupu faapenei e faapea, sa sologa lelei lava le failaina o lafoga a le atunuu i le masina na te’a nei, e le’i i ai fo’i ni laina uumi na vaaia i fafo i le masina na te’a nei pei o isi tausaga ua mavae atu.