O lo o lapataia pea le atunu’u i le fa’atupulaia pea lea o gasegase pipisi i so o se vaega o Amerika Samoa, ma ua mana’omia ai le tatau lea i le atunu’u ona fa’aeteete ma puipuia i latou mo lo latou saogalemu.

O fa’ama’i pipisi e pei ona taua e aofia ai le fa’ama’i mata atoa ai ma le gasegase o le ‘chikungunya’ lea e aofia ai le tino gagase, flu atoa ai ma le tino tiga.

I ni ripoti sa tu’uina mai i le Matagaluega o le Soifua Maloloina i le vaiaso nei, ua atagia mai ai le fa’atupulaia pea lea o le mamalu o le atunu’u o lo o a’afia i le fa’ama’i pipisi o le Fa’ama’i Mata.

E ui e le o mafai ona o o atu le to’atele o tagata o lo o a’afia i se aofaiga e ono fa’apea ai o lo o ta’atele pea le Ma’i Mata, peita’i o le to’atele o lo o fa’amaonia le a’afia o lo o mafai ona iloa ai e tatau lava ona tu’uina atu se lapataiga i le atunu’u ina ia puipuia aiga ma fanau mai lenei fa’ama’i pipisi.

Na taua i se ripoti mai le Soifua Maloloina e fa’apea, pe a ma le to’a 30 tagata o lo o masalomia le a’afia i lenei fa’ama’i pipisi i totonu o le vaiaso e tasi, ae mafuli lava i le pito nu’u o Tafuna, ma fa’asolosolo atu ai lava i isi itu ta’itasi o le atunu’u atoa.

I le gasegase o le ‘chikungunya’, o lo o taua ai le to’a 126 na aga’i atu e vaai le foma’i i le lua vaiaso talu ai, ona o ‘auga o lenei fa’ama’i sa a’afia ai i latou, ae o le vaiaso na sosoo mai ai e to’a 117 na ripoti ma a’afia i nei auga leaga.

I totonu o le 7 vaiaso e pei ona taua i le ripoti, ua maitauina ai le sii sii i luga o le aofai o tagata o lo o autova’a atu i le falema’i mo togafitiga, i le va o le 42 e o o atu i le 45.

E ui i tulaga matuia o nei fa’ama’i pipisi, peita’i o lo o atagia i le ripoti le aga’i atu o le gasegase lenei o le chikungunya ina fa’aitiitia lemu atu.

O le fautuaga masani mo le atunu’u, e tatau ona tausisi pea i le tu mama i taimi uma, ma ia toaaga e fufulu lima ina ia aua ne’i pipi’i ai ni siama.

Ua fautuaina fo’i le atunu’u ina ia fa’afesootai vave le Soifua Maloloina po o se foma’i i le falema’i, pe afai e maitauina ni a’afiaga i lo latou soifua maloloina, ina ia taofia ai le ono tula’i mai o se isi tulaga matuia i se taimi o i luma.