Ads by Google Ads by Google

Fa’atupulaia pea atina’e o Turisi i le Teritori

Ua manino i le ripoti a le Ofisa o Turisi mo a latou galuega fa’atino i le Kuata Lua o le Tausaga Tupe lenei 2015, le fa’atupulaia pea lea i luma o le atina’e o Turisi i totonu o Amerika Samoa.

 

O ni isi o itu taua ua mafai ona manino mai i lenei itu lelei, e le gata i le lagolagoina ai o le atina’e o le tamaoaiga o le atunu’u, ae o lo o mafai ai fo’i ona maua galuega lelei mo le atunu’u lautele.

 

Mo le masina o Ianuari e oo mai ia Mati 2015, e 7 le aofa’i o va’a meli sa fa’amoemoe latou te asia le teritori, ae o le afa lea na afatia ai le motu o Tonga i le ogatotonu o le masina o Ianuari, na mafua ai loa ona le taunu’u le malaga mai o va’a meli e lua sa fuafua i le aso 30-31 o Ianuari.

 

Ae mo va’a meli e 5 sa latou afea Amerika Samoa ia Fepuari ma Mati, na mafai ai ona aumaia i le atunu’u turisi e 7,844 atoa ai ma tagata o ‘au va’a e tusa ma le 3,995.

 

I luga o fa’amaumauga a le Ofisa o Turisi i lana ‘website’ e pei ona taua i le latou ripoti, e tusa ma le to’a 780 tagata mai konitineta eseese e aofia ai Europa, Amerika i Matu, Asia ma le Vasa Pasefika o lo o latou faitau ma matamata i fa’amatalaga eseese e fa’atatau ia Amerika Samoa.

 

I se fonotaga a sui o Ofisa o Turisi mai atunu’u eseese i le Pasefika sa faia i San Diego i le aso 6 Fepuari 2015, sa mafai ai e le sui o Amerika Samoa ona fa’alauiloa atili isi fa’amaumauga e fa’atatau ia Amerika Samoa, ma le taumafai ina ia atina’e pea tulaga tau turisi.

 

O ni isi o itu taua o lo o mafai ona fa’alauiloa i fonotaga faapenei e pei ona taua i le ripoti, o le fa’alauiloa lea o auala eseese e mafai ona faatosina mai ai turisi i le atunu’u, atoa ai ma ni isi o itu e ono avea ma fa’afitauli i le atina’e tau turisi.

 

O ni isi o itu lelei o lo o mafai ona fa’alauiloa i lenei fa’amoemoe e pei ona taua i le ripoti, o le avea lea o Amerika Samoa o le teritori o le Iunaite Setete e pito sili ona latalata i Ausetalia, ma, o le isi lea metotia o lo o taumafai e fa’atosina atili mai ai turisi e malaga asiasi mai i le atunu’u, ma faigofie ai ona agai atu e asiasi i isi atunu’u e aofia ai ma Ausetalia.

 

O le auala o lo o taua i le ripoti ua mafai ai ona manuia taumafaiga mo le atina’eina o le itu tau turisi i le teritori, o le galulue fa’atasi lea o le malo i matagaluega ma fa’alapotopotoga taitasi, atoa ia ma le tula’i mai o pisinisi ma tagata ta’ito’atasi e fa’ailoa lo latou lagolagoina o lenei taumafaiga.

 

E i ai le talitonuga o le Ofisa o Turisi, i le isi 10 tausaga o lo o lumana’i ai, pe afai ae fa’aauau pea ona lelei taumafaiga mo le atina’eina o turisi, o le a avea turisi ma fesoasoani numera tasi i le tamaoaiga o le atunu’u ma le malo.