Ads by Google Ads by Google

Fa’atupulaia le aofa’i tagata atunu’u ua fa’amama toto

Na taua e le Pulesili o le Falema’i a le LBJ i luma o le Komiti o le Soifua Maloloina a le Senate e fa’apea, o lo o fa’atupulaia pea le aofa’i o le atunu’u o lo o aga’i atu i le Fale Fa’amama Toto mo le fa’amamaina o latou toto i le taimi nei.

 

O lea saunoaga mai le tofa a Taufete’e J. Faumuina, o sana tali atu lea i ni fesili na fa’atula’i e afioga i ali’i senatoa ia Soliai T. Fuimaono ma Tuiasina Esera, i le tele o tupe o lo o alu i le tau togafitiina o le atunu’u, e mafua mai i le a’afia o tagata i gasegase le pipisi atoa ai ma le tele o isi mau gasegase, lea e afua mai i taumafa o lo o fa’aaogaina e tagata.

 

Saunoa Soliai e fa’apea, o le isi mafua’aga e ala ai ona fa’amama toto o tagata, o le tele o fualaau latou te inu ina.

 

Na taua e Taufete’e e faapea, e i le va o le 150 i le 160 le aofa’i o tagata o lo o fa’amama toto i le taimi nei, ma o se fuainumera o lo o fa’aopoopo pea.

 

O le fa’atupulaia o le aofa’i o tagata ua fa’amama toto i le atunu’u, ua mafua ai ona mana’omia e le LBJ le toe aumaia o ni isi masini fa’aopoopo e fesoasoani i masini o lo o i ai nei e le o lava.

 

E 16 masini fou mo le Fale Fa’amama toto ua mae’a ona oka, ma e i ai se vaega tupe ua tuuina atu i le kamupani i fafo e fesoasoani i le faatauina mai o ia masini.

 

Na fesili le sui peresetene o le senate ia Nuanuaolefeagaiga S. Nua ia Taufete’e, pe aisea e le fa’aavanoa ai loa se tupe a le falema’i e aumai ai masini o lo o mana’omia, peita’i sa tali le pulesili, o lo o ave le fa’amuamua a le falema’i i le taimi nei i “manaoga o lo o pito sili ona mana’omia ma taua mo le atunu’u”.

 

O ni isi o ia manaoga o lo o sili ona mana’omia i vaiaso uma, o vailaau ma fualaau mo togafitiga, atoa ai ma le mautinoa o lo o lava foma’i latou te fa’atinoina le galuega.

 

Saunoa atili Taufete’e e fa’apea, ua toeititi lava mae’a le toe soso’oina o le nofoaga autu mo le Fale Fa’amama toto, peita’i o le fa’afitauli o lo o tula’i mai, e le o i ai ni masini e fa’aaoga i le fale fou lea pe a tatala.

 

Na toe fesili Nua pe aisea ua le lava ai ta’avale a le EMS, ae na tali Taufete’e, ua mafua ona le lava ta’avale a le EMS, e le o i ai se tupe e fa’atau mai ai ni ta’avale fou.

 

Sa ia fa’amanino atili i luma o le maota e fa’apea, e i ai ta’avale fou mo le EMS ua fa’amoemoe e fa’atau mai, ae o lo o fa’atali i le taimi e avanoa ai se vaega tupe.

 

O le isi fa’afitauli o lo o maitauina i le taimi nei i le EMS, ua avea le le lava o ta’avale ma itu ua fa’aaoga ai ta’avale tetele e la’u mai ai gasegase i nofoaga lauleaga ma vaega tau mamao, ae o nofoaga ia e tatau ona fa’apitoa i ai isi ituaiga ta’avale laiti a le EMS.

 

Na fa’ai’u le iloiloga i le talosagaina lea e afioga i Senatoa ia Taufete’e, e ave le fa’amuamua i le fa’aleleia o auala uma e tausi ai le soifua maloloina o le atunuu.