Ads by Google Ads by Google

Fa’atonu Komesina amata taofi taavale malo e le o usitai Poloaiga Kovana

Ua faatonu e le Kovana Sili ia Lolo Matalasi Moliga le Komesina o le Matagaluega o Leoleo, ina ia amata nei loa ona faamalosia le tulafono e taofia ai taavale uma a le malo e le o usitai i le Poloaiga Faalaua’itele ua maea ona sainia, i le faasa lea ona toe feoa’i taavale a le malo i luga o le auala i le tuana’i ai o taimi faigaluega, sei vagana o se faatanaga mai le malo.

 

O le Poloaiga Faalaua’itele a le kovana sili na sainia i le amataga o le masina na te’a nei, e faasa ai le toe faaaoga e tagata faigaluega o taavale a le malo e aunoa ma se faatanaga, e le o aofia ai taavale a le Ofisa o Leoleo, EMS, Fuimu, ma Faatonusili.

 

O lea faatonuga a le alii kovana na tuuina atu lea i le Komesina o Leoleo, i le taimi o le fonotaga a le Kapeneta i le aso Faraile na te’a nei. O lo o malaga i fafo le alii Komesina o Leoleo ia William Haleck sei vagana ai le Sui Komesina o Leoleo ia Leseiau Laumoli na auai i le fonotaga.

 

Saunoa Lolo e faapea, o lo o i ai pea lava taavale a le malo latou te le o usitaia le poloaiga ua maea ona ia sainia, e na o taavale lava ua tuu atu i ai le faatanaga e mafai ona feoai i le tuana’i ai o taimi faigaluega, faatasi ai ma taavale a Faatonusili, ae o isi taavale uma e paka i le lotoa a le malo i Tafuna.

 

“Ua uma ona ou fai atu, e na o Faatonusili lava e mafai ona alu ma lana taavale i le fale, ae o lea lava ou te vaaia isi taavale o lo o feoa’i i luga o le alatele i le tuana’i ai o taimi faigaluega e aunoa ma ni pemita faataga,” o le saunoaga lea a Lolo ma ia faatonuina ai le Komesina ina ia amata faamalosia loa le taofia o taavale e le o usitai i le poloaiga.

 

“Lau afioga i le Komesina o Leoleo, ua tatau nei loa ona amata faamalosia le poloaiga ua uma ona ma sainia ma le Lutena Kovana, afai e te maua se taavale a le malo i luga o le alatele e leai se pemita faataga e fealua’i ai, loka le taavale lena, ae faitalia le Faatonusili o le Matagaluega e ana le taavale ma fofo le faafitauli,” o le saunoaga lea a Lolo.

 

“O le Faatonusili e gafa ma mataupu faapena, afai e le mafai e le Faatonusili ona faatonutonu ana tagata faigaluega, lona uiga e le mafai foi ona e faatonutonuina lou Ofisa,” o le saunoaga lea a Lolo i sui o le Kapeneta.

 

O le isi mataupu na saunoa i ai le alii kovana, o tioata pogisa o lo o faaaoga e ni isi o taavale a le malo, lea ua ia faatonuina ai le alii Komesina ina ia aveese uma tioata pogisa (tint) o lo o faapipii i taavale uma a le malo.

 

“Ma te mananao ma Lemanu ina ia aua ne’i toe i ai ni ‘tint’ i taavale uma a le malo, ma te mananao foi ina ia iloa atu e le atunuu totonu o le taavale, ma vaai poo ai o lo o aveina le taavale a le malo, poo se tagata faigaluega a le malo poo se isi fo’i tagata,” o le saunoaga lea a Lolo.

 

Na faaopoopo le lutena kovana ia Lemanu Peleti Mauga i le saunoaga a le alii kovana ma ia saunoa ai e faapea, e le faatagaina foi “le ai ma le inu i totonu o soo se taavale a le malo, e oo lava foi i le ulaula tapa’a.”

 

“Pau taavale e mafai ona faataga e feoa’i mo le 24 itula, o taavale a i latou o lo o muamua tali atu i faalavelave e pei o Leoleo, EMS ma le Fuimu, ae o isi taavale uma lava e ese mai i le vaega lea ma taavale a Faatonusili, paka lelei le taavale a le malo i Tafuna, ae faaaoga lau taavale e te alu ai i lou aiga ma e toe sau ai i le galuega,” o le saunoaga lea a Lemanu.

 

E oo lava foi i vaega e paka ai taavale a matagaluega taitasi faapea ai le maota o le malo i Utulei, le EOB, sa aofia uma i fautuaga a le kovana ma le lutena kovana, ina ia mautinoa e usitaia tulaga uma nei.

 

“Aua ete paka i le paka a le ‘Handicapped Parking’, aua fo’i e te paka i le paka e le o tusia ai lou igoa, e oo i le ulaula i nofoaga e le faatagaina, e le tatau ona toe tupu lena mea, fautua i tagata faigaluega ina ia vaai nofoaga ua faapitoa mo tagata ulaula e aga’i i ai, ina ia silasila mai le atunuu o lo o tau solomua le malo ona usita’i i tulafono,” o le fautuaga lea a Lemanu.