Ads by Google Ads by Google

Fa’atusa tagata faigaluega malo o tagata e foa’i e leai ni faiai

E le’i nofo lelei i le finagalo o le alii kovana se faasea na tuuina atu e se tina i luga o lana polokalame i le faaiuga o le aso na te’a nei, i se taavale a le malo sa paka i le paka mo tagata mama’i “handicap parking” i le vaega e paka ai taavale a le faleoloa o le PX i Tafuna i le vaiaso na te’a nei.

O le ogaoga o lea mataupu i le finagalo o le alii kovana, aemaise ai o se tagata faigaluega a le malo sa alu atu i le taavale lea, na saunoa ai Togiola Tulafono ma faatusa tagata faigaluega a le malo, “o le tagata e feoa’i i ta’avale ae tu’u faiai i le ofisa.”

Na taua e le tootoo sa valaau atu i le polokalame e faapea, o le taavale lea sa paka i le pakaga mo tagata mama’i, o le taavale a le Ofisa lea e Puipuia Aia tatau a i latou e i ai manaoga faapitoa o le tino, o le numera o le taavale o le ‘AD #16.’

O le itu e sili ona faanoanoa ai e pei ona taua e le tina lea, e umi se taimi o tau su’e se la pakaga ma si ana tama e i ai manaoga faapitoa o le tino, ina ua paka ai le taavale a le malo i le paka lea.

Sa ia taua foi e faapea, e le gata e sese le paka na paka ai le taavale, ae sa ola lava i le taimi atoa na tu ai a’o alu le tagata faigaluega i totonu e faatau, ona sa i ai foi isi tagata sa i totonu o le taavale.

“O le itu e sili ona faanoanoa ai, e le gata o le taavale a le malo ma le tagata faigaluega a le malo, ae o le Ofisa lava foi lea o loo latou puipuia aia tatau a i latou e i ai manaoga faapitoa o le tino, a’o lea ua solomua ia i latou le soli o le tulafono,” o le saunoaga lea a le tina, lea foi sa lagolagoina e le alii kovana.

Fai mai le tina, ua uma ona ia faafesootaiina le Faatonusili o le Ofisa lea, ma sa faailoa atu e le Faatonu, sei toe fo’i atu le tagata faigaluega lea ona ia fesiligia lea e uiga i le mataupu.

Na faamalulu Togiola i le tootoo atoa ai ma nisi o le atunuu o loo aafia i ni gaioiga o loo faia e tagata faigaluega a le malo, peitai i lona talitonuga e le tatau ona tutupu mea faapea aua o tagata faigaluega a le malo, e tatau ona fai ma faataitaiga lelei i le lautele o le atunuu.

Saunoa le kovana, o le faamalosia o le tulafono i soo se taimi, e le na o se matafaioi lea a le malo ae manaomia foi le lagolagosua atu i ai o le atunuu, ina ia mafai ai ona manino nisi o gaioiga e le o iloa atu e le malo.

Fai mai Togiola, o nisi o tagata faigaluega a le malo, e pei e le fiafia e usitai i le tulafono, ae pei e faaaoga lo latou tofi o i latou o tagata faigaluega a le malo e faailoa ai la latou pule poo le le popole foi i le tulafono.

Na avea le valaau a le tootoo ma auala na toe faamanatu ai i le alii kovana, se mataupu faapea na faasea i ai se isi o le atunuu i le taimi na faafoe ai e le Lutena Kovana le polokalame lava lea i se tasi o aso, ona o tagata o loo fiafia e fai a latou pati i le paka, ae a uma loa ona fiafia, ona taei lea o atigi fagupia ma faapeapea solo atigifagu i le paka.

“Sa faamaualalo le Lutena Kovana i le atunuu ona o le mataupu lea ma ia saunoa ai e faapea, o le isi mea ua maitauina i le atunuu, e o e fiafia i le paka ae tuu faiai i le fale,” o le saunoaga lea Togiola e faatatau i se saunaoga sa faia e le Lutena Kovana.

“Ua toe oso mai ai la le tali lea i lo’u mafaufau i le mataupu lea ua faatulai mai i le aso (aso Toonai na te’a nei), e foliga mai e i ai tagata faigaluega a le malo e feoai i taavale ae tuu faiai i le ofisa,” o le saunoaga lea a Togiola.

Sa ia taua foi, e le popole pe ita le tagata lea o loo faatatau i ai lana tala ia te ia pe leai, aua o ia e le toe tauva i se isi tofi, ae tatau pea ona fai sa’o atu i ai lana tala ina ia lagona ai le sese o le mea o loo fai.

Sa ia faailoa foi i le tootoo, o le a ia faatonuina le Faatonusili o le Ofisa lea ina ia faia se suesuega e fesiligia ai le mataupu lenei, ma ia faia foi sa latou aiaiga i le tagata faigaluega lea ona o lea ua faamaonia ua soli le tulafono.

“E tasi lava le mea e ala ai ona le faaaloalo ma le mafaufau le tagata faigaluega a le malo, o le fealua’i ae le iloa poo fea le mea o loo teu ai lona mafaufau,” o le isi lea saunoaga a le alii kovana, faatasi ai ma lana fautuaga mulimuli, “E tatau ona iloa e tagata faigaluega uma a le malo, poo fea lava e feoa’i solo i ai, o loo ia te i latou mata uma o le atunuu.”