Fa’auau Lolo talanoaga ma Samoa na amata mai e Togiola

A’o sauni ai le nofoaiga a Lolo ma Lemanu e fa’aauau talanoaga ma le malo o Samoa sa amata mai e faigamalo ua mavae atu, o le vaiaso na te’a nei na tofia ai e le ali’i kovana se Komiti fa’apitoa latou te fa’atulaga ma auiliili mataupu e talanoaina i le isi fonotaga o le a sosoo ai nei.

 

O sui e to’atolu o le Komiti e aofia ai le afioga i le Komesina o le Ofisa o Palota, le tofa Tuaolo M. Fruean; Faatonusili o le Matagaluega o Tagata Faigaluega a le malo, tofa Le’i Sonny Thompson, ma le Faatonusili o le Matagaluega o Fefa’atauaiga ma Alamuia ia Keniseli Lafaele.

 

 Na taua e Lolo Matalasi Moliga i lana tusi i le aso 7 Aokuso, 2013 i Fa’atonusili ma Fa’auluuluga o Matagaluega ma Ofisa uma a le malo e faapea, i le tuana’i ai o masina e fitu talu ona tula’i mai le faigamalo e ta’ita’i le atunuu, e i ai lona talitonuga ua lava lea taimi e malamalama ai i latou uma i le tulaga o lo o i ai le malo i le taimi nei, aemaise ai o le tulaga e tatau ona latou tali atu ai pe a o o i le taimi e faataunuuina ai talanoaga ma ta’ita’i o le malo Tuto’atasi o Samoa.

 

“Ina ia mautinoa e i ai mataupu talafeagai e tatau ona taula’i i ai lenei talanoaga ma ta’ita’i mai Samoa, o se tulaga talafeagai mo i tatou le tuuina mai e tatou matagaluega ma ofisa o ni mataupu ina ia mafai ai ona iloa tino ni taunuuga lelei mo le manuia o Samoa e lua i le taimi o lea fonotaga,” o le saunoaga lea a Lolo i lana tusi.

 

Mo le fa’ataunuuina o fuafuaga e pei ona vaai mamao i ai le kovana ma le faigamalo, ua ia tofia ai loa afioga i fa’atonusili e to’atasi e gafa ma le fa’atulagaina o ni mataupu e iloilo i le isi fonotaga o le a sosoo nei, e tatala ai fonotaga ma ta’ita’i o Samoa i lalo o le nofoaiga fou.

 

O le isi tiute o le komiti e pei ona tofia e le alii kovana, e le gata latou te fa’atulagaina le aso ma le taimi e faia ai lea feiloaiga, ae latou te sailia fo’i le nofoaga e faia ai.

 

“O le komiti ua ou tofia o le a tuu atu i ai aso e 60 latou te fuafua ma faataunuu ai la latou matafaioi e pei ona ou tofia i ai, ma tu’uina mai ai sa latou ripoti e iloilo ma pasia,” o le saunoaga lea a le alii kovana.

 

Ua fautuaina foi le komiti ina ia faapea foi ona tuuina atu a latou ripoti i mataupu taitasi latou te iloiloina, ina ia faigofie ai ona mulimulita’i le tulaga o le latou galuega.

 

O le masina o Novema 2012 na faia ai le fonotaga mulimuli i le va o Samoa ma Amerika Samoa, i lalo o le ta’ita’iga a kovana Togiola ma sui o lana kapeneta, faapea ai fo’i le afioga i le alii palemia mai Samoa, susuga Tuilaepa Lupesoliai Sa’ilele Malielegaoi ma lana fo’i kapeneta.

 

O se tasi  o mataupu taua na faia i ai se faaiuga o lea fonotaga ina ia faafesuia’iina o fanua i le va o Samoa e lua, ina ia maua ai fanua totino a le isi malo i totonu o le isi malo, ma faigofie ai ona fa’atino atina’e e pei o le fausia o Ofisa e gafa ma le taulimaina o mataupu e fitoitonu i le malo ma ona tagatanuu.

 

O le fanua mo Amerika Samoa o loo i Vailima i Samoa ae o le fanua mo Samoa o lo’o faatulaga i Tafuna.

 

Comment Here