Ads by Google Ads by Google

Fa’atulaga Kovana auala fesoasoani ai malo atina’eina o aoga

Ua faalauiloa e Lolo ma Lemanu se tasi o a laua fuafuaga ua faatulaga, e mafai ai ona faaleleia ma siitia le tulaga lelei o aoga ma faleaoga i aoga maualuluga i le atunuu, e ala i le filifili o Faatonusili poo fea le aoga maualuga latou te filifili e mafai ona latou fesoasoani e faalelei ma atina’e.

 

Mo Matagaluega uma ma Ofisa a le malo, o le a latou filifilia le aoga e mafai ona ofo atu i ai la latou fesoasoani, e pei o le faaleleia o vaega o faleaoga o lo o faaletonu, faamama le lotoa po o le fesoasoani foi i fanau aoga i ni isi o taimi.

 

O le aoga maualuga i Fagaitua ma Manu’a lea ua filifili e le ofisa o le alii kovana, o le a latou fesoasoani ai mo le faaleleia o vaega o lo o faaletonu.

 

Na faamanino e Lolo i le taimi o le fonotaga a le kapeneta i le vaiaso na te’a nei e faapea, o le auala ua la fuafuaina ma le alii lutena kovana, o le a mafai ai ona fesoasoani i le pito laau o lo o tauamo e le Matagaluega o Aoga ma Galuega a le malo i le tau faaleleia lea o vaega o lo o faaletonu i aoga taitasi i le atunuu.

 

Fai mai Lolo, o le faafitauli lenei o lo o feagai pea ma le malo i le tele o taimi, o le taumafai e siitia le tulaga o aoga i le atunuu aua le aoaoina o tupulaga talavou.

 

“E le mafai e le Matagaluega o Aoga ma le Ofisa o Galuega ona faitoatasi le galuega o le faaleleia o faleaoga ma aoga, o le tiute la lena a tatou faatonusili, o le fesoasoani i le faaleleia o faleaoga, aua o le aoaoina o tatou fanau o se gaioiga e tatau ona ave uma i ai la tatou faamuamua,” o le saunoaga lea a le alii kovana i le fono a le kapeneta.

 

Na faamanino e Lolo i le kapeneta e faapea, o se tasi o faafitauli ua la maitauina ma Lemanu Peleti Mauga, e le lava tupe a le malo e faatinoina ai galuega mo le faaleleia o aoga ma faleaoga, ma o le isi lea mafuaaga ua la manatu ai e faataulagaofo taimi o matagaluega tasi e fesoasoani ai i le faaleleia o faleaoga.

 

A’o avea Lolo ma peresetene o le Faletupe o Atina’e i ni tausaga e le’i mamao atu, o se tasi lea o galuega sa ia faatonuina ai le aufaigaluega atoa a le Faletupe, o le faaaoga o se aso se tasi i totonu o le kuata faigaluega e fesoasoani ai i le faaleleia o faleaoga a le aoga a Samoana.

 

“O ni isi o aso matou te faatauina mai ai apa vali ae ave e vali ai ni isi o faleaoga i Samoana, o le taulaga ofo lena sa faia e le aufaigaluega a le faletupe, ma ou te manatu o le tulaga fo’i lena e tatau ona ave i ai la tatou faamuamua i le taimi nei, ina ia faatumau ma siitia i luga le lelei o le siosiomaga o lo o a’oa’oina i ai latou,” o le saunoaga lea a Lolo.

 

“O tatou o ta’ita’i, e tatau ona fai sa tatou vaega e faaleleia ai aoaoga i le teritori,” o le isi lea saunoaga a Lolo. “E tatau ona fai sa tatou sao i le atina’eina o le malo, e le faapea na o le tatou aumaia o tupe mai le malo ma tagata, ae leai sa tatou mea e toe faafo’i atu i le atunuu, ma ou te talitonu, o mea e toe faafoi i le atunuu e tatau ona avatu ia te i tatou o ta’ita’i.”

 

Na faaalia e le toatele o faatonusili o latou lagolagoina o le fuafuaga ua faalauiloa e le alii kovana mo le faaleleia o aoga i le atunuu.

 

“O se fuafuaga lelei ma atamai ua faalauiloa e le faigamalo, e le gata e fai ai so matou sao i le atina’eina o aoga, ae faailoa atu foi iina le loto nuu o taitai i le atina’eina o le malo i soo se itu,” o le saunaoga lea a le afioga a Motusa Tuileama Toatolu Nua, le faatonusili o le matagaluega o le Soifua Maloloina.

 

Na faafetaia e le faatonusili o le matagaluega o aoga ia Vaitinasa Dr. Salu Hunkin-Finau le fuafuaga a Lolo ma Lemanu e pei ona faailoa, pau lana fautuaga sa tuuina atu i le kapeneta, e le gata i le tuuina atu o le fesoasoani mo aoga maualuluga e 6 i le atunuu, ae tatau foi ona aofia ai ma aoga Tulaga Muamua e 23 i le atunuu.

 

E ese mai i le fuafuaga lea ua tuu atu i faatonusili e fesoasoani ai i le faaleleia o faleaoga, ae o lo o tumau foi le galuega mo le faamamaina o tafatafa o le alatele o lo o faatinoina e matagaluega a le malo i aso Faraile faaiu o masina taitasi