Ads by Google Ads by Google

FA’ATONU SE ALII PAGOTA TOE FO’I LONA ATUNUU PE A MAGALO

O le alii mai Samoa lea o lo o tuli sona faasalaga faafalepuipui e 5 tausaga, ina ua faamaonia e le faamasinoga le moliaga sa tuuaia ai o ia o le umia faasolitulafono lea o ni vaega o le laau faasaina o le mariuana, ua faatonu e le faamasinoga i le vaiaso nei, a maea ona tuli lana faasalaga o lo o tuli i le taimi nei, ona ia tuua lea o le atunuu ae toe fo’i atu i lona aiga na sau ai.

 

O le alii o Iumalo Seiuli na tausala i lona umi o se vaega tele o sikaleti mariuana i le lua tausaga talu ai, ma faasala ai loa o ia e le faamasinoga maualuga e taofia i Tafuna mo le 5 tausaga.

 

Ao taofia ai Seiuli i le falepuipui, sa maua le avanoa e tatala ai o ia i tua e alu e faigaluega i se konekarate fau fale ma toe foi e tuli faauma lona faasalaga, e ui o lea alii sa nofo faasolitulafono i totonu o le teritori e aunoa ma ni pepa nofomau, talu mai lava le tausaga e 2005 na ulufale mai ai i se pemita e 30 aso.

 

O le avanoa na maua e Seiuli e alu ai e faigaluega, sa mafai ai ona alu e asi lona toalua ma lona aiga i lo latou aiga i Seetaga, ma molia ai loa o ia e le malo i le isi moliaga fou, o lona sola ese lea ao tatala ai o ia i tua e faigaluega, ma o le vaiaso na tea nei na lauina ai lona faasalaga i le solitulafono fou lea.

 

Na finau le loia a Seiuli i le faamasinoga e faapea, e leai se matuia o le gaioiga sa faia e le ua molia, o le alu lea e asi lona aiga, ona sa faataga o ia e le pule o le konekarate sa galue ai.

 

Fai mai foi lana loia, ana faapea na sola ese Seiuli ao taofia ai i le falepuipui, atonu ua sili atu le matuia o lea gaioiga.

 

E 5 tausaga tausaga na manatu le faamasinoga e faasala ai Seiuli mai le moliaga fou e pei ona tausala ai o ia, peitai ua manatu le faamasinoga e faamalumalu lona tuliina o lea faasalaga, ae ua lava masina e 20 e taofia sao ai o ia i le toese i Tafuna.

 

O le tuliina lea o lea faasalaga o le a faamalumalu, ae o le taimi lava e maea ai ona ia tuliina tausaga e 5 o lo o tuliina i le taimi nei, ona ia tuua loa lea o le atunuu ae toe foi atu i lona aiga na sau ai.

 

Ua poloaina e le faamasinoga le malo ina ia saili le sponsor a Seiuli mo le totogiina o lona pasese e toe foi atu ai, ae afai e le maua e le malo le sponsor, ona faaaoga lea o se tupe a le malo e totogi ai lona pasese.