Ads by Google Ads by Google

Fa’au’u 23 Tamaiti A’oga - Ulua’i Polokalama DOE

O le aso ananafi sa fa’atumulia ai le potu fono a le Matagaluega o A’oga i le Falepalota Tuai i Utulei, ina ua logotala matua, o le a fa’ataunu’uina le fa’au’uga o latou alo sa mae’a le tausaga a’oga ua te’a, ae i ai ni mea sa fa’alavelavetia ai le latou savavali e talia o latou tusi pasi Tipiloma o A’oa’oga Maualuluga.

 

“E tatou te le toe tepa i tua, aua e le aoga lea ia i tatou uma lava, ae sili ona manuia i tatou i le tatou savavali punoua’i mo le lumana’i!” O se saunoaga fa’amalosi’au lea a le fofoga o le aso, ma o le Sui Fa’atonu o le Matagaluega o Talavou ma Tina o le tatou Malo, Galu Satele.

 

O le 23 lea o fanau a’oga, e le tasi se a’oga e o mai ai, ae o mai i latou mai a’oga maualuluga uma lava i le motu o Tutuila nei. Ua iloga mai, o se polokalama fa’ato’a amata lenei a le Matagaluega o A’oga, ua taumafai ai ona fa’aavanoa mai taimi o faia’oga agava’a o A’oga Maualuluga, ia toe a’otauina fanau sa misia ni vasega, ma ua afua ai ona le maua togi e fa’au’u ai.

 

Ona o le finau maumaua’i o le tama’ita’i pule o lea polokalama o lea itu o le Matagaluega o a’oga, LizaMaria Tuato’o, o le ala lea ua mausali ai le taofi o le Fa’atonusili o A’oga Vaitinasa Salu Hunkin ina ia amata loa lea tuamafaiga, ae ua fua mai nei, e to’a 23 i latou ua fa’amanuiaina ai!

 

O le sui e sili ona amio lelei, maua lea e Peni Isa’ako, ma le sui e iloga le agava’a i tulaga fa’ata’ita’i , le tama  fa’au’u o Saufo’i Sapani. O ia fo’i lea na tutula’i i le toe taimi o lenei vasega fa’atasi ma o latou matua, e fa’afetaia le taupulega a le Matagaluega o A’oga sa auai, ae maise o latou pa’aga sa latou fa’atautaia fa’atasi lenei a’oa’oga ua tino mai, e aofia ai le ASEPA ma le DYWA.

 

O le sui o le fa’atonusili o a’oga sa masi’i atu o le tama’ita’i o Fa’auisa Opa Sotoa mo le Vocational Education, ma sa aofia fa’atasi fo’i ma le Fa’atonu o le ASEPA - Ameko Pato, Ta’ita’i o le Polokalama LizaMaria Tuato’o ma le Faletua o le Fa’afeagaiga Silei Fonoti - Levi sa ta’ita’ia le sauniga i le tatalo ma ia toe fa’ai’uina fo’i.

 

Na fa’aalia fo’i se polokalama na pu’eina a’o fa’agasolo le a’oa’oga fa’apitoa mo le 6 vaiaso ua mafai ai nei ona fa’au’u i latou, ma sa iloga ai le lautele o ituaiga o a’oa’oga sa faia mo i latou, ae sili ai, ua lava ma totoe le taimi o faia’oga sa tau’avea nei kosi, e fa’amalamalama atili ai mataupu i fanau.

 

“E tele se aoga o lenei polokalama mo a’u, sa ou le fa’alogo i taimi a’o i ai i a’oga, ae o le taimi nei, ua fiafia e sau e a’oga aua ua malamalama lelei i le fa’aaogaina o komipiuta, mafai ona ta nofo ma fa’aaoga nei masini i taimi e mo’omia ona faia ai mataupu, ma ua malamalama lelei fo’i i le fa’amatala mai a le faia’oga! Ua suia lava lota lagona i lenei a’oa’oga sa faia nei, ua i ai le naunauta’iga e fa’aauau le a’oga!” O se molimau lea a Tevita Tuitavake.

 

Malo le taumafai, ma ia fa’aauau lo outou filiga i a’oa’oga mo so outou lumana’i manuia.