O le vaiaso na te’a nei na tofia ai e le Fa’atonusili o Aoga le Puleaoga fou mo le Aoga Maualuga a Samoana, e ui i se talosaga sa tuuina atu i ai e le Lutena Kovana ina ia toe iloilo lana fa’aiuga ua faia fa’asaga i le Puleaoga tuai o Mataese Samuelu.

O le aso Gafua o le vaiaso na te’a nei na faamoemoe e amata ai le Puleaoga fou a Samoana o Talosia Upuresa i lona tofiga fou e pei ona tofia i ai o ia e le Fa’atonu o aoga ia Vaitinasa Dr. Salu Hunkin-Finau, peita’i e taunu’u atu o lo o i ai pea le susuga a Samuelu i le Ofisa e le i alu ese.

E talitonu le Samoa News ua sauni le susuga a Samuelu e fesiligia le faaiuga ua faia e fa’amalolo ai o ia mai le tofiga Puleaoga.

I se tusi a Lemanu sa tuuina atu i le Ofisa o Aoga na maua e le Samoa News, e le gata o lo o taua ai e Lemanu le taua o taumafaiga ina ia aga’i i luma le tautua a le Ofisa o Aoga, ae sa ia taua fo’i lona naunau e fia feiloa’i atu i le Fa’atonu o aoga e tusa ai o lenei mataupu.

Na taua e Lemanu i lana tusi lona malamalama i taumafaiga e faia ni fesuiaiga i le aoga a Samoana, atoa ai ma le fesuiaiga o Puleaoga, ae o le faia o nei fesuiaiga ae ua toe tasi le vaiaso a’e aoga a le fanau, o se auala lea e le masalomia le ono tula’i mai ai o le le mautonu i le va o tagata faigaluega, ma e ono aafia ai fanau aoga mai le toe fo’i atu i le aoga.

Na faaiu le tusi a Lemanu i lona talosagaina lea o le avea pea o Samuelu ma Puleaoga a Samoana mo le taimi nei ona o lea ua toe a’e aoga a le fanau, ae sei i ai se isi taimi fetaui ona toe faia lea o ni isi suiga, ae afai o lo o i ai ni fa’aletonu ua mafua ai le faaiuga e pei ona faia, e taua lo latou fetufaa’i e fa’amalamalama lenei mataupu.

Na taua e le faletua o Sharmain Mageo, o se totino o le PTA a Samoana, o lona to’alua fo’i o se faiaoga i le aoga a Samoana i sana tusi sa tuuina atu i le alii kovana ia Lolo Matalasi Moliga, sa ia taumafai ai e fa’amanino vaega uma o lenei mataupu.

Na faailoa e Mageo ia Lolo e fa’apea, e le o mautonu lona mafaufau po o silafia e le kovana le faaletonu o lo o tulai mai i le va o le Ofisa o Aoga ma le puleaoga a Samoana, i lona musu lea e usitaia fa’atonuga ua uma ona tuuina atu i ai e le Ofisa o Aoga, i le mae’a ai lea ona fa’atonuina o ia e tula’i ese mai le tofiga puleaoga i le fa’aiuga o le tuuaga o aoga na se’i mavaega atu nei.

Na taua e Mageo le musu o Samuelu e alu ese, e ui o le aso Faraile na te’a nei lona aso mulimuli i totonu o le ofisa.

Sa taua fo’i e Mageo i se vaega o lana tusi, le tele o faagaioiga a le aoga e le auai Samuelu, ae na o le alu atu lava e oomi lana pepa faigaluega ma toe alu i le fale, e le i auai fo’i o ia i le asiasiga sa faia mo aoga maualuluga i le atunuu (WASC).

Na taua e Mageo e fa’apea, o ia sa i ai i le taimi o le aiga ma sui o le komiti na malaga mai e asiasia le aoga, na te lei vaaia ai le alii puleaoga ia Samuelu i lea polokalame atoa.

Na fa’aiu le tusi a Mageo i lona talosagaina lea o le kovana, afai e fia malamalama atili i le moni o lenei mataupu, e manaomia le fesiligia o faiaoga ma le PTA latou te faamanino atili le moni o lenei mataupu.

fa’aliliu Ausage Fausia