E to’atele tagata faigaluega o lo o tipi a latou lafoga e fesoasoani ai i le atina’eina o le malo, ua latou fa’aigoa siitaga o alauni a senatoa ma faipule lea ua pasia e le Senate, “o se gaioiga ai afu ma le le alofa”, ae o isi na latou fa’atusa “i le gata e fasia ae pulapula ona mata”.

O le to’atele o tagata faigaluega totogi lafoga na fesiligia e le Samoa News i le mataupu lenei, toeititi leai se isi e le fa’aalia se finagalo le fiafia ma le ita, i le gaioiga ua faia e le Senate e sii ai alauni a senatoa ma faipule, i tupe a “tagata totogi lafoga i totonu o le teritori”.

Na taua e le tina o Arietta Mauga ua savali i le 21 tausaga o lana tautua i se tasi o matagaluega a le malo, e le sa’o le saunoaga a le peresetene o le senate faapea o tupe o lo o fuafua e faatupe ai le siitaga o alauni, “o tupe lava o lo o i totonu o le paketi a le Fono Faitulafono”.

Na taua e le faletua ia Mauga e fa’apea, “tusa lava po o tupe ua pasia mo le paketi a le Fono Faitulafono, e tatau ona silafia e ta’ita’i o le Fono Faitulafono, o le 100% o le tupe o lo o fa’atupe ai le latou paketi i tausaga tupe uma, “o tupe o lo o tipi mai i taga a tagata totogi lafoga”.

Ae na taua e le tama o Fiso Talauega, 53 tausaga o le soifua mai Tafuna, ae ua silia i le 20 tausaga o lana tautua i totonu o le kamupani i’a, o le gaioiga lea ua fai e le senate, “ua atagia mai ai lo latou galulue mo lo latou lava manuia e ala i lo latou soona fa’aaoga o le afu o tagata totogi lafoga”.

“O le lafoga lea e tipi mai i lo’u totogi e ala i lo’u usu i le 5:00 i le vaveao e safu le i’a, e le suamalie ae oona, e saili gata le $1, e saili gata fo’i la’u lafoga o lo o tipi e fesoasoani ai i le tamaoaiga o le malo”, o le saunoaga lea a Talauega.

E to’atasi le isi tama e galue i se tasi o matagaluega a le malo e le i finagalo e fa’ailoa lona suafa, sa ia taua lona tete’e i siitaga o alauni a le Fono, ma ia talosagaina ai le maota o sui ina ia latou teena le pili lea ua pasia e le senate.

“Pau le fa’amoemoega o tagata totogi lafoga o le atunuu o lo o totoe o le maota o sui, talosia e teena e faipule le pili lenei, o se pili ua manino ai le pologa pea o tagata lima vaivai ae manuia pea tagata e maualuluga totogi ma malosi lo latou tamaoaiga”, o le saunoaga lea a le molimau.

Na taua e afioga i senatoa i le taimi na felafolafoa’i ai i le pili lenei, o siitaga i alauni a senatoa ma faipule, e le o faia faatatau mo i latou o lo o nofoia le nofoa i le taimi nei, ae aoga mo tupulaga o le lumana’i.