Ads by Google Ads by Google

Fa’atusa siitaga LBJ i le fa’ama’i oti na a’afia ai Samoa

Na fa’atusa e se tasi o tina si’itaga a le falemai o le LBJ i le fa’ama’i oti lea na maliliu ai le faitau afe ma afe o tagata Samoa i tausaga ua mavae, lea sa na ‘o le ‘eli lava o lua tetele ae lafo uma i ai le tele o tino maliliu ma tanu ai.

“O le mea lea o le a oo i ai le atunuu pe afai e sii pili a le falemai, e le gata o le a nonofo ai lava tagata i o latou aiga pe a mama’i, ae o le a i’u leaga foi lea tulaga i le maliliu ai o tagata i le le mafai lea ona gafatia o le maualuluga i pili, ma ua toe fafagu mai ai le faama’i oti lea na maliliu ai le toatele o tagata Samoa i le 1819,” o le saunoaga lea a se tasi ona to’oto’o sa fa’aali lona finagalo i le iloiloga a le falemai.

E silia ma le to’a 30 tagata o le atunu’u, na mafai ona auai i se iloiloga a le falema’i na faia i le Aso Gafua na tea nei, e talanoaina ai lenei mataupu, ma o ni isi o i latou nei sa fai ma sui o ni faalapotopotoga tu maoti e faaleo manatu o se vaega toatele na saini o latou suafa i se talosaga lea ua maea ona faaoo atu i le pulega a le falemai.

Na mafai fo’i ona auai ai ni isi o Faipule ma sui mai i le falema’i.

O i latou uma lava mai le atunuu lautele na faaalia o latou finagalo i le iloiloga, e leai se isi e lei fa’ailoa lona te’ena o ia siitaga, ona o le manatu o siitaga nei o le a matua pagatia ai lava le atunuu, aemaise lava i latou e vaivai le tamaoaiga.

Na fesiligia e se tasi o to’oto’o na tula’i i le Aso Gafua, po o le a le tulaga o le a o’o i ai le falema’i, pe afai ae tau le to’atele ni isi o le atunu’u e toe o’o atu i le falema’i. “O lona uiga o le a outou toe faaopoopo se isi siitaga i luga o le siitaga lea o le a amata i le kerisimasi, ina ia maua ai le tupe lea tou te tau sailiina nei?”, o le fesili lea a lenei tina pe a ma le 50 tausaga le matua.

E toatolu isi tina na maua le avanoa e f’aaleo ai o latou finagalo, ma e leai se isi o i latou na lagolagoina le faia o nei siitaga.

“E faapefea ona aapa mai le falemai i le atunuu mo se fesoasoani o le toatele o aiga latou te le gafatia le maualuga o nei siitaga, a’o fea le malo ua le fai i ai e totogi lana aitalafu,?” o le saunoaga lea a le isi tootoo.

“E le gafatia e la’u siaki e $300 mai le saogalemu lea o lo o maua i masina taitasi ona totogi tou pili ia ua faailoa mai, o lona uiga e oo atu i le taimi e faatau ai se meaai mo lo’u aiga ua toeitiiti uma le siaki, tuu atu ai loa ma le alofa i le faifeau, oka, o lona uiga e oo atu i le taimi lena ua matua leai lava ma se mea o totoe i le siaki,” o le saunoaga le fiafia lea a lea tina.

I le ‘ava’avau a se tasi o tina, na ia fa’aalia ai e fa’apea, “Faafefea ona ave la outou faamuamua i tupe a’o fea o le a tua i ai ola o le atunuu? E tatau i le atunuu atoa ona tutu faatasi e taofi siitaga nei, toe faafoi le tulaga sa i ai le feagaiga lea na osia e tuaa ua mavae, i le tuu atu atoa lea o le atunuu i lalo o le malo tele, ina ia maua ai le tautua saoloto mo le soifua maloloina atoa ai ma aoga e aunoa ma se totogi”.

“O le faafitauli lea ua tupu i le falemai, e mafua mai i le faatamala o le malo, aua la tou te sulu mai ia matou ina ia matou totogi atu ni tupe, ae fai i le malo e totogi mai le latou aitalafu, afai foi e le mafai, fai i faifeau, ekalesia ma faalapotopotoga tumaoti e tuu atu sa latou fesoasoani mo le falemai, ae le o le sulu mai ia matou tagata lima vaivai,” o le augani atu lea a le tina lea i le pulega o le komiti a le falemai.

Na taua e le susuga Keniseli Lafaele, o se tasi sa avea ma faipule o le Fono Faitulafono mai le 1997 e oo atu i le 2004, o le tele o aiga Samoa, e laititi lava se vaega tupe e faaalu i le tausiga o le soifua maloloina poo le auina atu o aiga i le falemai, nai lo isi lava manaoga o le olaga.

I lana saunoaga umi na tuuina atu i luma o le komiti faafoe a le falemai, na taua ai e Lafaele e faapea, o le 21% o tupe maua a le aiga Samoa e alu i taumafa, ona faasolosolo mai ai lava lea i le faaleleia o le aiga, totogiina o pili, femalagaaiga, aoga ma vailaau mai le falemai i le 1%.

I le faaiuga o le saunoaga a Lafaele, sa ia fautuaina ai le pulega a le falemai i le tatau lea ona faatulai se Inisiua e fesoasoani ai i le totogiina o talavai a le atunuu.

E lei maua mai se isi faasilasilaga mai le pulega a le falemai i se isi a latou faaiuga e faatatau i a latou siitaga lea ua fuafua e amata i le po o le Aso Toonai o le vaiaso ne.